നിവിന്‍ പോളിയുടെ തിരിച്ചുവരവില്‍ മലയാളികള്‍ ഏറ്റെടുത്ത ചിത്രമായിരുന്നു സര്‍വം മായ. അഖില്‍ സത്യനായിരുന്നു ചിത്രത്തിന്റെ സംവിധായകന്‍. ഇരുവരും മറ്റൊരു ചിത്രവുമായി വീണ്ടും ഒന്നിക്കുകയാണ്. ചിത്രത്തിന്റെ തിരക്കഥ ഒരുക്കുന്നത് അല്‍ത്താഫ് സലീമാണ്. റിപ്പോര്‍ട്ടര്‍ ഫിലീംസിന് നല്‍കിയ അഭിമുഖത്തിലാണ് അല്‍ത്താഫ് ഈ കാര്യം വ്യക്തമാക്കിയത്.

നിവിന്റെ കരിയറിലെ ആദ്യ 100 കോടി ചിത്രമാണ് 'സര്‍വ്വം മായ'. കേരള ബോക്സ് ഓഫിസില്‍ ആദ്യ ദിവസം തന്നെ ചിത്രം ഏകദേശം 3.50 കോടി രൂപ നേടിയിരുന്നു. ഇത് നിവിന്‍ പോളിയുടെ കരിയറിലെ ഏറ്റവും മികച്ച സോളോ തുടക്കമാണ്. നിവിന്‍ പോളിയും അജു വര്‍ഗീസും ഒന്നിക്കുന്ന ചിത്രമായതിനാല്‍ തന്നെ ആരാധകര്‍ വലിയ പ്രതീക്ഷയിലായിരുന്നു. ആ പ്രതീക്ഷ കാത്തുസൂക്ഷിക്കാന്‍ സിനിമക്ക് കഴിഞ്ഞു എന്നാണ് കലക്ഷന്‍ റിപ്പോര്‍ട്ടുകള്‍ വ്യക്തമാക്കുന്നത്.

അതേസമയം, ഓണം ഹിറ്റടിക്കാന്‍ നിവിന്‍ പോളി ഒരു റോം-കോം ചിത്രവുമായി തിയേറ്ററുകളിലെത്തുന്നുണ്ട് നിവിനും മമിത ബൈജുവും നായകനും നായികയുമായെത്തുന്ന 'ബത്‌ലഹേം കുടുംബ യൂണിറ്റ്' എന്ന സിനിമയുടെ ഫസ്റ്റ് ലുക്ക് പോസ്റ്റര്‍ പുറത്തിറങ്ങി. ഭാവന സ്റ്റുഡിയോസിനോടൊപ്പം നിവിന്‍ ആദ്യമായി ഒന്നിക്കുന്ന ചിത്രം ഈ വരുന്ന ഓണത്തിനാണ് വേള്‍ഡ് വൈഡ് റിലീസിനായി ഒരുങ്ങുന്നത്.

റൊമാന്റിക് കോമഡി ഗണത്തില്‍പ്പെടുന്ന ചിത്രം 'തണ്ണീര്‍ മത്തന്‍ ദിനങ്ങള്‍', 'സൂപ്പര്‍ ശരണ്യ', 'പ്രേമലു' എന്നീ സൂപ്പര്‍ ഹിറ്റ് സിനിമകളുടെ സംവിധായകനായ ഗിരീഷ് എ ഡിയാണ് അണിയിച്ചൊരുക്കുന്നത്. കലാമൂല്യവും ജനപ്രിയവുമായ സിനിമകള്‍ സമ്മാനിച്ചിട്ടുള്ള ബാനറായ ഭാവന സ്റ്റുഡിയോസിനോടൊപ്പം നിവിന്‍ ആദ്യമായി ഒന്നിക്കുമ്പോള്‍ പ്രേക്ഷകരും ഏറെ പ്രതീക്ഷയിലാണ്. ഭാവന സ്റ്റുഡിയോസ് ഒരുക്കുന്ന ആറാമത്തെ ചിത്രവുമാണിത്.