ഇടക്കാല തിരഞ്ഞെടുപ്പിന് ഒരാഴ്ച മാത്രം ശേഷിക്കെ പ്രസിഡന്റ് ഡോണൾഡ് ട്രംപിനും റിപ്പബ്ലിക്കൻ പാർട്ടിക്കും തിരിച്ചടി പ്രവചിച്ച് സർവേകൾ. താരിഫ് യുദ്ധവും ഇറാൻ സംഘർഷവും സൃഷ്ടിച്ച സാമ്പത്തിക പ്രത്യാഘാതങ്ങൾ വോട്ടർമാരിൽ അതൃപ്തി വർധിപ്പിച്ചതോടെ ഹൗസിന്റെ നിയന്ത്രണം റിപ്പബ്ലിക്കൻ പാർട്ടിക്ക് നഷ്ടമാകുമെന്നാണ് വിലയിരുത്തൽ. സെനറ്റിലെ ഭൂരിപക്ഷം സംബന്ധിച്ച് അനിശ്ചിതത്വം തുടരുകയാണ്.

തിരഞ്ഞെടുപ്പ് സർവേകൾ ഏകോപിപ്പിക്കുന്ന റിയൽ ക്ലിയർ പോളിറ്റിക്സിന്റെ (ആർസിപി) കണക്കനുസരിച്ച് ട്രംപിന്റെ പ്രവർത്തനങ്ങളെ 38.2 ശതമാനം പേർ മാത്രമാണ് അംഗീകരിക്കുന്നത്. 60.2 ശതമാനം പേർ അതൃപ്തി രേഖപ്പെടുത്തുന്നു. ട്രംപിന്റെ നയങ്ങൾ തങ്ങളുടെ സാമ്പത്തിക സ്ഥിതി മോശമാക്കിയെന്ന് 57 ശതമാനം വോട്ടർമാർ അഭിപ്രായപ്പെട്ടതായും റിപ്പോർട്ടിൽ പറയുന്നു.

പെട്രോളിയം ഉൽപ്പന്നങ്ങളുടെ വില വർധനയും പണപ്പെരുപ്പവും ജനങ്ങളെ ബാധിക്കുന്നു. കഴിഞ്ഞ മാസം പണപ്പെരുപ്പ നിരക്ക് 3.7 ശതമാനമായി ഉയർന്നു. പെട്രോളിന്റെ ശരാശരി വില ഗാലന് 4.28 ഡോളറും ഡീസലിന്റെ വില 6.28 ഡോളറുമാണ്. 2024-ലെ തിരഞ്ഞെടുപ്പ് പ്രചാരണത്തിൽ പെട്രോൾ വില ഗാലന് രണ്ടു ഡോളറായി കുറയ്ക്കുമെന്ന് ട്രംപ് വാഗ്ദാനം ചെയ്തിരുന്നു.

435 അംഗങ്ങളുള്ള ഹൗസിൽ ഡെമോക്രാറ്റുകൾക്ക് 227 സീറ്റുകൾ ലഭിക്കുമെന്നാണ് ആർസിപിയുടെ പ്രവചനം. കുക്ക് പൊളിറ്റിക്കൽ റിപ്പോർട്ട് 220 സീറ്റുകളും സിബിഎസ് ന്യൂസ് 229 സീറ്റുകളുമാണ് പ്രവചിക്കുന്നത്. റിപ്പബ്ലിക്കൻ പാർട്ടിക്ക് ഭൂരിപക്ഷം നിലനിർത്താനുള്ള സാധ്യത ഏതാണ്ട് ഇല്ലാതായെന്ന് കുക്ക് പൊളിറ്റിക്കൽ റിപ്പോർട്ടിന്റെ ഹൗസ് തിരഞ്ഞെടുപ്പ് എഡിറ്റർ എറിൻ കോവെ പറഞ്ഞു.

