കിണ്ണാങ്കൃതി (കവിത:വേണു നമ്പ്യാർ)

തലയാട്ടാം തലയുണ്ടെങ്കിൽ
വാലാട്ടാം വാലുണ്ടെങ്കിൽ
കുത്തിക്കോർത്തിടാം കൊമ്പുണ്ടെങ്കിൽ;
വാലും തലയും കൊമ്പുമറ്റോരു
പൂർണ്ണദേഹിയായി ഭവസാഗരം
കടപ്പാൻ ശീലിച്ചാലൊ,
പുലരുമിവിടെയിപ്പോൾത്തന്നെ
സന്മനസ്സും സമാധാനവും.
തേടി അലയേണ്ട പിന്നെയൊരിക്കലും ഈ വാഴ് വിന്റെ വാലും തലയും!

ഇന്ന് ഇന്നലെ നാളെയായിരുന്നു
നാളെ ഇന്നലെ എന്തായിരിക്കും?
നാളേക്കു വേണ്ടി ഇന്നലെയെ
പണയപ്പെടുത്തിയ
പാപം വഹിക്കുന്നതാര്?
ഇന്ന് എന്ന് പറയുന്നതു തന്നെ
ഒരധികപ്രസംഗമാകും
പാപം പേറുന്നത് ഇന്നല്ലല്ലോ -
ഈ നിമിഷമല്ലേ!
ഈ തലയല്ലേ?

ചുമലിലൊരു തലയുള്ളോനതു
കേവലമൊരു ചുമൽച്ചുമടല്ലയോ!
ചുമലിലതില്ലാത്തോനില്ലത്രെ
ചുമതലയെള്ളോളമീഭൂമിയിൽ!

രസം അറിവതിനെ
അറിയവെ മഹാരസം
ദുഃഖം അറിവതിനെ
അറിയവെ മഹാസുഖം
ഒരിക്കലും വിട്ടു പോകാത്ത
വീടിനെ പ്രതി എന്തിനീ
ഗൃഹാതുരത്വം!

കാട്ടിൽ ജനിച്ചതു മൂലം
കാടനായി
നാട്ടിൽ ജനിച്ചതു മൂലം
നാടനായി
വീട്ടിൽ ജനിച്ചതു മൂലം
വിടനായി
ആശുപത്രിയിൽ ജനിച്ചതു മൂലം
അശുവായി

കാടനും നാടനും
വിടനും അശുവുമൊക്കെ
പുറമെയല്ലേ -
അകമെ
മനുഷ്യനാരുമല്ലല്ലൊ!

വാലും തലയുമില്ലാത്തൊരു
കിണ്ണാങ്കൃതി പടച്ചുവിട്ടിഹ
ദ്രോഹിക്കണൊ മാന്യജനത്തെ
യെന്നാരായും നിരൂപകവര്യനോ
ടുദീരണം ചെയ് വൂ കവിയിങ്ങനെ:
വാലും തലയുമറ്റോരു
വർത്തമാനകാലവാഴ് വിൻ
നേർക്കാഴ്ചയിതെന്നങ്ങ് കൃപയാ
ധരിച്ചാലടിയൻ ധന്യനായി!!
കിണ്ണാങ്കൃതി ബഹുകേമമായി!

Facebook Comments

Comments

Sudhir Panikkaveetil 2025-12-30 14:27:33

ശ്രീ വേണു നമ്പ്യാർ ഒരു ഇടവേളക്ക് ശേഷം വീണ്ടും തത്വചിന്താപരമായ ഒരു കവിതയുമായി വന്നിട്ടുണ്ടു. കവിതയെക്കുറിച്ച് ഒരു കമന്റ് എഴുതാൻ കാരണം എഴുത്തുകാരായ കൂട്ടുകാർ കിണ്ണാം കൃതി എന്തെന്ന് ചോദിച്ചു. നമുക്ക് ഉപദ്രവമായി തോന്നുന്ന ഒരു രചന എന്നാണു ഞാൻ മനസ്സിലാക്കിയിട്ടുള്ളത്. കവി ഇതിന്റെ അവസാനം നിരൂപകനോട് പറയുന്നുണ്ട് കൃതിയെ കുറ്റം പറഞ്ഞിട്ട് കാര്യമില്ല ഈ കാലം മനുഷ്യരുടെ ജീവിതം വാലും തലയുമറ്റ റ്റപോലെയാണ്. പിന്നെങ്ങനെ രചനകൾ മറിച്ചാകും. ബൈബിൾ പറയുന്നു "അപ്പോൾ സമുദ്രത്തിൽനിന്ന് ഒരു മൃഗം കയറിവരുന്നതു ഞാൻ കണ്ടു. അതിന് പത്തു കൊമ്പും ഏഴു തലയും കൊമ്പുകളിൽ പത്തു കിരീടവും ഓരോ തലയിലും ദൈവത്തെ നിന്ദിക്കുന്ന നാമങ്ങളും എഴുതപ്പെട്ടിരുന്നു." വാലും തലയും കൊമ്പുമുള്ള മൃഗമാകാതെ മനുഷ്യനായി മനുഷ്യർ ജീവിക്കണം. എങ്കിൽ അവർക്ക് ഭവസാഗരം അതായത് ഈ സംസാരചക്രം മറികടക്കാൻ കഴിയും. പുതുവത്സരചിന്തകളിൽ ഇതുകൂടെ ഉൾപ്പെടുത്താം. ശ്രീ വേണു നമ്പ്യാര്ക്കും കുടുംബത്തിനും സന്തോഷകരമായ ഐശ്വര്യപൂർണ്ണമായ നവ വത്സരം നേരുന്നു.

മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക

അസഭ്യവും നിയമവിരുദ്ധവും അപകീര്‍ത്തികരവുമായ പരാമര്‍ശങ്ങള്‍ പാടില്ല. വ്യക്തിപരമായ അധിക്ഷേപങ്ങളും ഉണ്ടാവരുത്. അവ സൈബര്‍ നിയമപ്രകാരം കുറ്റകരമാണ്. അഭിപ്രായങ്ങള്‍ എഴുതുന്നയാളുടേത് മാത്രമാണ്. ഇ-മലയാളിയുടേതല്ല

കിണ്ണാങ്കൃതി (കവിത:വേണു നമ്പ്യാർ)

PATHRANGAL

US WEBSITES

EMalayalee Available in MediaAppUSA