വാഷിങ്ടൺ, ഒക്ടോബർ 27 : ഇന്ത്യൻ വംശജർക്കെതിരായ വിദ്വേഷ പരാമർശങ്ങൾ അമേരിക്കയിലെ യാഥാസ്ഥിതിക രാഷ്ട്രീയ പ്രസ്ഥാനത്തിൽ വർധിച്ചുവരുന്നതിൽ പ്രതിഷേധിച്ച് 2024-ൽ റിപ്പബ്ലിക്കൻ പാർട്ടിയെ പിന്തുണച്ച ഇന്ത്യൻ അമേരിക്കൻ വോട്ടർമാരിൽ ഒരു വിഭാഗം നവംബർ മൂന്നിന് നടക്കുന്ന ഇടക്കാല തിരഞ്ഞെടുപ്പിൽ ഡെമോക്രാറ്റുകൾക്ക് വോട്ട് ചെയ്യാൻ ഒരുങ്ങുന്നതായി റിപ്പോർട്ട്.

ഇന്ത്യൻ-അമേരിക്കൻ വോട്ടർമാരിൽ നടത്തിയ പുതിയ സർവേയും വിവിധ സമൂഹനേതാക്കളുടെ പ്രതികരണങ്ങളും ഇതാണ് സൂചിപ്പിക്കുന്നത്. ഇന്ത്യൻ അമേരിക്കൻ വോട്ടർമാരുടെ അവകാശങ്ങൾക്കായി പ്രവർത്തിക്കുന്ന സംഘടനയായ ഇന്ത്യൻ അമേരിക്കൻ ഇംപാക്ട് നടത്തിയ സർവേയിൽ, 2024-ൽ പ്രസിഡന്റ് ഡോണൾഡ് ട്രംപിന് വോട്ട് ചെയ്ത ഇന്ത്യൻ അമേരിക്കക്കാരിൽ നാലിലൊന്ന് പേർ ഇത്തവണ ഡെമോക്രാറ്റുകൾക്ക് വോട്ട് ചെയ്യാനാണ് ഉദ്ദേശിക്കുന്നതെന്ന് കണ്ടെത്തി.

തിരഞ്ഞെടുപ്പിൽ വോട്ട് ചെയ്യാൻ സാധ്യതയുള്ളവരിൽ ഡെമോക്രാറ്റുകൾക്ക് 66 ശതമാനത്തോളം പിന്തുണയുണ്ടെന്നാണ് റിപ്പോർട്ട്. അതേസമയം, സ്വതന്ത്രരായ ദക്ഷിണേഷ്യൻ വോട്ടർമാരിൽ മൂന്നിൽ രണ്ടുപേരും ഇതുവരെ നിലപാട് തീരുമാനിച്ചിട്ടില്ല.

'ഇന്ത്യൻ അമേരിക്കൻ വോട്ടർമാരിൽ വലിയൊരു വിഭാഗം പിന്തുണച്ചതിൽ ഖേദിക്കുന്ന അവസ്ഥയിലാണ്. വിദ്വേഷവും വിവേചനവും സംബന്ധിച്ച ചർച്ചകൾ സമൂഹത്തിൽ ശക്തമാകുന്നതിനനുസരിച്ച് ഈ പ്രവണതയും വളരുകയാണ്,' ഇന്ത്യൻ അമേരിക്കൻ ഇംപാക്ട് എക്സിക്യൂട്ടീവ് ഡയറക്ടർ ചിന്തൻ പട്ടേൽ പ്രാദേശിക മാധ്യമങ്ങളോട് പറഞ്ഞു.

ജീവിതച്ചെലവും ആരോഗ്യപരിരക്ഷയുമാണ് ഇന്ത്യൻ അമേരിക്കൻ വോട്ടർമാരും പ്രധാന തിരഞ്ഞെടുപ്പ് വിഷയങ്ങളായി കാണുന്നതെന്ന് സർവേ വ്യക്തമാക്കുന്നു.