എന്നാൽ, സെനറ്റിലെ ചിത്രം വ്യത്യസ്തമാണ്. ഇത്തവണ 35 സീറ്റുകളിലാണ് തിരഞ്ഞെടുപ്പ് നടക്കുന്നത്. സിബിഎസ് ന്യൂസിന്റെ വിലയിരുത്തലിൽ ഡെമോക്രാറ്റുകൾക്ക് 52 സീറ്റുകളും റിപ്പബ്ലിക്കൻ പാർട്ടിക്ക് 48 സീറ്റുകളും ലഭിക്കാം. കുക്ക് പൊളിറ്റിക്കൽ റിപ്പോർട്ട് ഏഴ് സീറ്റുകളിൽ മത്സരം പ്രവചനാതീതമാണെന്ന് വിലയിരുത്തുന്നു.

തിരിച്ചടി നേരിടുന്ന സാഹചര്യത്തിൽ റിപ്പബ്ലിക്കൻ സ്ഥാനാർഥികൾ ട്രംപിൽനിന്ന് അകലം പാലിക്കുന്നതായും റിപ്പോർട്ടുണ്ട്. ന്യൂഹാംഷെയറിലെ റിപ്പബ്ലിക്കൻ സെനറ്റ് സ്ഥാനാർഥി ജോൺ സുനുനു, ഇറാനിലെ യുദ്ധത്തെയും കാനഡയുമായുള്ള വ്യാപാരയുദ്ധത്തെയും എതിർത്തതുപോലെ ന്യൂഹാംഷെയറിന് ദോഷകരമായ പ്രസിഡന്റിന്റെ നയങ്ങളെയും എതിർക്കുമെന്ന് പ്രഖ്യാപിച്ചു.

റിപ്പബ്ലിക്കൻ പാർട്ടിയുടെ ശക്തികേന്ദ്രങ്ങളിൽ പ്രചാരണം കേന്ദ്രീകരിച്ചാണ് ട്രംപ് മുന്നോട്ടുപോകുന്നത്. 2024-ൽ 14 ശതമാനം പോയിന്റിന്റെ ഭൂരിപക്ഷത്തിൽ വിജയിച്ച ടെക്സസിൽ അദ്ദേഹത്തിന്റെ പിന്തുണയുള്ള സ്ഥാനാർഥി കെൻ പാക്സ്റ്റൺ ഡെമോക്രാറ്റ് ജെയിംസ് തലാരിക്കോയേക്കാൾ 1.5 ശതമാനം പിന്നിലാണ്.

ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടി വിജയിച്ചാൽ ഓരോ മുതിർന്ന അമേരിക്കൻ പൗരനും 5,000 ഡോളർ വീതം നൽകുമെന്ന വാഗ്ദാനവുമായി ട്രംപ് രംഗത്തെത്തിയിട്ടുണ്ട്. തിരഞ്ഞെടുപ്പ് തന്റെ രണ്ടാം ഭരണത്തിന്റെ ആദ്യ 20 മാസത്തെ വിലയിരുത്തലായിരിക്കുമെന്ന് അദ്ദേഹം പ്രഖ്യാപിക്കുകയും വോട്ടർമാർ താൻ മത്സരിക്കുന്നതുപോലെ തിരഞ്ഞെടുപ്പിനെ കാണണമെന്ന് ആവശ്യപ്പെടുകയും ചെയ്തു.

വോട്ടെടുപ്പ് ഇതിനകം ആരംഭിച്ചിട്ടുണ്ട്. തിങ്കളാഴ്ചയോടെ തപാൽ ബാലറ്റുകളിലൂടെയും നേരിട്ടുള്ള ആദ്യഘട്ട വോട്ടെടുപ്പിലൂടെയും ഏകദേശം മൂന്ന് കോടി പേർ വോട്ട് രേഖപ്പെടുത്തിയിരുന്നു. 21.7 കോടി രജിസ്റ്റർ ചെയ്ത വോട്ടർമാരാണ് അമേരിക്കയിലുള്ളത്.

ഹൗസിൽ ഡെമോക്രാറ്റുകൾക്ക് ഭൂരിപക്ഷം ലഭിച്ചാൽ ട്രംപിന്റെ നയങ്ങൾക്കും ഭരണനടപടികൾക്കും തടസ്സം സൃഷ്ടിക്കാനാകും. ഇതോടെ ഭരണകൂടവും കോൺഗ്രസും തമ്മിലുള്ള ഏറ്റുമുട്ടൽ രൂക്ഷമാകാനുള്ള സാധ്യതയും നിലനിൽക്കുന്നു.