'നേതാക്കളുടെ വാക്കുകളിലും പ്രവര്‍ത്തനങ്ങളിലും ജാഗ്രത വേണം, പൊതുപ്രസംഗങ്ങള്‍ക്ക് രാഷ്ട്രീയ മൂര്‍ച്ച വേണം, മാധ്യമങ്ങളുമായുള്ള ഇടപെടലില്‍ കൂടുതല്‍ കരുതല്‍ പുലര്‍ത്തണം...' സി.പി.എം വിപുലീകൃത സംസ്ഥാന കമ്മിറ്റി യോഗത്തില്‍ അവതരിപ്പിച്ച തിരുത്തല്‍ രേഖ മുന്നോട്ടുവയ്ക്കുന്ന പ്രധാന സന്ദേശങ്ങള്‍ പാര്‍ട്ടിയുടെ ആശയവിനിമയ രീതിയില്‍ തന്നെ മാറ്റം വേണമെന്നതിലേക്കാണ് വിരല്‍ചൂണ്ടുന്നത്. സംഘടനാ ദൗര്‍ബല്യങ്ങള്‍ക്കൊപ്പം ജനങ്ങളിലേക്കും മാധ്യമങ്ങളിലേക്കും പാര്‍ട്ടി ആശയം എത്തിക്കുന്ന രീതിയിലും വീഴ്ച സംഭവിച്ചുവെന്ന ആത്മപരിശോധനയാണ് രേഖയിലുള്ളത്.

യോഗങ്ങളിലും മാധ്യമങ്ങളോടുള്ള ഇടപെടലുകളിലും ചില നേതാക്കള്‍ വേണ്ടത്ര ജാഗ്രത കാണിക്കുന്നില്ലെന്നാണ് രേഖയിലെ വിമര്‍ശനം. തങ്ങളുടെ വാക്കുകളും പ്രവര്‍ത്തനങ്ങളും നിരന്തരം റെക്കോര്‍ഡ് ചെയ്യപ്പെടുന്ന കാലമാണെന്ന യാഥാര്‍ഥ്യം നേതാക്കള്‍ മറക്കരുതെന്ന മുന്നറിയിപ്പും രേഖ നല്‍കുന്നു. ഒരു പ്രസംഗത്തിലെ ചെറിയ പിഴവ് പോലും നിമിഷങ്ങള്‍ക്കകം സാമൂഹിക മാധ്യമങ്ങളിലൂടെ വ്യാപിക്കുന്ന പുതിയ രാഷ്ട്രീയ സാഹചര്യത്തിലാണ് ഈ നിര്‍ദേശം ഏറെ പ്രസക്തമാകുന്നത്.

പൊതുയോഗങ്ങളിലെ പ്രസംഗരീതിക്കും പാര്‍ട്ടി രേഖയില്‍ വിമര്‍ശനമുണ്ട്. നീണ്ടുപരന്ന പ്രസംഗങ്ങള്‍ കേള്‍വിക്കാരില്‍ വിരസതയുണ്ടാക്കുമെന്നും അതിനുപകരം ലക്ഷ്യബോധവും രാഷ്ട്രീയ മൂര്‍ച്ചയും ഉള്ള അവതരണരീതിയാണ് വേണ്ടതെന്നും രേഖ ചൂണ്ടിക്കാട്ടുന്നു. എതിരാളികളെ തിരിച്ചറിഞ്ഞ് രാഷ്ട്രീയമായി ആക്രമിക്കുന്നതിലും പാര്‍ട്ടിക്ക് വേണ്ടത്ര മൂര്‍ച്ചയില്ലെന്ന വിലയിരുത്തലും ഇതോടൊപ്പം ഉയരുന്നു. അതായത്, എന്ത് പറയണം എന്നതിലുപരി എങ്ങനെ പറയണം എന്നതും സി.പി.എം ഗൗരവമായി ആലോചിക്കേണ്ട ഘട്ടത്തിലെത്തിയെന്നാണ് തിരുത്തല്‍ രേഖ വ്യക്തമാക്കുന്നത്.

