ദൂരേ കിഴക്കിന്റെ ചക്രവാളത്തിലെ

സൂര്യച്ചെറുക്കന്റെ കണ്ണേറ്

താഴത്തെ ഭൂമിക്കിടാത്തി തൻ മാറത്തൊ -

രോമൽ കിനാവിന്റെ ‌ നീരാട്ട്‌ !

പൂവായി ഭൂമിയെ മൂടുന്ന ചുംബന

ലീലാ വിലാസങ്ങളിൽ

പ്രേമ വസന്തമായ് കോരിത്തരിക്കുന്നു

രാഗ വിലോല വികാര മൂർച്ച !

മായാ പ്രപഞ്ച നിഗൂഢ നിരാമയ

രൂപമീ നക്ഷത്ര ധൂളീ ലയം

സാധകം ! ബോധമായ് എന്നിൽ തെളിയുന്ന ഞാനെന്ന

തേജസാം ദൈവ പ്രഭ !

ഓരോ പ്രഭാതത്തുടുപ്പിലും സ്വപ്നമായ്

നാളേകൾ  താണ്ടുമീ രാസത്വരം

ആറടി മണ്ണിൽ അലിഞ്ഞു ചേരാനുള്ള

യാതനാ യാത്രാ വഴിയിലല്ലോI ?

ആര് ഞാൻ ?  നക്ഷത്ര ധൂളികൾ ക്കപ്പുറ -

ത്താളുന്ന സത്യ സമസ്ഥതയിൽ

ചേതസാം  മുൻ ചിന്താ രൂപം വിരിയിച്ച

സാരമായ് ശക്തിയായ് മൂന്നരങ്ങിൽ !

സ്നേഹമാണെങ്ങും കണികകൾ ഒന്നിച്ച

പ്രേമം രചിച്ചൊരീ വിശ്വ രൂപം !

പ്രേമിച്ചു പ്രേമിച്ചു മണ്ണും മനുഷ്യനും

ഭൂമിയിൽ സ്വർഗ്ഗം പണിഞ്ഞു വയ്ക്കും !

ലോകാവസാനം മത / ശാസ്ത്ര ചൂഷണ

കാപാലികർ വിറ്റ  ക്രൂരം  നുണ

പോരിക മണ്ണിൽ മനുഷ്യനും ദൈവവും

ചേരുന്ന സ്വർഗ്ഗ കവാടങ്ങളിൽ !

നാളത്തെ സൗര മഹാ സ്പോടനങ്ങളിൽ

ധൂളികളായി വഴി പിരിഞ്ഞാൽ

കാലത്തിൻ മാറിലെ ചൂടിൽ അനശ്വര

നാളങ്ങളായി നാം വീണ്ടും വരും !