മലയാള സിനിമയുടെ പ്രിയതാരങ്ങളായ മമ്മൂട്ടി, മോഹന്‍ലാല്‍, ലാലു അലക്‌സ് എന്നിവര്‍ ഒന്നിച്ചുള്ള ഒരു ചിത്രമാണ് ഇപ്പോള്‍ സോഷ്യല്‍ മീഡിയയില്‍ ശ്രദ്ധ നേടുന്നത്. വര്‍ഷങ്ങള്‍ക്ക് ശേഷമാണ് മൂവരും ഒരുമിച്ച് ഒരു ഫോട്ടോയ്ക്ക് മുന്നിലെത്തുന്നത്. ചിത്രത്തോടൊപ്പം ലാലു അലക്‌സ് എഴുതിയ വാക്കുകള്‍ ശ്രദ്ധ നേടുന്നുണ്ട്.

'മമ്മൂട്ടി, മോഹന്‍ലാല്‍, ലാലു അലക്‌സ് - ഇങ്ങനെ ഞങ്ങള്‍ മൂന്ന് പേരും ഒന്നിച്ചുള്ള ഒരു ഫോട്ടോ കുറേ കാലങ്ങള്‍ക്കു ശേഷമാണ് കിട്ടുന്നത്. ആ ചിത്രം കാണുമ്പോള്‍ പലതും പലതും ഓര്‍മയില്‍ വരുന്നു. പറഞ്ഞറിയിക്കാനാകാത്ത ഒരു വലിയ സന്തോഷത്തിന്റെ ഫീല്‍... ഞങ്ങള്‍ അങ്ങോട്ടും ഇങ്ങോട്ടും ''എടാ... പോടാ...' എന്ന് വിളിക്കുന്ന അത്രയും ആത്മബന്ധമുള്ള സൗഹൃദമാണ് വര്‍ഷങ്ങളായി കാത്തുസൂക്ഷിക്കുന്നത്. ഒരുമിച്ച് നിരവധി സിനിമകളില്‍ അഭിനയിച്ചു, ഒരുപാട് കഥാപാത്രങ്ങളും ഓര്‍മകളും പങ്കുവച്ചു. ആ ബന്ധം ഇന്നും അതേ സ്‌നേഹത്തോടെ മുന്നോട്ട് പോകുന്നു. മോഹന്‍ലാലിനൊപ്പമുള്ള അതിമനോഹരം എന്ന സിനിമ വരെ എത്തിനില്‍ക്കുകയാണ് ഈ സൗഹൃദത്തിന്റെ യാത്ര,' ലാലു അലക്‌സ് കുറിച്ചു.

മമ്മൂട്ടിക്കും മോഹന്‍ലാലിനുമൊപ്പം നിരവധി ചിത്രങ്ങളില്‍ ലാലു അലക്‌സ് അഭിനയിച്ചിട്ടുണ്ട്. നിരവധി പേരാണ് പോസ്റ്റിന് താഴെ കമന്റുകളുമായെത്തുന്നത്. കാലം എത്ര കടന്നുപോയാലും ചില സൗഹൃദങ്ങള്‍ക്ക് മാത്രം പ്രായമാകില്ല... 'എടാ... പോടാ...' എന്ന വിളികളില്‍ പോലും നിറഞ്ഞുനില്‍ക്കുന്ന ആ ആത്മബന്ധം തന്നെയാണ് ഈ ചിത്രത്തിന്റെ ഏറ്റവും വലിയ സൗന്ദര്യം, ഒത്തിരി സന്തോഷം ലാലുച്ചായാ ഇങ്ങനെ ഒരു ഫോട്ടോ വളരെ നാളുകള്‍ക്കു ശേഷം കണ്ടതില്‍...എന്നിങ്ങനെ പോകുന്നു കമന്റുകള്‍.