റിപ്പോര്‍ട്ടില്‍ നേതൃത്വത്തിനെതിരായ വിമര്‍ശനങ്ങള്‍ ഉണ്ടെങ്കിലും ആരുടേയും പേര് കേന്ദ്രീകരിച്ചുള്ള വിമര്‍ശനം രേഖപ്പെടുത്തിയിട്ടില്ല. പാര്‍ട്ടിയുടെ സംഘടനാ സംവിധാനത്തിലും പ്രവര്‍ത്തന രീതിയിലുമുള്ള പോരായ്മകളാണ് പൊതുവില്‍ ചൂണ്ടിക്കാട്ടുന്നത്. പാര്‍ട്ടി അനുഭാവികളുടെ വിവിധ ഫോറങ്ങളുടെ പ്രവര്‍ത്തനവും പ്രതീക്ഷിച്ച നിലവാരത്തിലല്ലെന്നാണ് രേഖയിലെ വിലയിരുത്തല്‍. ജനാധിപത്യ കേന്ദ്രീകരണവും ഉള്‍പ്പാര്‍ട്ടി ജനാധിപത്യവുമാണ് പാര്‍ട്ടിയുടെ ശക്തിയെന്ന് ഓര്‍മ്മിപ്പിക്കുന്ന രേഖ, ഈ അടിസ്ഥാന സംഘടനാതത്വങ്ങള്‍ ശരിയായ രീതിയില്‍ പ്രയോഗിക്കാന്‍ കഴിയണമെന്നും ആവശ്യപ്പെടുന്നു.

ഇതോടെ തിരുത്തല്‍ രേഖ കേവലം തിരഞ്ഞെടുപ്പ് പരാജയത്തിന്റെ കാരണങ്ങള്‍ അന്വേഷിക്കുന്ന രേഖയല്ലെന്നും സംഘടനയ്ക്കുള്ളിലെ പ്രവര്‍ത്തനരീതിയെ തന്നെ പുനഃപരിശോധിക്കാനുള്ള ശ്രമമാണെന്നും വ്യക്തമാകുന്നു. ഇതിനിടെ, സംസ്ഥാന കമ്മിറ്റിയിലെ ചര്‍ച്ചകളെക്കുറിച്ചുള്ള മാധ്യമവാര്‍ത്തകള്‍ക്ക് മറുപടിയുമായി സംസ്ഥാന സെക്രട്ടറി എം.വി. ഗോവിന്ദനും രംഗത്തെത്തി. വിമര്‍ശനങ്ങള്‍ ഉയര്‍ന്നത് അസാധാരണ സംഭവമെന്ന രീതിയിലാണ് മാധ്യമങ്ങള്‍ അവതരിപ്പിക്കുന്നതെന്നായിരുന്നു അദ്ദേഹത്തിന്റെ പ്രതികരണം. സി.പി.എം സംസ്ഥാന കമ്മിറ്റി യോഗങ്ങളില്‍ വിമര്‍ശനവും സ്വയംവിമര്‍ശനവും സ്വാഭാവികമാണെന്നും ഇത്തവണയും തിരുത്തല്‍ പ്രക്രിയയ്ക്ക് സഹായകരമായ ആരോഗ്യകരമായ ചര്‍ച്ചയാണ് നടന്നതെന്നും ഗോവിന്ദന്‍ പറഞ്ഞു. തനിക്കെതിരെയും വിമര്‍ശനം ഉയര്‍ന്നതായി അദ്ദേഹം തുറന്നുപറഞ്ഞു.

പാര്‍ട്ടി വിദ്യാഭ്യാസത്തിനായി പ്രത്യേക ആപ്പുകള്‍ വേണമെന്ന നിര്‍ദേശവും പഠന-ഗവേഷണ കേന്ദ്രങ്ങളെ ശക്തിപ്പെടുത്തണമെന്ന ആവശ്യവും നവമാധ്യമ രംഗത്ത് കൂടുതല്‍ സജീവമായി ഇടപെടണമെന്ന ചര്‍ച്ചയും ഇതിന്റെ ഭാഗമായാണ് കാണേണ്ടത്. പാര്‍ട്ടിയുടെ പരമ്പരാഗത സംഘടനാ സംവിധാനത്തിനൊപ്പം ഡിജിറ്റല്‍ കാലത്തിന്റെ ആശയവിനിമയ സാധ്യതകളെ കൂടി ഉപയോഗപ്പെടുത്താനുള്ള നീക്കമാണിത്. എന്നാല്‍ ആപ്പുകളും നവമാധ്യമ ഇടപെടലുകളും കൊണ്ട് മാത്രം ജനങ്ങളുമായുള്ള അകലം പരിഹരിക്കാനാകുമോ എന്നതാണ് സി.പി.എമ്മിന് മുന്നിലുള്ള അടിസ്ഥാന ചോദ്യം. ജനങ്ങളുടെ ജീവിതപ്രശ്‌നങ്ങളുമായി പാര്‍ട്ടിയുടെ രാഷ്ട്രീയ ഇടപെടല്‍ എത്രത്തോളം ബന്ധപ്പെടുന്നു എന്നതായിരിക്കും അതിന്റെ യഥാര്‍ത്ഥ മാനദണ്ഡം.