കാർനെഗി എൻഡോവ്മെന്റ് ഫോർ ഇന്റർനാഷണൽ പീസ് ഫെബ്രുവരിയിൽ നടത്തിയ സർവേയിൽ ട്രംപിന്റെ രണ്ടാം ഭരണകാലത്തെ പ്രവർത്തനങ്ങളിൽ 70 ശതമാനം ഇന്ത്യൻ അമേരിക്കക്കാരും അതൃപ്തി രേഖപ്പെടുത്തിയിരുന്നു. എന്നാൽ, ഡെമോക്രാറ്റുകളെന്ന് സ്വയം വിശേഷിപ്പിക്കുന്നവരുടെ എണ്ണം 2020-നെ അപേക്ഷിച്ച് കുറഞ്ഞ് 46 ശതമാനത്തിലെത്തിയതായും റിപ്പോർട്ടിൽ പറയുന്നു. 2024-ൽ ഇന്ത്യൻ അമേരിക്കക്കാരിൽ ഏകദേശം മൂന്നിലൊന്ന് ട്രംപിനെ പിന്തുണച്ചിരുന്നു.

റിപ്പബ്ലിക്കൻ പാർട്ടിയിലെ മുതിർന്ന തന്ത്രജ്ഞനും സെനറ്റർ മിച്ച് മക്കോണലിന്റെ മുൻ സഹപ്രവർത്തകനുമായ അനങ് മിത്തൽ, ഇന്ത്യൻ വംശജർക്കെതിരായ പരാമർശങ്ങൾ രാഷ്ട്രീയമായി അനുവദനീയമാണെന്ന നിലപാടാണ് ചില റിപ്പബ്ലിക്കൻ നേതാക്കൾ സ്വീകരിക്കുന്നതെന്ന് ആരോപിച്ചു.

അമേരിക്കയിൽ ഏകദേശം 52 ലക്ഷം ഇന്ത്യൻ അമേരിക്കക്കാർ താമസിക്കുന്നതായാണ് കണക്ക്. ഇത് രാജ്യത്തെ മൊത്തം ജനസംഖ്യയുടെ 1.5 ശതമാനത്തിലധികമാണ്.

'ഇന്ത്യൻ കുടിയേറ്റക്കാരെ പുറത്തുനിന്നുള്ളവരായും അമേരിക്കൻ സംസ്കാരവുമായി പൊരുത്തപ്പെടാത്തവരായും ചിത്രീകരിക്കുന്ന ഭാഷ ഉപയോഗിച്ചാൽ അതിന് രാഷ്ട്രീയമായി വില നൽകേണ്ടിവരില്ലെന്നാണ് അവർ തീരുമാനിച്ചിരിക്കുന്നത്,' മിത്തൽ പറഞ്ഞു.

രാജ്യത്തെ ഏറ്റവും ചെലവേറിയ സെനറ്റ് തിരഞ്ഞെടുപ്പ് നടക്കുന്ന ടെക്സസിലും ഇന്ത്യൻ അമേരിക്കൻ വോട്ടർമാരുടെ നിലപാടുമാറ്റം പ്രകടമാണെന്ന് സമൂഹനേതാക്കൾ പറയുന്നു.

'റിപ്പബ്ലിക്കൻ പാർട്ടിക്ക് സന്ദേശം നൽകാനായി ഇത്തവണ മുഴുവൻ ബാലറ്റിലും ഡെമോക്രാറ്റുകൾക്ക് വോട്ട് ചെയ്യുമെന്ന് പറയുന്ന ചിലരെ ഞാൻ കണ്ടിട്ടുണ്ട്. ഇത്തരം പരാമർശങ്ങൾ അംഗീകരിക്കില്ലെന്ന് വ്യക്തമാക്കാനാണ് അവരുടെ തീരുമാനം,' ഹൂസ്റ്റൺ വ്യവസായിയും ഹിന്ദു അമേരിക്കൻ ഫൗണ്ടേഷൻ ബോർഡ് അംഗവുമായ ഋഷി ഭൂതാഡ പറഞ്ഞു.

