കൊച്ചി: മാസപ്പടി, ഹവാല ഇടപാടുകളുമായി ബന്ധപ്പെട്ട കേസിൽ അന്വേഷണത്തിന് നിർദേശം നൽകിയ സിംഗിൾ ബെഞ്ച് ഉത്തരവിന് അടിയന്തര സ്റ്റേ നൽകാൻ ഹൈക്കോടതി വിസമ്മതിച്ചു. ഉത്തരവിനെതിരെ പ്രതിപക്ഷ നേതാവ് പിണറായി വിജയൻ ഉൾപ്പെടെയുള്ളവർ സമർപ്പിച്ച അപ്പീൽ ഹർജികൾ ഫയലിൽ സ്വീകരിക്കണമോ എന്ന കാര്യത്തിൽ ഹൈക്കോടതി ഡിവിഷൻ ബെഞ്ച് വിധി പറയാൻ മാറ്റി. അപ്പീൽ സ്വീകരിക്കുന്നതിൽ ആദ്യം തീരുമാനമെടുത്ത ശേഷം മാത്രമേ സ്റ്റേ അടക്കമുള്ള കാര്യങ്ങൾ പരിഗണിക്കൂ എന്ന് കോടതി വ്യക്തമാക്കി. സിംഗിൾ ബെഞ്ച് നടപടികൾക്ക് അടിയന്തര സ്റ്റേ വേണമെന്നായിരുന്നു ഹർജിക്കാരുടെ ആവശ്യം.  

​അതേസമയം, ഹർജിയിലെ പിണറായി വിജയന്റെ വാദങ്ങളെ പൂർണമായും പിന്തുണയ്ക്കുന്ന നിലപാടാണ് സംസ്ഥാന സർക്കാർ കോടതിയിൽ സ്വീകരിച്ചത്. പ്രാഥമിക വിവരങ്ങളുടെ അടിസ്ഥാനത്തിൽ നേരിട്ട് കേസെടുക്കാൻ തക്കവിധം മതിയായ തെളിവുകൾ ഉണ്ടായിരുന്നില്ലെന്നും, ചില ഡയറി രേഖകൾ മാത്രമാണ് ലഭിച്ചതെന്നും സർക്കാർ ഹൈക്കോടതിയെ അറിയിച്ചു. ഇതുകൊണ്ടാണ് പ്രാഥമിക അന്വേഷണത്തിന് ഉത്തരവിട്ടതെന്നും ആ നിലപാടിൽ ഇപ്പോഴും മാറ്റമില്ലെന്നും അഡ്വക്കേറ്റ് ജനറൽ വ്യക്തമാക്കി. കൂടാതെ, പരാതിക്കാരനായ കെ.എം. ഷാജഹാൻ സത്യസന്ധനായ ഹർജിക്കാരനല്ലെന്നും സർക്കാർ വാദിച്ചു.  

​എന്നാൽ, പിണറായി വിജയനടക്കമുള്ളവരുടെ അപ്പീൽ ഹർജികളെ എൻഫോഴ്സ്മെന്റ് ഡയറക്ടറേറ്റ് (ഇ.ഡി) കോടതിയിൽ ശക്തമായി എതിർത്തു. കേസിലെ പ്രതികൾക്ക് സിംഗിൾ ബെഞ്ചിന്റെ അന്വേഷണ ഉത്തരവിനെതിരെ എങ്ങനെ അപ്പീൽ നൽകാൻ കഴിയുമെന്ന നിയമപ്രശ്നമാണ് ഇ.ഡി ഉന്നയിച്ചത്. അപ്പീൽ ഫയലിൽ സ്വീകരിക്കാൻ അനുമതി നൽകുന്നതിനെച്ചൊല്ലി ഇരുവിഭാഗത്തിന്റെയും വിശദമായ വാദങ്ങൾ കേട്ട ശേഷമാണ് കോടതി ഉത്തരവ് പറയാൻ മാറ്റിവെച്ചത്.