ബിഗ് ബോസ് തമിഴ്, തെലുങ്ക്, കന്നഡ, മലയാളം പതിപ്പുകളുടെ സെപ്റ്റംബര്‍ 6-ലെ പ്രീമിയറിന് മുന്നോടിയായി വിജയ് സേതുപതി, നാഗാര്‍ജുന, കിച്ച സുദീപ്, മോഹന്‍ലാല്‍ എന്നിവര്‍ ഒരുമിച്ചെത്തുന്ന പുതിയ പ്രമോ ജിയോസ്റ്റാറില്‍ 
നാല് സൂപ്പര്‍സ്റ്റാറുകള്‍. നാല് ബിഗ് ബോസ് വീടുകള്‍. ഒരു ആവേശകരമായ കൗണ്ട്ഡൗണ്‍.

ബിഗ് ബോസ് തമിഴ്, തെലുങ്ക്, കന്നഡ, മലയാളം പതിപ്പുകളുടെ അവതാരകരായ വിജയ് സേതുപതി, നാഗാര്‍ജുന, കിച്ച സുദീപ്, മോഹന്‍ലാല്‍ എന്നിവര്‍ ഒരുമിച്ചെത്തുന്ന പുതിയ പ്രമോ ജിയോസ്റ്റാര്‍ പുറത്തിറക്കി. നാല് പതിപ്പുകളുടെയും പുതിയ സീസണുകള്‍ 2026 സെപ്റ്റംബര്‍ 6-ന് ഒരേസമയം പ്രീമിയര്‍ ചെയ്യുന്നതിന് മുന്നോടിയായാണ് ഈ പ്രത്യേക പ്രമോ പുറത്തിറക്കിയത്.

ദക്ഷിണേന്ത്യയിലെ ബിഗ് ബോസ് ആരാധകര്‍ക്ക് ആവേശം പകരുന്ന ഈ പ്രമോയില്‍ ഫ്രാഞ്ചൈസിയുടെ ഏറ്റവും ജനപ്രിയരായ നാല് താരങ്ങള്‍ ഒരുമിച്ചെത്തുന്നു. തങ്ങളുടെ അതത് ഭാഷാ പതിപ്പുകളിലൂടെ പ്രേക്ഷകരുമായി ശക്തമായ ബന്ധം സ്ഥാപിച്ചിട്ടുള്ളവരാണ് വിജയ് സേതുപതി, നാഗാര്‍ജുന, കിച്ച സുദീപ്, മോഹന്‍ലാല്‍. നാല് അവതാരകരും ഒരേ സ്‌ക്രീനില്‍ എത്തുന്നതിലൂടെ അവരുടെ ആരാധകവൃന്ദങ്ങളെയും ഒരുമിപ്പിക്കുന്ന അപൂര്‍വമായൊരു ക്രോസ്ഓവര്‍ മുഹൂര്‍ത്തത്തിനാണ് പ്രമോ സാക്ഷ്യം വഹിക്കുന്നത്.

നാല് സംസ്ഥാനങ്ങളുടെയും വിപണികളുടെയും സംസ്‌കാരങ്ങളെ രസകരമായി ആഘോഷിക്കുന്നതാണ് പ്രമോയുടെ പ്രധാന ആകര്‍ഷണം. പുതിയ സീസണുകളെക്കുറിച്ചുള്ള ആവേശത്തിനിടയില്‍, പരസ്പരം സംസ്ഥാനങ്ങളില്‍ നിന്നുള്ള ഭക്ഷണവുമായി ബന്ധപ്പെട്ട രസകരമായ ഒരു ആശയക്കുഴപ്പത്തില്‍ അവതാരകര്‍ അകപ്പെടുന്നതാണ് പ്രമോയുടെ പ്രമേയം. നര്‍മ്മത്തിനൊപ്പം ദക്ഷിണേന്ത്യയുടെ വൈവിധ്യമാര്‍ന്ന സംസ്‌കാരത്തെയും ഇത് മനോഹരമായി അവതരിപ്പിക്കുന്നു.

