മലയാളി പ്രേക്ഷകരുടെ പ്രിയപ്പെട്ട രണ്ട് യുവ നടന്മാരാണ് ദുല്‍ഖറും നിവിന്‍ പോളിയും. ബാഗ്ലൂര്‍ ഡേയ്സ്, വിക്രമാദിത്യന്‍ തുടങ്ങിയ സിനിമയിലൂടെ ഇരുവരുടെയും കോമ്പോ ജനങ്ങള്‍ ഏറ്റെടുത്തിരുന്നു. ഇപ്പോഴിതാ ദുല്‍ഖറിനെ കുറിച്ച് ക്യൂ സ്റ്റുഡിയോയ്ക്ക് നല്‍കിയ അഭിമുഖത്തില്‍ നിവിന്‍ പറഞ്ഞ വാക്കുകളാണ് ആരാധകര്‍ ഏറ്റെടുത്തിരിക്കുന്നത്. ഒരിടവേളയ്ക്ക് ശേഷം ദുല്‍ഖറിനെ മുംബൈയില്‍ വെച്ച് കണ്ടപ്പോഴുണ്ടായ അനുഭവത്തെ കുറിച്ചാണ് നിവിന്‍ പോളി സംസാരിച്ചത്.

'ഐഎന്‍സി അവാര്‍ഡ്‌സ് എന്ന ബോംബെയില്‍ വെച്ച് നടന്ന ഒരു അവാര്‍ഡ് ഷോയില്‍ വെച്ചാണ് ഞാന്‍ ഒരുപാട് നാളുകള്‍ക്ക് ശേഷം ദുല്‍ഖറിനെ കാണുന്നത്. അന്ന് അവിടെ ഒരു നൈറ്റ് പാര്‍ട്ടിയുണ്ടായിരുന്നു. ഞങ്ങള്‍ രണ്ട് പേരും അന്ന് ഒരുപാട് നേരം സംസാരിച്ചു. സിനിമയും പേഴ്‌സണല്‍ കാര്യങ്ങളും തുടങ്ങി ഒരുപാട് പറഞ്ഞു തീര്‍ക്കേണ്ട കാര്യങ്ങളുണ്ടായിരുന്നു.

അതെല്ലാം അന്ന് അവിടെ വെച്ച് പറഞ്ഞു. പത്ത് കൊല്ലം മുന്‍പ് എങ്ങനെയാണോ അതേ വൈബില്‍ തന്നെയാണ് ദുല്‍ഖറുമായി ഇപ്പോഴും ഫീല്‍ ചെയ്യുന്നത്. അവനും അങ്ങനെ തന്നെയാണ് ഫീല്‍ ചെയ്യുന്നത്. അങ്ങനെ നമ്മള്‍ ആലോചിച്ച് നോക്കുമ്പോള്‍ അനാവശ്യമായി ഒരു പത്ത് വര്‍ഷം സിനിമാ ചര്‍ച്ചകളില്ലാതെ മുന്നോട്ട് പോയി.

ഇനി അങ്ങനെ സംഭവിക്കേണ്ട നമുക്ക് ഒരുമിച്ച് ഒരു സിനിമ ചെയ്യാം എന്ന തീരുമാനത്തിലെത്തി. അതിനു വേണ്ടി ദുല്‍ഖര്‍ ആലോചിക്കുന്നുണ്ട്. നമ്മുടെ സൈഡില്‍ നിന്നും ആലോചനകള്‍ നടക്കുന്നുണ്ട്. അതിന്റെ തിരക്കഥയ്ക്ക് വേണ്ടിയുള്ള അന്വേഷണത്തിലാണ്. നല്ലൊരു കഥ കിട്ടുകയാണെങ്കില്‍ തീര്‍ച്ചയായും ചെയ്യാം എന്ന ഒരു പ്ലാനിലാണ് ഇപ്പോഴുള്ളത്'.- നിവിന്‍ പോളി പറഞ്ഞു.