കുടിയേറ്റ നടപടികൾ സുഗമമാക്കുന്നതിനും ഇരുരാജ്യങ്ങളിലെയും ജനങ്ങൾക്ക് പരസ്പരം യാത്ര ചെയ്യാനും വിവിധ മേഖലകളിൽ അവസരങ്ങൾ പ്രയോജനപ്പെടുത്താനും കൂടുതൽ വഴികൾ കണ്ടെത്തുന്നതിനുമായി ഇന്ത്യയും കാനഡയും ആദ്യ ‘മൈഗ്രേഷൻ ആൻഡ് മൊബിലിറ്റി ഡയലോഗ്’ നടത്തി. തിങ്കളാഴ്ച ന്യൂഡൽഹിയിൽ നടന്ന ചർച്ചയിൽ കുടിയേറ്റം ഫലപ്രദമായി കൈകാര്യം ചെയ്യുന്നതും ജനങ്ങൾ തമ്മിലുള്ള ബന്ധം ശക്തിപ്പെടുത്തുന്നതുമാണ് പ്രധാന വിഷയങ്ങളായത്.

വിദേശകാര്യ മന്ത്രാലയത്തിലെ കോൺസുലർ, പാസ്‌പോർട്ട്, വിസ, ഓവർസീസ് ഇന്ത്യൻ അഫയേഴ്‌സ് വിഭാഗം സെക്രട്ടറി ശ്രീപ്രിയ രംഗനാഥനും കാനഡയിലെ ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് വിഭാഗം ഡെപ്യൂട്ടി മന്ത്രി ടെഡ് ഗാലിവനുമാണ് ചർച്ചയ്ക്ക് നേതൃത്വം നൽകിയത്.

നിയമാനുസൃതമായ കുടിയേറ്റത്തിനും യാത്രയ്ക്കുമുള്ള മാർഗങ്ങൾ പ്രോത്സാഹിപ്പിക്കുക, കുടിയേറ്റ നടപടികൾ കാര്യക്ഷമമായി കൈകാര്യം ചെയ്യുക തുടങ്ങിയ വിഷയങ്ങളാണ് ചർച്ചയുടെ കേന്ദ്രബിന്ദുവെന്ന് ഇന്ത്യൻ വിദേശകാര്യ മന്ത്രാലയം അറിയിച്ചു. വിസ, കോൺസുലർ സേവനങ്ങൾ, വിദ്യാർഥികൾക്കും തൊഴിലാളികൾക്കും മറ്റ് യാത്രക്കാർക്കുമുള്ള സഞ്ചാരസൗകര്യങ്ങൾ തുടങ്ങിയ മേഖലകൾ ഈ സഹകരണത്തിന്റെ പ്രസക്തമായ ഭാഗങ്ങളാണ്. എന്നാൽ ഇവയിൽ പ്രത്യേക തീരുമാനങ്ങളോ പുതിയ നയങ്ങളോ പ്രഖ്യാപിച്ചതായി മന്ത്രാലയത്തിന്റെ പ്രസ്താവനയിൽ വ്യക്തമാക്കിയിട്ടില്ല.

കുടിയേറ്റവും ജനങ്ങൾ തമ്മിലുള്ള ഇടപെടലുകളും ഇന്ത്യ–കാനഡ ബന്ധത്തിന്റെ ഭാവിവളർച്ചയ്ക്ക് നിർണായകമാകുമെന്ന് മന്ത്രാലയം വ്യക്തമാക്കി.

ഈ മാസം ആദ്യം കനേഡിയൻ വിദേശകാര്യ മന്ത്രി അനിത ആനന്ദ് പ്രധാനമന്ത്രി നരേന്ദ്ര മോദിയുമായും വിദേശകാര്യ മന്ത്രി എസ്. ജയശങ്കറുമായും നടത്തിയ കൂടിക്കാഴ്ചകളുടെ തുടർച്ചയായാണ് പുതിയ ചർച്ച. വ്യാപാരം, നിക്ഷേപം, സുരക്ഷ, സാങ്കേതികവിദ്യ, ഊർജം, വിദ്യാഭ്യാസം, ജനങ്ങൾ തമ്മിലുള്ള ബന്ധം എന്നിവയിൽ സഹകരണം വർധിപ്പിക്കുന്നതിനെക്കുറിച്ച് അന്ന് ചർച്ച ചെയ്തിരുന്നു.

2025 ജൂണിനുശേഷം ആനന്ദ് നടത്തുന്ന മൂന്നാമത്തെ ഇന്ത്യാ സന്ദർശനമാണിത്. ഇരുരാജ്യങ്ങളും തമ്മിലുള്ള നയതന്ത്രബന്ധം ശക്തിപ്പെടുത്തുന്നതിനും ജനങ്ങൾക്കും സ്ഥാപനങ്ങൾക്കും കൂടുതൽ അവസരങ്ങൾ സൃഷ്ടിക്കുന്നതിനുമുള്ള ശ്രമങ്ങളുടെ ഭാഗമായാണ് ആദ്യ കുടിയേറ്റ–സഞ്ചാര സംവാദം വിലയിരുത്തപ്പെടുന്നത്.