ഗാന്ധി ജയന്തി ദിനത്തോടനുബന്ധിച്ച് ഒക്ടോബർ 2-ന് സിയാറ്റിലിലെ കോൺസുലേറ്റ് ജനറൽ ഓഫ് ഇന്ത്യയും ഗേറ്റ്‌സ് ഫൗണ്ടേഷനും സംയുക്തമായി പ്രത്യേക ഇന്ത്യ ദിനാഘോഷം സംഘടിപ്പിച്ചു. ഫൗണ്ടേഷൻ ചെയർമാനും ബോർഡ് അംഗവുമായ ബിൽ ഗേറ്റ്‌സ്, വാഷിംഗ്ടൺ സംസ്ഥാനത്തെയും സിയാറ്റിൽ നഗരത്തിലെയും മുതിർന്ന നേതാക്കൾക്കൊപ്പം പരിപാടിയിൽ പങ്കെടുത്തു. ഇന്ത്യൻ സംസ്കാരം, കല, വിഭവങ്ങൾ എന്നിവയാൽ സമ്പന്നമായിരുന്നു ഈ ആഘോഷം.

പരിപാടിയിൽ സംസാരിച്ച ബിൽ ഗേറ്റ്‌സ്, മഹാത്മാഗാന്ധിയുടെ സമത്വത്തെയും അന്തസ്സിനെയും കുറിച്ചുള്ള ആദർശങ്ങൾ തങ്ങളുടെ ഫൗണ്ടേഷൻ്റെ പ്രവർത്തനങ്ങൾക്ക് എത്രത്തോളം പ്രധാനമാണെന്ന് എടുത്തുപറഞ്ഞു. ആരോഗ്യ-നവീകരണ മേഖലകളിൽ ഇന്ത്യയുടെ ആഗോള നേതൃത്വത്തെയും അദ്ദേഹം പ്രശംസിച്ചു. ആരോഗ്യം, വികസനം, നവീകരണം തുടങ്ങിയ മേഖലകളിലെ ഇന്ത്യ-ഗേറ്റ്‌സ് ഫൗണ്ടേഷൻ പങ്കാളിത്തത്തിൻ്റെ ശക്തിയാണ് ഈ ആഘോഷം പ്രതിഫലിപ്പിക്കുന്നതെന്ന് കോൺസുലേറ്റ് വ്യക്തമാക്കി.

ഗാന്ധിജിയുടെ 156-ാമത് ജന്മവാർഷികത്തിൽ നടന്ന ഈ ആഘോഷം, ഒക്ടോബർ 2 അന്താരാഷ്ട്ര അഹിംസാ ദിനമായി ആചരിക്കുന്നതിൻ്റെ പ്രാധാന്യം വിളിച്ചോതുന്നതായിരുന്നു. സാംസ്കാരിക പരിപാടികളും വിഭവസമൃദ്ധമായ ഇന്ത്യൻ ഭക്ഷണവും ആഘോഷത്തിന് മാറ്റുകൂട്ടി.

English summary:

On Gandhi Jayanti, “India Day” was celebrated at the Gates Foundation in Seattle.