കോഴിക്കോട്: സാങ്കേതിക വിദ്യയുടെ സാധ്യതകൾ ഉപയോഗപ്പെടുത്തി കേരളത്തിൽ നിന്നും ആദ്യമായി ഒരു സമ്പൂർണ്ണ എഐ (Artificial Intelligence) സയന്റിഫിക് ആക്ഷൻ ത്രില്ലർ സിനിമ ഒരുങ്ങുന്നു. കോഴിക്കോട് ആസ്ഥാനമായി പ്രവർത്തിക്കുന്ന എസ്.എം.ബി.എസ് (SMBS) ഇൻഫോലാബ് എൽ.എൽ.പി നിർമ്മിക്കുന്ന 'നൈറ്റ്‌ഫോൾ: ദി കൊച്ചി ഇൻവേഷൻ' (Nightfall: The Kochi Invasion) എന്ന ചിത്രത്തിന്റെ ട്രെയിലർ പ്രകാശനം ചെയ്തു.

കോഴിക്കോട് പ്രസ് ക്ലബ്ബിൽ ഇന്ന് നടന്ന ചടങ്ങിൽ, നാഷണൽ സ്‌കൂൾ ഓഫ് ഡ്രാമ വിദഗ്ധ സമിതി അംഗവും സിനിമ-നാടക പ്രവർത്തകനുമായ ശ്രീ ശശിനാരായണൻ ചിത്രത്തിന്റെ ട്രെയിലർ പ്രകാശനം നിർവ്വഹിച്ചു.

രമേഷ് ബാബു മാണിക്കോത്താണ് ചിത്രത്തിന്റെ രചനയും സംവിധാനവും നിർവ്വഹിച്ചിരിക്കുന്നത്. പരമ്പരാഗതമായ ഷൂട്ടിംഗ് സമ്പ്രദായങ്ങളോ അഭിനേതാക്കളോ ഇല്ലാതെ, പൂർണ്ണമായും നിർമ്മിത ബുദ്ധിയുടെ സഹായത്തോടെയാണ് ഈ ചിത്രം തയ്യാറാക്കിയിരിക്കുന്നത് എന്നതാണ് ഇതിന്റെ ഏറ്റവും വലിയ പ്രത്യേകത. ചാറ്റ് ജിപിടി (Chat GPT), സുനോ എഐ (Suno AI), വിഒ 3.1 (VO3.1), ഇലവൻലാബ് എഐ (Elevenlab AI) തുടങ്ങിയ അത്യാധുനിക എഐ ടൂളുകൾ ഉപയോഗിച്ചാണ് സിനിമയിലെ ദൃശ്യങ്ങളും സംഗീതവും ഒരുക്കിയിരിക്കുന്നത്.

വീഡിയോ നിർമ്മാണ രംഗത്ത് എഐ കൈവരിച്ച പുരോഗതിയാണ് ഇത്തരമൊരു സംരംഭത്തിന് കരുത്തായതെന്ന് അണിയറപ്രവർത്തകർ വാർത്താസമ്മേളനത്തിൽ പറഞ്ഞു. 8 സെക്കൻ്റ് ദൈർഘ്യമുള്ള 1200-ലധികം സീനുകൾ കൂട്ടിച്ചേർത്താണ് ഈ സിനിമ യാഥാർത്ഥ്യമാക്കിയത്. വിനോദ മേഖലയിൽ ഇതൊരു വിപ്ലവകരമായ മാറ്റത്തിന് തുടക്കമിടുമെന്നാണ് പ്രതീക്ഷിക്കുന്നത്.

സിനിമയുടെ പ്രമേയം: കൊച്ചിയുടെയും അറബിക്കടലിന്റെയും പശ്ചാത്തലത്തിൽ ഏലിയൻ അധിനിവേശത്തിന്റെ (Alien Invasion) കഥയാണ് ചിത്രം പറയുന്നത്. പ്രിയ എന്ന യുവ ടെലിവിഷൻ റിപ്പോർട്ടറെ അന്യഗ്രഹ ജീവികൾ തട്ടിക്കൊണ്ടുപോകുന്നതും, തുടർന്ന് നാവികസേന നടത്തുന്ന രക്ഷാപ്രവർത്തനത്തിനിടയിൽ കടലിനടിയിൽ മറഞ്ഞു കിടക്കുന്ന പുരാതനമായ ഒരു സത്യം കണ്ടെത്തുന്നതുമാണ് ഇതിവൃത്തം. ആധുനിക നഗരജീവിതവും പുരാണങ്ങളും അത്യാധുനിക സാങ്കേതികവിദ്യയും സമന്വയിപ്പിച്ചാണ് ചിത്രം ഒരുക്കിയിരിക്കുന്നത്.

ആഗോള നിലവാരത്തിലുള്ള ദൃശ്യവിരുന്നിനൊപ്പം പ്രാദേശികമായ തനിമയും നിലനിർത്തിക്കൊണ്ടാണ് 'നൈറ്റ്‌ഫോൾ: ദി കൊച്ചി ഇൻവേഷൻ' പ്രേക്ഷകരിലേക്കെത്തുന്നത്.