കെ.എസ്.എഫ്.ഡി.സി.യുടെ നിർമ്മാണത്തിൽ, ശിവരഞ്ജിനി രചനയും സംവിധാനവും എഡിറ്റിംഗും നിർവഹിച്ച മലയാള ചിത്രം ‘വിക്ടോറിയ’ നവംബർ 28-ന് കേരളത്തിലെ തിയറ്ററുകളിൽ എത്തുന്നു. 

അന്താരാഷ്ട്ര തലത്തിൽ നിരവധി ചലച്ചിത്രമേളകളിൽ പ്രദർശിപ്പിക്കുകയും പുരസ്കാരങ്ങൾ നേടുകയും ചെയ്ത ചിത്രമാണിത്. ഒരു ബ്യൂട്ടിപാർലർ ജോലിക്കാരിയായ വിക്ടോറിയയുടെ ജീവിതമാണ് ചിത്രം പറയുന്നത്. കേന്ദ്ര കഥാപാത്രത്തെ അവതരിപ്പിച്ച മീനാക്ഷി ജയന്, ചൈനയിലെ പ്രശസ്തമായ ഷാങ്ഹായ് ഫെസ്റ്റിവലിലെ ഗോൾഡൻ ഗ്ലോബറ്റ് ഏഷ്യൻ ടാലന്റ് മത്സര വിഭാഗത്തിൽ മികച്ച നടിക്കുള്ള പുരസ്കാരം നേടിക്കൊടുത്ത പ്രകടനമാണ് ചിത്രത്തിലേത്.

സമകാലിക കേരളീയ സ്ത്രീ ജീവിതങ്ങളെ പ്രമേയമാക്കി, മുഴുവനായും സ്ത്രീ കഥാപാത്രങ്ങളിലൂടെ സഞ്ചരിക്കുന്ന ചിത്രമാണ് ‘വിക്ടോറിയ’. മീനാക്ഷി ജയനെ കൂടാതെ ശ്രീഷ്മ ചന്ദ്രൻ, ജോളി ചിറയത്ത്, ദർശന വികാസ്, സ്റ്റീജ മേരി ചിറയ്ക്കൽ, ജീന രാജീവ്, രമാ ദേവി എന്നിവരും പ്രധാന വേഷങ്ങളിലെത്തുന്നു. ശ്രദ്ധേയമായി, ഒരു പൂവൻകോഴിയും ചിത്രത്തിൽ പ്രധാന കഥാപാത്രമാണ്.

 ചൈനയിലെ ഷാങ്ഹായ് ഫെസ്റ്റിവലിലേക്ക് ഇന്ത്യയിൽ നിന്ന് തിരഞ്ഞെടുക്കപ്പെട്ട ഏക ചിത്രമായ ‘വിക്ടോറിയ’, ഐ.എഫ്.എഫ്.കെ 2024-ൽ മികച്ച നവാഗത സംവിധായികയ്ക്കുള്ള ഫിപ്രസ്കി പുരസ്കാരം നേടി. കൂടാതെ, മുംബൈ വാട്ടർഫ്രന്റ് ഇൻഡീ ഫിലിം ഫെസ്റ്റിവലിൽ മികച്ച ചിത്രം, സംവിധായിക, ഛായാഗ്രഹണം ഉൾപ്പെടെ മൂന്ന് പുരസ്കാരങ്ങൾ, സിയോൾ വനിതാ ചലച്ചിത്രോത്സവത്തിലെ എക്‌സലൻസി അവാർഡ്, മികച്ച സംവിധാനത്തിനുള്ള മോഹൻ രാഘവൻ അനുസ്മരണ സിനിമാ പുരസ്കാരം എന്നിവയും ചിത്രം കരസ്ഥമാക്കി. മലേഷ്യ, തായ്പേ, സൗത്ത് ഓസ്‌ട്രേലിയയിലെ അഡ്‌ലെയ്ഡ്, കൽക്കത്ത, ധരംശാല എന്നിവിടങ്ങളിലെ അന്താരാഷ്ട്ര ചലച്ചിത്രോത്സവങ്ങളിലും ‘വിക്ടോറിയ’ പ്രദർശിപ്പിച്ചു.