ടെക്സസ് റെയിൽറോഡ് കമ്മീഷണർ സ്ഥാനത്തേക്ക് മത്സരിക്കുന്ന റിപ്പബ്ലിക്കൻ സ്ഥാനാർഥി ബോ ഫ്രഞ്ച്, യൂണിവേഴ്സിറ്റി ഓഫ് ടെക്സസ് ഫുട്ബോൾ മത്സരത്തിൽ പങ്കെടുത്ത ദക്ഷിണേഷ്യൻ ആരാധകരെക്കുറിച്ച് നടത്തിയ പരാമർശവും വിവാദമായിരുന്നു. ഇത് തന്റെ നിലപാടല്ലെന്ന് ടെക്സസ് ഗവർണർ ഗ്രെഗ് ആബട്ട് വ്യക്തമാക്കിയിരുന്നു. യാഥാസ്ഥിതിക രാഷ്ട്രീയ നിരീക്ഷകനായ ക്രിസ് റൂഫോ 'ദി ഇന്ത്യൻ ക്വസ്റ്റ്യൻ' എന്ന പേരിൽ പോഡ്കാസ്റ്റ് പരിപാടി അവതരിപ്പിച്ചതും വിവാദത്തിന് ആക്കം കൂട്ടി.

സാമൂഹിക മാധ്യമങ്ങളിലെ വിദ്വേഷപ്രചാരണങ്ങൾ അടുത്തിടെ നടന്ന ചില സംഭവങ്ങളുമായി ബന്ധപ്പെട്ട് ഇന്ത്യൻ അമേരിക്കൻ സമൂഹത്തിൽ ആശങ്ക വർധിപ്പിച്ചതായും നേതാക്കൾ ചൂണ്ടിക്കാട്ടുന്നു. ഇല്ലിനോയിയിലെ ഓറോറയിൽ ഹിന്ദു ക്ഷേത്രത്തിന് നേരെ ആക്രമണം നടത്താൻ പദ്ധതിയിട്ടെന്നാരോപിച്ച് ഒരാളെ അറസ്റ്റ് ചെയ്ത സംഭവവും വ്യോമിങ്ങിൽ സിഖ് ട്രക്ക് ഡ്രൈവർ ഗുർവിന്ദർ സിങ്ങിന് നേരെയുണ്ടായ കുത്തേറ്റ ആക്രമണവും ഇതിൽ ഉൾപ്പെടുന്നു.

'ഇല്ലിനോയിയിലെ സംഭവത്തിൽ വലിയൊരു ദുരന്തത്തെക്കുറിച്ച് നമുക്ക് സംസാരിക്കേണ്ടിവരുമായിരുന്നു,' ചിന്തൻ പട്ടേൽ പറഞ്ഞു.

ന്യൂജഴ്സിയിലെ ഏഴാം കോൺഗ്രസ് മണ്ഡലവും പെൻസിൽവാനിയയിലെ ഒന്നാം മണ്ഡലവും ഉൾപ്പെടെ ഇന്ത്യൻ അമേരിക്കൻ ജനസംഖ്യ കൂടുതലുള്ള മണ്ഡലങ്ങളിൽ തിരഞ്ഞെടുപ്പ് ഫലം നിർണായകമാകാമെന്നാണ് വിലയിരുത്തൽ. ജോർജിയ, മിഷിഗൺ തുടങ്ങിയ ചാഞ്ചാട്ട സംസ്ഥാനങ്ങളിലും ഇന്ത്യൻ അമേരിക്കൻ വോട്ടർമാരുടെ നിലപാട് പ്രധാനമാണ്.

ഇതിനിടെ, ഇന്ത്യൻ അമേരിക്കൻ കോൺഗ്രസ് അംഗം രാജാ കൃഷ്ണമൂർത്തി തിങ്കളാഴ്ച ജൂലൈ മാസത്തെ 'ഇന്ത്യൻ അമേരിക്കൻ പൈതൃക മാസമായി' പ്രഖ്യാപിക്കാനുള്ള പ്രമേയത്തിന് 256 അംഗങ്ങളുടെ ഉഭയകക്ഷി പിന്തുണ ലഭിച്ചതായി അറിയിച്ചു. പ്രമേയത്തെ പിന്തുണയ്ക്കുന്നതിൽ അഭിമാനമുണ്ടെന്ന് ഹിന്ദു അമേരിക്കൻ ഫൗണ്ടേഷനും വ്യക്തമാക്കി.