വര്‍ഷങ്ങളായി ബിഗ് ബോസ് അനുഭവത്തിന്റെ അവിഭാജ്യ ഘടകങ്ങളായി മാറിയവരാണ് നാല് അവതാരകരും. അവരുടെ നര്‍മ്മം, നിരീക്ഷണങ്ങള്‍, ഇടപെടലുകള്‍, വാരാന്ത്യ സംഭാഷണങ്ങള്‍ എന്നിവ ഓരോ സീസണിലെയും ഏറ്റവും കൂടുതല്‍ കാത്തിരിക്കുന്ന ഘടകങ്ങളാണ്. പലപ്പോഴും ഇവ ബിഗ് ബോസ് വീടിന് പുറത്തും വലിയ ചര്‍ച്ചകള്‍ക്ക് വഴിയൊരുക്കാറുണ്ട്. നാല് അവതാരകരെയും ഒരൊറ്റ പ്രമോയില്‍ ഒരുമിച്ച് എത്തിക്കുന്നതിലൂടെ തമിഴ്, തെലുങ്ക്, കന്നഡ, മലയാളം പ്രേക്ഷകര്‍ക്കായി വ്യത്യസ്തമായൊരു ക്രോസ്ഓവര്‍ അനുഭവമാണ് ഒരുക്കുന്നത്.
ജിയോസ്റ്റാര്‍, ഹെഡ് - എന്റര്‍ടെയ്ന്‍മെന്റ് (സൗത്ത്), കൃഷ്ണന്‍ കുട്ടി പറഞ്ഞു:''നാല് അവതാരകര്‍ക്കും അവരവരുടെ പ്രേക്ഷകരുമായി വളരെ സവിശേഷമായൊരു ബന്ധമാണുള്ളത്. ഓരോ വിപണിയിലും ബിഗ് ബോസിനെ ഇത്രത്തോളം ശക്തമാക്കുന്ന പ്രധാന ഘടകങ്ങളിലൊന്നാണ് ഈ ബന്ധം. വിജയ് സേതുപതി, നാഗാര്‍ജുന, കിച്ച സുദീപ്, മോഹന്‍ലാല്‍ എന്നിവരെ അവരുടെ വ്യക്തിത്വങ്ങളോടും ദക്ഷിണേന്ത്യന്‍ സംസ്‌കാരങ്ങളോടും ചേര്‍ന്നുനില്‍ക്കുന്ന, രസകരമായ രീതിയില്‍ ഒരുമിച്ച് കൊണ്ടുവരാനുള്ള അവസരമാണ് ഈ പ്രമോയിലൂടെ ലഭിച്ചത്. നാല് പേരും ഒരേ സ്‌ക്രീനില്‍ എത്തുന്നത് ആരാധകര്‍ക്ക് തന്നെ ഒരു പ്രത്യേക മുഹൂര്‍ത്തമാണ്. നാല് പതിപ്പുകളും ഒരുമിച്ച് ആരംഭിക്കുമ്പോള്‍ ഞങ്ങള്‍ ഒരുക്കുന്ന ആവേശത്തിന്റെയും വലുപ്പത്തിന്റെയും പ്രതിഫലനമാണ് ഈ പ്രമോ.''

ബിഗ് ബോസ് തമിഴ്, തെലുങ്ക്, കന്നഡ, മലയാളം പതിപ്പുകള്‍ ഒരേസമയം പ്രീമിയര്‍ ചെയ്യുന്നതോടെ സെപ്റ്റംബര്‍ 6 ദക്ഷിണേന്ത്യയിലുടനീളം ബിഗ് ബോസ് തരംഗം തീര്‍ക്കുന്ന ദിവസമായി മാറും. ഓരോ പതിപ്പും അതത് ഭാഷയിലും വിപണിയിലും തങ്ങളുടേതായ കഥകളും സവിശേഷതകളുമായി ജിയോസ്റ്റാറിന്റെ ടെലിവിഷന്‍ ചാനലുകളിലും ജിയോ ഹോട്ട്സ്റ്റാറിലും പ്രേക്ഷകരിലേക്ക് എത്തും.
https://www.instagram.com/reel/DcsV016MsDY/?igsi=MTA3ZHk2NXE0cmpzcw==