1
ഇടിയും മിന്നലും
മാനത്തിന്റെ ഓക്കാനമാണെങ്കിൽ
പച്ചപ്പുൽനാമ്പുകൾ
ഭൂമിയുടെ ഛർദ്ദിയായിരിക്കും
ഭൂമിയുടെ ഛർദ്ദില്
പട്ടികളെ പോലെ
മനുഷരും നക്കിത്തുടയ്ക്കുന്നു
പട്ടികൾക്ക് നന്ദിയുണ്ട്
മനുഷ്യർക്കതില്ല ലവലേശം
2
മനുഷ്യൻ ഓക്കാനമാകാം
ദൈവത്തിന്റെ
മതം ഛർദ്ദിയാകാം
മനുഷ്യന്റെ
3
ചുററും
വളിച്ച ഗന്ധം
പകയുടെ
വെറുപ്പിന്റെ
അജ്ഞതയുടെ
അത്യാർത്തിയുടെ
അത്യാഡംബരത്തിന്റെ
അപരൻ
ഛർദ്ദി വരാത്ത
ഒരു ഓക്കാനമാകാം
മറ്റൊരു തരത്തിൽ പറഞ്ഞാൽ
നരകത്തിന്റെ
വമനേഛ!
4
ഇന്നലെ കേമം
ഇന്ന് കെങ്കേമം
നാളെ ചക്രവാളത്തിൽ
വീണ്ടും ഒരു കുങ്കുമ സൂര്യൻ!
5
ഇണങ്ങാൻ പറയും
വഴങ്ങാൻ പറയും
വണങ്ങാൻ പറയും
ഉണങ്ങിച്ചുരുളാൻ പറയും
ഉണങ്ങിയത്
വീണ്ടുമൊരിക്കൽ തളിർക്കുമെന്ന്
മുൻകൂറായി പറയില്ല
ചിലപ്പോഴെങ്കിലും
സത്യം നേരിട്ട്
മുഖദാവിൽ കാണിച്ചുതരുവാൻ
സൻമനസ്സുണ്ടാകണം
എന്റെ പ്രേമഭാജനത്തിന്!
ഞാൻ കാത്തിരിക്കാം.
6
വന്നിട്ടില്ല
വന്ന ചരിത്രമില്ല
പോയിട്ടില്ല
പോയ ചരിത്രമില്ല
ജീർണ്ണിച്ച ശവക്കല്ലറയ്ക്കുള്ളിൽ
കൂർക്കംവലിച്ചുറങ്ങുകയാണ്
കേവലം ഒരപരൻ
ചിലർ പരാപരനെന്നും പറയും
മരണാനന്തരഓക്കാനത്തിന്
ഓശാന വേണോ
വ്യാഖ്യാനം വേണോ
അതൊ ചികിത്സ വേണോ?
സഞ്ജീവനിയല്ല
ഓഷ്യാനിക് അനുഭൂതിയാകട്ടെ
ഔഷധം
പത്ഥ്യത്തിന്
സർവ്വചരാചരങ്ങളെയും കൂട്ടാം!