പാര്‍ട്ടി പ്രവര്‍ത്തകര്‍ക്ക് രാഷ്ട്രീയ-പ്രത്യയശാസ്ത്ര വിഷയങ്ങളില്‍ സംശയങ്ങളുണ്ടാകുമ്പോള്‍ ഉടന്‍ മറുപടി ലഭിക്കുന്ന തരത്തില്‍ പ്രത്യേക മൊബൈല്‍, വെബ് ആപ്ലിക്കേഷനുകള്‍ വികസിപ്പിക്കണമെന്ന നിര്‍ദേശമാണ് പ്രധാനമായും ഉയര്‍ന്നത്. എന്നാല്‍ ആപ്പ് വികസിപ്പിക്കാനുള്ള നിര്‍ദേശം കേവലം സാങ്കേതിക നവീകരണത്തിന്റെ ഭാഗമെന്നതിലുപരി, സി.പി.എമ്മിന്റെ സംഘടനാ-വൈചാരിക രംഗത്തെ ആഴത്തിലുള്ള പ്രതിസന്ധിയുടെ സൂചനയായും കാണേണ്ടിവരും. പാര്‍ട്ടി കേന്ദ്ര കമ്മിറ്റി തയ്യാറാക്കിയ നിയമസഭാ തിരഞ്ഞെടുപ്പ് അവലോകന റിപ്പോര്‍ട്ട് തന്നെ വര്‍ഗ-ബഹുജന സംഘടനകള്‍ക്കിടയില്‍ രാഷ്ട്രീയവല്‍ക്കരണം വേണ്ടത്ര നടന്നില്ലെന്നും രാഷ്ട്രീയ വിഷയങ്ങള്‍ ജനങ്ങളിലേക്കെത്തിക്കാന്‍ കഴിവുള്ള സഖാക്കളുടെ എണ്ണം കുറഞ്ഞുവരുകയാണെന്നും ചൂണ്ടിക്കാട്ടുന്നു. ഇത് പാര്‍ട്ടിയുടെ പ്രധാന സംഘടനാ ദൗര്‍ബല്യങ്ങളിലൊന്നായാണ് റിപ്പോര്‍ട്ട് വിലയിരുത്തുന്നത്.

കമ്മ്യൂണലിസത്തിനെതിരെ നിരവധി രാഷ്ട്രീയ ക്ലാസുകള്‍ സംഘടിപ്പിച്ചിട്ടും അതിനെ ജനങ്ങളുടെ രാഷ്ട്രീയ ബോധ്യമായി മാറ്റാന്‍ പാര്‍ട്ടിക്ക് കഴിഞ്ഞില്ലെന്ന വിലയിരുത്തലും ശ്രദ്ധേയമാണ്. അതായത്, ക്ലാസ് മുറികളിലും പാര്‍ട്ടി യോഗങ്ങളിലും ആശയങ്ങള്‍ ആവര്‍ത്തിക്കുന്നതുകൊണ്ട് മാത്രം ജനമനസ്സില്‍ രാഷ്ട്രീയ ബോധം സൃഷ്ടിക്കാനാകുന്നില്ലെന്ന തിരിച്ചറിവാണ് ഇവിടെ പ്രകടമാകുന്നത്. നിയമസഭാ തിരഞ്ഞെടുപ്പിലെ ദയനീയ പ്രകടനത്തിന്റെ പശ്ചാത്തലത്തിലാണ് മൂന്നുദിവസത്തെ വിപുലീകരിച്ച സംസ്ഥാന കമ്മിറ്റി യോഗം കോഴിക്കോട്ട് നടക്കുന്നത്. സംഘടനാപരവും രാഷ്ട്രീയപരവുമായ ദൗര്‍ബല്യങ്ങള്‍ പരിഹരിച്ച് പാര്‍ട്ടിയെ പുനരുജ്ജീവിപ്പിക്കുകയാണ് യോഗത്തിന്റെ പ്രധാന ലക്ഷ്യം. എന്നാല്‍ തുറന്ന ചര്‍ച്ചയില്‍ പാര്‍ട്ടി നേതൃത്വത്തിനെതിരെ ശക്തമായ വിമര്‍ശനങ്ങളാണ് ഉയര്‍ന്നതെന്നാണ് റിപ്പോര്‍ട്ട്.

