വധശിക്ഷ അസ്വീകാര്യമാണെന്നു ലിയോ പതിന്നാലാമൻ മാർപാപ്പ ശനിയാഴ്ച്ച പ്രഖ്യാപിച്ചു. സ്വന്തം നാടായ അമേരിക്കയിൽ ഫയറിംഗ് സ്‌ക്വാഡ് നടപ്പാക്കുന്ന വധശിക്ഷ സംപ്രേക്ഷണം ചെയ്യുന്നതിനെതിരെ വിമർശനം ഉയരുമ്പോഴാണ് വധശിക്ഷ മനുഷ്യന്റെ അന്തസിനെ ഇല്ലായ്മ ചെയ്യുന്നതെന്ന നിലയ്ക്ക് അസ്വീകാര്യമാണെന്നു പോപ്പ് ലിയോ പറഞ്ഞത്.

ഫ്രാൻസിസ് മാർപാപ്പ വധശിക്ഷയെ കുറിച്ചു ഉയർത്തിപ്പിച്ച വാദം തന്നെയാണ് ലിയോ പതിന്നാലാമനും എടുത്തുകാട്ടിയത്.

വധശിക്ഷ കൂടാതെ തന്നെ പൊതുനന്മ കാത്തു സൂക്ഷിക്കയും നീതിയുടെ ആവശ്യങ്ങൾ നടപ്പാക്കുകയും ചെയ്യാമെന്നു പാപ്പാ ചൂണ്ടിക്കാട്ടി. #NoDeathPenalty എന്ന ഹാഷ്ടാഗിലാണ് പോസ്റ്റ് അവസാനിക്കുന്നത്. വധശിക്ഷയ്‌ക്കെതിരായ ആഗോള ദിനമായിരുന്നു ശനിയാഴ്ച്ച.

ടെക്സസിലെ ഫോർട്ട് ഹുഡിൽ 13 പേരെ വെടിവച്ചു കൊന്ന പലസ്തീൻ വംശജൻ നിദാൽ ഹസന്റെ വധശിക്ഷ ഡിസംബർ 3നു ഫയറിംഗ് സ്‌ക്വാഡ് നടപ്പാക്കുമ്പോൾ അതു ലൈവായി സംപ്രേക്ഷണം ചെയ്യുമെന്നു ഡിഫൻസ് സെക്രട്ടറി പീറ്റ് ഹേഗ്സേഥ് അറിയിച്ചിരുന്നു. എന്നാൽ തീരുമാനം എടുത്തില്ല എന്നാണ് പ്രസിഡന്റ് ട്രംപ് പറഞ്ഞത്. സംപ്രേക്ഷണം കാണാൻ ഉദ്ദേശിക്കുന്നില്ലെന്നു കത്തോലിക്കാ വിശ്വാസിയായ വൈസ് പ്രസിഡന്റ് ജെ ഡി വാൻസ്‌ പറഞ്ഞു.

പാപ്പാ അക്കാര്യം പരാമർശിച്ചില്ല. ടെന്നസിയിൽ വധശിക്ഷ നടപ്പാക്കാൻ മരുന്നു കുത്തിവച്ചതു പരാജയമായ കാര്യവും അദ്ദേഹം സൂചിപ്പിച്ചില്ല.

എന്നാൽ വത്തിക്കാൻ സെക്രട്ടറി ഓഫ് സ്റ്റേറ്റ് കാർഡിനൽ പിയെട്രോ പരോളിൻ യുഎസ് പരസ്യമായി വധശിക്ഷ നടപ്പാക്കാൻ തീരുമാനിച്ചതിനെ അപലപിച്ചു. അത് അസ്വീകാര്യമാണെന്നു മാർപാപ്പയുടെ ഉന്നത സഹായി പറഞ്ഞു. "മനസിലാക്കാൻ കഴിയുന്നില്ല," അദ്ദേഹം പറഞ്ഞു. "മരണം ആഘോഷമാക്കുന്നത് സ്വീകരിക്കാൻ കഴിയുന്നില്ല."  

വധശിക്ഷയെ സഭ പൂർണമായും എതിർക്കുന്നുവെന്നു അദ്ദേഹം ചൂണ്ടിക്കാട്ടി. "ഈ കാലത്തു അതു നടപ്പാക്കാൻ ആരെങ്കിലും തുനിയുന്നത് തന്നെ വിശ്വസിക്കാൻ കഴിയുന്നില്ല. കുറ്റവാളിയെ ശിക്ഷിക്കാൻ വേറെയും മാർഗങ്ങളുണ്ട്."

പെന്റഗൺ നടത്തുന്ന നീക്കത്തിൽ യുഎസ് ബിഷപ്‌സ് കോൺഫറൻസ് മേധാവി ആർച്ച്ബിഷപ് പോൾ കോക്‌ലി ഞെട്ടൽ പ്രകടിപ്പിച്ചു. "അതീവ ദുഖകരം," അദ്ദേഹം പറഞ്ഞു. "ഹസൻ ചെയ്ത കുറ്റം ഒരു തരത്തിലും ക്ഷമിക്കാൻ കഴിയുന്നതല്ല. പക്ഷെ ഈ തീരുമാനം പ്രാകൃതമായ മരണത്തിന്റെ സംസ്കാരത്തെ വളർത്തുന്നതാണ്. അതിൽ  പുനരാലോചന ആവശ്യമാണ്."  

Pope calls death penalty unacceptable