മലപ്പുറം: മലപ്പുറം ജില്ലയെക്കുറിച്ച് വിവാദ പരാമർശവുമായി മുൻ എം.എൽ.എയും സി.പി.എം നേതാവുമായ പി. നന്ദകുമാർ. മലപ്പുറം മതമൗലിക വർഗീയവാദികളുടെ കൂടാണെന്നും കമ്യൂണിസ്റ്റ് പാർട്ടി മതനിരപേക്ഷ പ്രസ്ഥാനമാണെന്നുമായിരുന്നു അദ്ദേഹത്തിന്റെ പ്രസ്താവന. സി.പി.എം വിപുലീകൃത ജില്ലാ കമ്മിറ്റി യോഗത്തിലെ സ്വാഗതസംഘം പ്രസംഗത്തിലാണ്, പ്രതിപക്ഷ നേതാവ് പിണറായി വിജയനടക്കമുള്ള മുതിർന്ന നേതാക്കളെ വേദിയിലിരുത്തി നന്ദകുമാറിന്റെ വിവാദ പ്രസംഗം. പാർട്ടി മലപ്പുറത്ത് നേരിട്ട കനത്ത രാഷ്ട്രീയ തിരിച്ചടിയും ന്യൂനപക്ഷ അകൽച്ചയും ചർച്ച ചെയ്യുന്ന വേദിയിൽ ഉയർന്ന ഈ പരാമർശം വരും ദിവസങ്ങളിൽ രാഷ്ട്രീയ വിവാദങ്ങൾക്ക് തിരികൊളുത്തും.

​നിയമസഭാ തെരഞ്ഞെടുപ്പിൽ ജില്ലയിൽ പാർട്ടി നേരിട്ട കനത്ത പരാജയം യോഗത്തിൽ നേതൃത്വത്തിനെതിരായ രൂക്ഷവിമർശനങ്ങൾക്ക് വഴിവെച്ചു. പാർട്ടിയുടെ പരമ്പരാഗത സ്വാധീന മേഖലയായ പൊന്നാനി ഉൾപ്പെടെ കൈവിട്ടുപോയതിൽ പ്രാദേശികമായി ശക്തമായ അമർഷമുണ്ട്. സ്ഥാനാർത്ഥി നിർണയത്തിലെ പിഴവുകളും മുൻമന്ത്രി വി. അബ്ദുറഹ്മാൻ മണ്ഡലം മാറി മത്സരിച്ചതും താഴെത്തട്ടിലുള്ള പ്രവർത്തകരിൽ അതൃപ്തി ഉണ്ടാക്കിയെന്ന് യോഗത്തിൽ വിമർശനം ഉയർന്നു. കായികപ്രേമികൾക്കിടയിൽ ചർച്ചയായ മെസ്സിയുടെ പേരിലെ തട്ടിപ്പ് അടക്കമുള്ള വിഷയങ്ങളും സമിതിയിൽ ചർച്ചയാകുമെന്നാണ് സൂചന. ജില്ലയിൽ ന്യൂനപക്ഷ വിഭാഗങ്ങൾക്കിടയിൽ പാർട്ടിക്കുണ്ടായ വിശ്വാസനഷ്ടം ഗൗരവത്തോടെയാണ് സി.പി.എം വിലയിരുത്തുന്നത്.

​ന്യൂനപക്ഷങ്ങളുടെ വിശ്വാസം തിരിച്ചുപിടിക്കാനുള്ള തന്ത്രങ്ങൾ മെനയുന്നതിനൊപ്പം സംഘടനാ സംവിധാനം ശക്തിപ്പെടുത്താനുള്ള നടപടികളും സമിതി ആലോചിക്കുന്നുണ്ട്. പാർട്ടി അംഗത്വം സ്വീകരിച്ച മുൻ മന്ത്രിമാരായ കെ.ടി. ജലീൽ, വി. അബ്ദുറഹ്മാൻ എന്നിവരെ ജില്ലാ കമ്മിറ്റിയിലേക്ക് കൊണ്ടുവന്നേക്കുമെന്നാണ് റിപ്പോർട്ട്. അതേസമയം, സമ്മേളനം ഉദ്ഘാടനം ചെയ്ത പ്രതിപക്ഷ നേതാവ് പിണറായി വിജയൻ, തെരഞ്ഞെടുപ്പിലെ തിരിച്ചടി കണ്ട് പാർട്ടിയെ ആർക്കും എഴുതിത്തള്ളാനാകില്ലെന്ന് വ്യക്തമാക്കി. ഉപതെരഞ്ഞെടുപ്പിലെ മുന്നേറ്റം പാർട്ടിയുടെ തിരിച്ചുവരവിന്റെ തെളിവാണെന്നും നിയമസഭാ തെരഞ്ഞെടുപ്പ് പരാജയത്തിന്റെ യഥാർത്ഥ വസ്തുതകൾ വിശദമായി പരിശോധിച്ചു തിരുത്തൽ നടപടികൾ സ്വീകരിക്കുമെന്നും അദ്ദേഹം കൂട്ടിച്ചേർത്തു.