പൃഥ്വിരാജ് സുകുമാരനെ നായകനാക്കി വൈശാഖ് സംവിധാനം ചെയ്യുന്ന ഏറ്റവും പുതിയ ചിത്രമാണ് ഖലീഫ. ചിത്രത്തില്‍ മോഹന്‍ലാലും ഒരു പ്രധാന കാമിയോ റോളില്‍ എത്തുന്നുണ്ട്. പൃഥ്വിരാജിന്റെ നായക കഥാപാത്രമായ ആമിര്‍ അലിയുടെ മുത്തശ്ശനായ മാമ്പറക്കല്‍ അഹമ്മദാലി എന്ന കഥാപാത്രമായാണ് മോഹന്‍ലാല്‍ ചിത്രത്തിലെത്തുന്നത്.

ഖലീഫയുടെ ഡബ്ബിംഗ് മോഹന്‍ലാല്‍ പൂര്‍ത്തിയാക്കിയെന്ന വിവരമാണ് സംവിധായകന്‍ വൈശാഖും നിര്‍മാതാവ് ജിനു എബ്രഹാമും ഇപ്പോള്‍ പങ്കുവെച്ചിരിക്കുന്നത്. 'മാമ്പറക്കല്‍ അഹമ്മദാലി ആദ്യ ഭാഗത്തിനായുള്ള മാജിക് പൂര്‍ത്തിയാക്കി കഴിഞ്ഞു. മോഹന്‍ലാല്‍ സാറിനോട് ഒരുപാട് നന്ദിയുണ്ട്.
ഇപ്പോള്‍ രണ്ടാം ഭാഗത്തിനായുള്ള കാത്തിരിപ്പ് തുടങ്ങിയിരിക്കുകയാണ്. അദ്ദേഹം നമുക്കായി കാത്തുവെച്ചിരിക്കുന്നത് എന്താണെന്ന് അറിയാനുള്ള കാത്തിരിപ്പ് ഇപ്പോഴേ ആരംഭിച്ചു കഴിഞ്ഞു. നമ്മുടെ യാത്ര തുടങ്ങിയിട്ടേയുള്ളു,' വൈശാഖ് ഇന്‍സ്റ്റഗ്രാമില്‍ കുറിച്ചു.

ഖലീഫയുടെ ആദ്യ ഭാഗമാണ് പൃഥ്വിരാജിനെ നായകനായി എത്തുന്നത്. അത് സ്വര്‍ണക്കടത്തിന്റെയും മറ്റും കഥയാണ് പറയുന്നതെങ്കില്‍ അടുത്ത ഭാഗത്തില്‍ മോഹന്‍ലാല്‍ നായകനായി രക്തരൂക്ഷിതമായി കാലത്തിന്റെ കഥയാകും പറയുക എന്നാണ് ചിത്രത്തിന്റെ പോസ്റ്റര്‍ നല്‍കുന്ന സൂചനകള്‍.

ഓണം റിലീസായാണ് ഖലീഫ തിയേറ്ററുകളിലെത്തുക. തെലുങ്ക് താരം മാളവിക ശര്‍മ്മ ആണ് ചിത്രത്തിലെ നായിക. മാളവികയുടെ ആദ്യ മലയാള ചിത്രമാണ് ഖലീഫ. സ്വര്‍ണ്ണ കള്ളക്കടത്തിന്റെ പശ്ചാത്തലത്തില്‍ വലിയ കാന്‍വാസില്‍ കഥപറയുന്ന ഒരു ബിഗ് ബഡ്ജറ്റ് എന്റെര്‍റ്റൈനെര്‍ ആണ് ഖലീഫ എന്ന സൂചനയാണ് ചിത്രത്തിന്റെ നേരത്തെ ഗ്ലിംബ്സ് വീഡിയോ നല്‍കിയത്.

ബോളിവുഡ് താരം നീൽ നിതിൻ മുകേഷും ചിത്രത്തിന്റെ താരനിരയുടെ ഭാഗമാണ്. നീൽ ആദ്യമായി മലയാളത്തിൽ അഭിനയിക്കുന്ന ചിത്രം കൂടിയാണ് ഖലീഫ. മാസ്സ് സ്‌റ്റൈലിഷ് ആക്ഷൻ ത്രില്ലറായി ഒരുക്കുന്ന ചിത്രത്തിൽ, ത്രസിപ്പിക്കുന്ന ചേസ് രംഗങ്ങൾ, ആക്ഷൻ രംഗങ്ങൾ എന്നിവയും ഉണ്ടെന്നും ഗ്ലിംബ്‌സ് വീഡിയോ കാണിച്ചു തരുന്നുണ്ട്. 'പോക്കിരി രാജ'യ്ക്കു ശേഷം വൈശാഖും പൃഥ്വിരാജും ഒന്നിക്കുന്ന ഈ ചിത്രം ലണ്ടൻ, ദുബായ്, കേരളം, നേപ്പാൾ എന്നിവിടങ്ങളിലെ വിവിധ ലൊക്കേഷനുകളിൽ ആയാണ് ചിത്രീകരിച്ചത്. ആദം ജോൺ, ലണ്ടൻ ബ്രിഡ്ജ്, മാസ്റ്റേഴ്‌സ്, കടുവ എന്നീ സിനിമകൾക്കു ശേഷം ജിനു എബ്രഹാം - പൃഥ്വിരാജ് ടീം ഒന്നിച്ച ചിത്രം കൂടിയാണിത്.

ഛായാഗ്രഹണം - ജോമോൻ ടി ജോൺ, സംഗീതം - ജേക്‌സ് ബിജോയ്, എഡിറ്റിംഗ് - ചമൻ ചാക്കോ, പ്രൊഡക്ഷൻ ഡിസൈനർ - മോഹൻദാസ്, ആക്ഷൻ - യാനിക്ക് ബെൻ, ഫീനിക്‌സ് പ്രഭു, ചേതൻ ഡിസൂസ, കോ ഡയറക്ടർ - സുരേഷ് ദിവാകർ, എക്‌സിക്യൂട്ടീവ് പ്രൊഡ്യൂസർ - ഷൈൻ വർഗീസ്, കോസ്റ്റ്യൂംസ് - മഷർ ഹംസ, കലാസംവിധാനം - വിശ്വനാഥ് അരവിന്ദ്, മേക്കപ്പ് - അമൽ ചന്ദ്രൻ, സൗണ്ട് ഡിസൈൻ - സിങ്ക് സിനിമ, അഡീഷണൽ മ്യൂസിക് - ജാബിർ സുലൈം, ഫൈനൽ മിക്‌സ് - എം ആർ രാജാകൃഷ്ണൻ, പ്രൊഡക്ഷൻ കൺട്രോളർ - റെനി ദിവാകർ, വിനോഷ് കൈമൾ, കളറിസ്റ്റ് - ശ്രീക്ക് വാര്യർ, പോസ്റ്റർ ഡിസൈൻ - എയ്‌സ്‌തെറ്റിക്ക് കുഞ്ഞമ്മ, ഡി ഐ - കളർ പ്ലാനറ്റ്, വിഎഫ്എക്‌സ് - പ്രശാന്ത് നായർ (3ഡിഎസ്), സ്റ്റിൽസ് - സിനറ്റ് സേവ്യർ, പ്രൊമോഷൻസ് ആൻഡ് മാർക്കറ്റിങ് - വിപിൻകുമാർ പൊഫാറ്റിയോ, പിആർഒ - ശബരി.