വിണ്ണില്‍ നിന്നും പെയ്തിറങ്ങിയ സ്‌നേഹത്താരകങ്ങളുമായി കൊല്ലം പ്രവാസി അസോസിയേഷന്‍ കഴിഞ്ഞ നാല് ആഴ്ച്ചയായി നടത്തിയ  ക്രിസ്തുമസ് കരോള്‍ ഗൃഹ സന്ദര്‍ശനങ്ങള്‍ക്ക് വര്‍ണ്ണാഭമായ സമാപനം. കെ.പി.എ ക്രിസ്മസ് രാവ് 2025 എന്ന പേരില്‍ കെ.പി.എ കുടുംബാംഗങ്ങളെയും കരോള്‍ സംഘത്തെയും പങ്കെടുപ്പിച്ചുക്കൊണ്ട് സല്‍മാനിയ ഇന്ത്യന്‍ ഡിലൈറ്റ്‌സ് ഹാളില്‍ വച്ച് വിപുലമായി ക്രിസ്മസ് ആഘോഷം സംഘടിപ്പിച്ചു. കെപിഎ പ്രസിഡണ്ട് ശ്രീ അനോജ് മാസ്റ്റര്‍ അധ്യക്ഷത വഹിച്ച പരിപാടി പ്രശസ്ത കലാകാരനും ലൈവ് എഫ്.എം  ആര്‍ ജെ യുമായ ഷിബു മലയില്‍ ഉദ്ഘാടനം ചെയ്തു.

ബഹ്റൈന്‍  മലയാളീ  സി.എസ്.ഐ. പാരിഷ്, സഗായ, ബഹ്‌റൈന്‍ വികാരി റവ.  ഫാദര്‍ മാത്യൂസ്  ഡേവിഡ് ക്രിസ്മസ് സന്ദേശം നല്‍കി. കെ പി എ കരോള്‍ കണ്‍വീനര്‍ ജോസ് മാങ്ങാട് സ്വാഗതം ആശംസിച്ചു. പരിപാടിയില്‍ കെ.പി.എ. ജനറല്‍ സെക്രട്ടറി  പ്രശാന്ത്  പ്രബുദ്ധന്‍, ട്രഷറര്‍ മനോജ് ജമാല്‍, വൈസ് പ്രസിഡന്റ്  ശ്രീ കോയിവിള മുഹമ്മദ് കുഞ്ഞു, സെക്രട്ടറി അനില്‍കുമാര്‍, സെക്രട്ടറി രെജീഷ് പട്ടാഴി, കെ പി എ കരോള്‍ കണ്‍വീനര്‍മാരായ രഞ്ജിത് ആര്‍ പിള്ള, മജു വര്‍ഗീസ്, ലിനീഷ് പി ആചാരി, അനൂപ് തങ്കച്ചന്‍ എന്നിവര്‍ ക്രിസ്മസ് ആശംസകളും.  കെ.പി.എ. കരോള്‍ കണ്‍വീനര്‍ ബിജു ആര്‍ പിള്ള നന്ദിയും അറിയിച്ചു സംസാരിച്ചു. തുടര്‍ന്ന് കരോള്‍ സംഘത്തിന്റെ കരോള്‍ ഗാനത്തോട് കൂടി കലാപരിപാടികള്‍ ആരംഭിച്ചു. കെ പി എ കരോള്‍ ടീമിന്റെ വിവിധ കലാപരിപാടികളും കെ പി എ സിംഫണീ  ടീമിന്റെ ഗാനസന്ധ്യയും കെ.പി.എ ക്രിസ്മസ് രാവ് മികവുറ്റതാക്കി. പരിപാടിയില്‍ കെപിഎ സെന്‍ട്രല്‍ കമ്മിറ്റി അംഗങ്ങളും ഡിസ്ട്രിക്ട് കമ്മിറ്റി അംഗങ്ങളും പ്രവാസി ശ്രീ യൂണിറ്റ് ഹെഡുകളും  കുടുംബാംഗങ്ങളും പങ്കെടുത്തു.