നടി ആക്രമിക്കപ്പെട്ട കേസിൽ നടൻ ദിലീപിനെ കോടതി കുറ്റവിമുക്തനാക്കിയ സാഹചര്യത്തിൽ, അദ്ദേഹത്തിനെതിരെയുള്ള വേട്ടയാടൽ അവസാനിപ്പിക്കണമെന്ന് നടി പ്രിയങ്ക അനൂപ് ആവശ്യപ്പെട്ടു. ഒരു പ്രമുഖ മാധ്യമത്തിന് നൽകിയ അഭിമുഖത്തിലാണ് താരം തന്റെ നിലപാട് വ്യക്തമാക്കിയത്. കോടതി വിധി വന്നിട്ടും ദിലീപിനെ മാറ്റിനിർത്തുന്നതിലെ യുക്തിയെ ചോദ്യം ചെയ്ത പ്രിയങ്ക, തെളിവുകളില്ലെന്ന് കോടതി വ്യക്തമാക്കിയ സ്ഥിതിക്ക് ഇനിയെങ്കിലും അദ്ദേഹത്തെ സമാധാനമായി ജീവിക്കാൻ അനുവദിക്കണമെന്നും പറഞ്ഞു.

താരസംഘടനയായ 'അമ്മ'യിലേക്കുള്ള ദിലീപിന്റെ തിരിച്ചുവരവിനെക്കുറിച്ചും പ്രിയങ്ക സംസാരിച്ചു. കുറ്റാരോപിതരായ പലരും ഇപ്പോഴും സംഘടനയിൽ തുടരുമ്പോൾ ദിലീപിനെ മാത്രം എന്തിനാണ് മാറ്റിനിർത്തുന്നതെന്ന് അവർ ചോദിച്ചു. കഴിഞ്ഞ എട്ടു വർഷമായി ദിലീപും കുടുംബവും അനുഭവിച്ച മാനസിക വിഷമങ്ങൾക്ക് മറുപടിയാണ് ഇപ്പോഴത്തെ വിധി. തന്റെ ഈ പ്രതികരണം സിനിമയിൽ അവസരങ്ങൾ ലഭിക്കാൻ വേണ്ടിയല്ലെന്നും മറിച്ച് കോടതി വിധിയെ മാനിച്ചുകൊണ്ടാണെന്നും അവർ വ്യക്തമാക്കി.

ദിലീപിന്റെ പുതിയ ചിത്രമായ 'ഭഭബ'യ്ക്കെതിരെ നടക്കുന്ന വിമർശനങ്ങൾ വ്യക്തിഹത്യയുടെ ഭാഗമാണെന്നും പ്രിയങ്ക അഭിപ്രായപ്പെട്ടു. സാധാരണ ജനങ്ങൾക്കും സഹപ്രവർത്തകർക്കും തോന്നുന്ന അതേ വികാരമാണ് തനിക്കുമുള്ളതെന്നും അവർ പറഞ്ഞു. കോടതി കുറ്റവിമുക്തനാക്കിയ ഒരാളെ വീണ്ടും പ്രതിക്കൂട്ടിൽ നിർത്തുന്ന പ്രവണത ശരിയല്ലെന്നും സംഘടനയുടെ നേതൃത്വം ഇക്കാര്യത്തിൽ ഉചിതമായ തീരുമാനമെടുക്കുമെന്ന് പ്രതീക്ഷിക്കുന്നതായും പ്രിയങ്ക കൂട്ടിച്ചേർത്തു.

English summary: 

Actress Priyanka Anoop supports Dileep, urges to stop targeting him after court verdict.