വിവിധ ജില്ലകളില്‍ നിന്നുള്ള പ്രതിനിധികള്‍ സംഘടനാ ദൗര്‍ബല്യങ്ങള്‍ പരിഹരിക്കുന്നതിന് കൂടുതല്‍ ശക്തമായ തിരുത്തല്‍ നടപടികള്‍ ആവശ്യപ്പെട്ടതായും നിയമസഭാ തിരഞ്ഞെടുപ്പിലെ പരാജയത്തിന്റെ ഉത്തരവാദിത്വം നേതൃത്വത്തിനും ഉണ്ടെന്ന നിലപാട് ഉയര്‍ന്നതായും റിപ്പോര്‍ട്ട് സൂചിപ്പിക്കുന്നു. സംസ്ഥാന സെക്രട്ടറി എം.വി. ഗോവിന്ദന്‍ തന്നെ തുറന്ന ചര്‍ച്ചയില്‍ കടുത്ത വിമര്‍ശനങ്ങള്‍ ഉയര്‍ന്നതായി സമ്മതിച്ചുവെന്നത് കാര്യങ്ങളുടെ ഗൗരവം വ്യക്തമാക്കുന്നു. ഇതോടെ 'താഴെത്തട്ടിലെ പ്രവര്‍ത്തകരുടെ വീഴ്ച' എന്ന പതിവ് വിശദീകരണത്തിനപ്പുറം നേതൃത്വത്തിന്റെ രാഷ്ട്രീയ തീരുമാനങ്ങളും പ്രവര്‍ത്തനശൈലിയും പാര്‍ട്ടിക്കുള്ളില്‍ തന്നെ ചോദ്യം ചെയ്യപ്പെടുന്ന അവസ്ഥയാണോ രൂപപ്പെടുന്നതെന്ന ചോദ്യം ഉയരുന്നു.

മതനിരപേക്ഷ രാഷ്ട്രീയത്തിന്റെ ഉള്ളടക്കവും ചര്‍ച്ചയില്‍ പ്രധാനമായി. വിശ്വാസികളെ ഒഴിവാക്കി വര്‍ഗീയതയ്‌ക്കെതിരായ പോരാട്ടം സാധ്യമല്ലെന്ന നിലപാട് പ്രതിനിധികള്‍ മുന്നോട്ടുവച്ചു. എല്ലാ ആഘോഷങ്ങളെയും എല്ലാ ജനവിഭാഗങ്ങളുടേതുമാക്കി മാറ്റാനുള്ള ഇടപെടലുകള്‍ വേണമെന്ന നിര്‍ദേശവും ഉയര്‍ന്നു. കേന്ദ്രസര്‍ക്കാര്‍ നയങ്ങള്‍ക്കും അവ നടപ്പാക്കുന്ന കേരള സര്‍ക്കാരിന്റെ സമീപനങ്ങള്‍ക്കുമെതിരെ പ്രതിരോധം ശക്തിപ്പെടുത്തുന്നതും കേന്ദ്ര ഏജന്‍സികള്‍ക്കെതിരെ ദേശീയതലത്തില്‍ പൊതുവേദി രൂപപ്പെടുത്തുന്നതും ചര്‍ച്ചയായി. അനധികൃത സ്വത്ത് സമ്പാദനത്തില്‍ പാര്‍ട്ടി ഇടപെടുമെന്നും സംസ്ഥാന സെക്രട്ടറി വ്യക്തമാക്കി. ഇങ്ങനെ നോക്കുമ്പോള്‍, കോഴിക്കോട് നടന്ന ചര്‍ച്ചകളില്‍ സി.പി.ഐ.എം. ഒരേസമയം സംഘടനയെയും പ്രസംഗശൈലിയെയും മാധ്യമ ഇടപെടലിനെയും പാര്‍ട്ടി വിദ്യാഭ്യാസത്തെയും ജനങ്ങളുമായുള്ള ബന്ധത്തെയും രാഷ്ട്രീയ നിലപാടുകളെയും പുനഃപരിശോധിക്കുകയാണ്.