അദ്വൈത് നായർ സംവിധാനം ചെയ്ത ‘ചത്താ പച്ച’ ബോക്‌സ് ഓഫീസിൽ വൻ കുതിപ്പ് തുടരുന്നു. റിലീസ് ചെയ്ത് വെറും പത്ത് ദിവസത്തിനുള്ളിൽ 35.51 കോടി രൂപയാണ് ചിത്രം ആഗോളതലത്തിൽ വാരിക്കൂട്ടിയത്. 

കേരളത്തിലെ തിയേറ്ററുകളിൽ മികച്ച ബുക്കിംഗോടെ രണ്ടാം വാരത്തിലേക്ക് കടക്കുന്ന ചിത്രം, 2026-ലെ മലയാള സിനിമയിലെ ആദ്യത്തെ വലിയ ഹിറ്റുകളിലൊന്നായി മാറിക്കഴിഞ്ഞു. മമ്മൂട്ടിയുടെ വാൾട്ടർ എന്ന അതിഥിവേഷവും അർജുൻ അശോകൻ, റോഷൻ മാത്യു എന്നിവരുടെ പ്രകടനവും പ്രേക്ഷകർക്കിടയിൽ വലിയ ആവേശമാണ് സൃഷ്ടിക്കുന്നത്.

കേരളത്തിന് പുറമെ മറ്റു ഭാഷകളിലേക്കും ചിത്രം ഉടൻ പ്രദർശനത്തിനെത്തും. ഫെബ്രുവരി 6-ന് തമിഴിലും ഫെബ്രുവരി 13-ന് തെലുങ്കിലും ചിത്രം റിലീസ് ചെയ്യും. കേരളത്തിൽ ദുൽഖർ സൽമാന്റെ വേഫെറർ ഫിലിംസും തെലങ്കാനയിൽ റാണ ദഗ്ഗുബാട്ടിയുടെ സ്പിരിറ്റ് മീഡിയയും ഉത്തരേന്ത്യയിൽ കരൺ ജോഹറിന്റെ ധർമ്മ പ്രൊഡക്ഷൻസുമാണ് വിതരണം ഏറ്റെടുത്തിരിക്കുന്നത്. 

ഒടിടി റിലീസിന് മുൻപ് തിയേറ്റർ അനുഭവം ഉറപ്പാക്കാൻ അണിയറപ്രവർത്തകർ ശ്രമിക്കുന്നതിനാൽ വരും ദിവസങ്ങളിലും കളക്ഷനിൽ വലിയ വർദ്ധനവ് പ്രതീക്ഷിക്കുന്നുണ്ട്.

സിനിമയിലെ ഗുസ്തി രംഗങ്ങളും വൈകാരികമായ കഥാതന്തുവുമാണ് കുടുംബപ്രേക്ഷകരെയും യുവാക്കളെയും ഒരുപോലെ ആകർഷിക്കുന്നത്. ശങ്കർ എഹ്സാൻ ലോയ് ആദ്യമായി മലയാളത്തിൽ സംഗീതം നിർവ്വഹിച്ച ഗാനങ്ങൾ ഇതിനോടകം സൂപ്പർഹിറ്റായി മാറി. ചിത്രത്തിന്റെ പ്രചാരണത്തിനായി കഥാപാത്രങ്ങളെ ഉൾപ്പെടുത്തി ട്രേഡിംഗ് കാർഡുകൾ പുറത്തിറക്കിയതും ശ്രദ്ധേയമായ നീക്കമാണ്.