മലയാളസിനിമയിൽ ഒരു സൂപ്പർതാരം നടിയെ തട്ടിക്കൊണ്ടു പോയി ബലാസംഗം ചെയ്യാൻ ക്വട്ടേഷൻ സംഘത്തെ ഏൽപ്പിച്ചതിൽ പിന്നെയാണ് ഭാഷയിൽ ഒരു വാക്കുണ്ടായത് - അതിജീവിത .ഇക്കഴിഞ്ഞ എട്ടുവർഷവും ആ നടിയെ അക്രമിച്ചവർ ശിക്ഷിക്കപ്പെടണം എന്നേ മന:സാക്ഷിയുള്ള ഏതൊരു മലയാളിയും ആഗ്രഹിച്ചിട്ടുണ്ടാവൂ . വൈകി ലഭിക്കുന്ന നീതി നീതിയല്ല എന്ന് നമ്മൾ അസ്വസ്ഥമായിരുന്നതിനൊടുവിൽ വൈകി വന്നത് ഈ അനീതിയാണ് . കുറ്റം ചെയ്ത ആൾ കുറ്റം ചെയ്തു എന്ന് തെളിവില്ലാത്തതിനാൽ അയാൾ കുറ്റക്കാരനല്ല . അപ്പോൾ പിന്നെ കുറ്റം ആരുടേത് ? പരാതിക്കാരിയുടേത് തന്നെ . തെളിയിക്കപ്പെടാത്ത ആരോപണം - തെളിയിക്കും വരെ അത് നുണയാണ് !

പകൽ പോലെ വ്യക്തമായ ഒരു കുറ്റം പോലും തെളിയിക്കാൻ കഴിയാത്ത ഇന്നാട്ടിലെ പോലീസിനെയും കോടതിയേയും എന്തിൻ്റെ പേരിലാണ് നമ്മൾ വിശ്വസിക്കേണ്ടത് ? പണവും അധികാരവും കൊണ്ട് അട്ടിമറിക്കാൻ കഴിയാത്തതായി ഒന്നുമില്ലെന്ന് വന്നാൽ ഇന്ത്യയിൽ നമ്മൾ സൃഷ്ടിച്ചു എന്ന് പറയുന്ന നൈതിക കേരളത്തിൻ്റെ വർത്തമാനമുഖം എത്ര പരിതാപകരമാണ് ?

2010 ൽ റിലീസായ കാര്യസ്ഥൻ എന്ന സിനിമയുടെ പ്രദർശന വിജയത്തിൽ ഒരു പത്രം  ആഘോഷിച്ചു - മലയാള സിനിമയിലെ കാര്യസ്ഥനാണ് ദിലീപ് . പത്രത്തിൻ്റെ നിരീക്ഷണം കൃത്യമാണ് . കാരണവരെ സോപ്പിട്ട് തറവാട് സ്വന്തം പേരിലാക്കിയ കാര്യസ്ഥന്മാർ വരെ ചരിത്രത്തിലുണ്ട് . 1992 ൽ കമൽ സംവിധാനം ചെയ്ത എന്നോടിഷ്ടം കൂടാമോ എന്ന മുകേഷ് സിനിമയിൽ സഹസംവിധായകനായ ഗോപാലകൃഷ്ണന് ചെറിയൊരു വേഷമായിരുന്നു . അയാളാണ് പത്ത് കൊല്ലം കൊണ്ട് ദിലീപ് എന്ന നായകനായി വളർന്നത് . മീശ നായകനിലൂടെ സൂപ്പർ താരമായി , ട്വൻ്റി ട്വൻ്റി സിനിമ സ്വന്തമായി നിർമ്മിച്ച് മമ്മൂട്ടി , മോഹൻലാൽ , സുരേഷ് ഗോപി , ജയറാം എന്നിവർക്കൊപ്പമാണ് താൻ എന്ന് തെളിയിക്കുകയും ചെയ്തു . 
സ്ക്രീനിലെ തമാശക്കാരനായ കോമളൻ അണിയറയിൽ ഉപജാപങ്ങളുടെ സൂത്രധാരനായിരുന്നു . മമ്മൂട്ടിക്കും മോഹൻലാലിനും പോലുള്ള മെഗാതാരങ്ങൾക്ക് ശിങ്കിടി പാടി അയാൾ വളർന്നു വരുന്ന യുവ താരങ്ങളെയെല്ലാം ഒതുക്കി . നടിയെ തട്ടിക്കൊണ്ടുപോവൽ കേസിൻ്റെ പേരിൽ മൂപ്പരുടെ പ്രതാപം ഒന്ന് മങ്ങിയപ്പോഴാണ് നിരവധി പുതിയ സംവിധായകർക്കും നടീനടന്മാർക്കും തിരക്കഥാകൃത്തുക്കൾക്കും രംഗത്തു വരാൻ അവസരമൊരുങ്ങിയത് . വിനയൻ എന്ന സംവിധായകനേയും പൃഥ്വീരാജ് എന്ന നടനെയും തമസ്കരിക്കാൻ ശ്രമിച്ചത് വേണ്ടത്ര വിജയിച്ചില്ല . എന്നാൽ പാർവ്വതി തിരുവോത്ത് എന്ന നിലപാടുള്ള നടിയെ മൂലക്കിരുത്താൻ മലയാള സിനിമ മൊത്തം ഇയാൾക്ക് കൂട്ടുനിന്നു . മഹാനടൻ തിലകനെ ഒറ്റപ്പെടുത്താൻ മമ്മൂട്ടിയെപ്പോലുള്ള വമ്പന്മാർ വരെ ഇയാൾക്ക് കൂട്ടു നിന്നു . മിസ്റ്റർ മരുമകൻ എന്ന സിനിമയിൽ ഇയാൾ നായികയാക്കിയ കാഴ്ച്ചയിലെ ബാലതാരം സനൂഷയെ പിന്നീട് കാണാനേ ഇല്ല ! 600 കോടി ആസ്തി എന്നത് സിനിമ ഭരിക്കാൻ മാത്രമല്ല , നീതിന്യായവും ഭരണകൂടവും എല്ലാം ഭരിക്കാനുള്ള യോഗ്യതയാണെന്ന് തെളിയിച്ച ഈ അതിജീവിതൻ കേരളീയ സമൂഹം പുലർത്തിപ്പോന്ന എല്ലാ ധാർമ്മികബോധങ്ങളെയും വെല്ലുവിളിക്കുകയാണ് .