ഭാരതവും അമേരിക്കയും തമ്മിലുള്ള സമഗ്ര വ്യാപാര കരാർ ഇന്ന് ഔദ്യോഗികമായി നിലവിൽ വന്നിരിക്കുകയാണ് വർഷങ്ങൾ നീണ്ട അനിശ്ചിതത്വങ്ങൾക്കും സങ്കീർണ്ണമായ ചർച്ചകൾക്കും ശേഷമുള്ള ഈ നയതന്ത്ര വിജയം ആഗോള വിപണിയിൽ ഇന്ത്യയുടെ സ്വാധീനം വർദ്ധിപ്പിക്കും. ഈ കരാർ ഇത്രയും കാലം വൈകിയത് കേവലം ചർച്ചാ നൈപുണ്യത്തിന്റെ കുറവുകൊണ്ടോ ഉദ്യോഗസ്ഥരുടെ പരാജയം കൊണ്ടോ ആയിരുന്നില്ല. മറിച്ച്, ഇരു രാജ്യങ്ങളും തങ്ങളുടെ ദേശീയ താല്പര്യങ്ങളിൽ വിട്ടുവീഴ്ച ചെയ്യാതെ നടത്തിയ ദീർഘകാല പോരാട്ടത്തിന്റെ ഫലമായിരുന്നു ഇത്. പ്രത്യേകിച്ചും കാർഷിക മേഖലയിലെ ഇറക്കുമതി നിയന്ത്രണങ്ങളും ഡിജിറ്റൽ വ്യാപാര നിയമങ്ങളും സംബന്ധിച്ച ഇന്ത്യയുടെ കർക്കശമായ നിലപാടുകൾ ഒരു ഘട്ടത്തിൽ ചർച്ചകളെ നിശ്ചലമാക്കിയിരുന്നു. എന്നാൽ ഇന്ത്യയുടെ ഈ വിട്ടുവീഴ്ചയില്ലാത്ത സമീപനം ഒടുവിൽ രാജ്യത്തിന് അനുകൂലമായ വ്യവസ്ഥകളോടെ കരാർ ഒപ്പിടാൻ സഹായിച്ചു എന്നതാണ് വസ്തുത.

ഇന്ത്യ ഒരേസമയം രണ്ട് തോണിയിൽ യാത്ര ചെയ്യുന്നു എന്ന വിമർശനം അന്താരാഷ്ട്ര തലത്തിൽ ഉയരാറുണ്ട്. റഷ്യയുമായുള്ള ദീർഘകാല ബന്ധവും പ്രതിരോധ സഹകരണവും നിലനിർത്തിക്കൊണ്ടുതന്നെ അമേരിക്കയുമായി തന്ത്രപരമായ പങ്കാളിത്തത്തിൽ ഏർപ്പെടുന്നത് ഇന്ത്യയുടെ നയതന്ത്ര പക്വതയാണ് വെളിപ്പെടുത്തുന്നത്. ഒരു വശത്തോടും പൂർണ്ണമായി ചേരാതെ സ്വന്തം താല്പര്യങ്ങൾക്ക് മുൻഗണന നൽകുന്ന സ്ട്രാറ്റജിക് ഓട്ടോണമി എന്ന നയം ആഗോള തലത്തിൽ ഭാരതത്തിന്റെ വിലപേശൽ ശേഷി വർദ്ധിപ്പിച്ചു. അമേരിക്കയെ സംബന്ധിച്ചിടത്തോളം ചൈനയ്ക്കെതിരെയുള്ള ഒരു പ്രധാന സാമ്പത്തിക പങ്കാളിയായി ഇന്ത്യയെ കാണേണ്ടത് അനിവാര്യമായിരുന്നതിനാൽ. ഇന്ത്യയുടെ ഈ ഇരട്ട നിലപാടുകളെ തള്ളിക്കളയാൻ അവർക്ക് സാധിച്ചില്ല.

ഭാവിയിൽ അന്താരാഷ്ട്ര ബന്ധങ്ങളിൽ കൂടുതൽ ശോഭിക്കാൻ ഇന്ത്യക്ക് ആഭ്യന്തരമായ പരിഷ്കാരങ്ങൾ അത്യാവശ്യമാണ്. കയറ്റുമതി ചെലവ് കുറയ്ക്കുന്നതിനുള്ള അടിസ്ഥാന സൗകര്യ വികസനവും ആഗോള നിലവാരത്തിലുള്ള ഉൽപ്പന്ന നിർമ്മാണവും വഴി മാത്രമേ ഈ കരാറിന്റെ പൂർണ്ണ ഗുണം കൊയ്യാൻ സാധിക്കൂ. അതോടൊപ്പം തന്നെ ഒരു വിപണിയെ മാത്രം ആശ്രയിക്കാതെ കൂടുതൽ രാജ്യങ്ങളുമായി ഇത്തരം സഖ്യങ്ങളിൽ ഏർപ്പെടുന്നത് ഇന്ത്യയുടെ സാമ്പത്തിക സുരക്ഷഉറപ്പാക്കും. ഈ കരാർ ഒരു തുടക്കം മാത്രമാണ്; വരും ദശകങ്ങളിൽ ലോകത്തെ മുൻനിര സാമ്പത്തിക ശക്തിയായി മാറാനുള്ള ഇന്ത്യയുടെ യാത്രയിൽ ഈ നയതന്ത്ര വിജയം ഒരു വലിയ ചുവടുവെപ്പായി മാറും.