കോട്ടയം: ക്നാനായ സമൂഹത്തിന്റെ ഐക്യവും സാംസ്കാരിക പൈതൃകവും തേജസ്സോടെ തെളിഞ്ഞ മഹാസമ്മേളന വേദിയിൽ, ലോകശാസ്ത്രലോകത്ത് ക്നാനായ സമൂഹത്തിന് അഭിമാനമുദ്ര പതിപ്പിച്ച പ്രൊഫ. ഡോ. സണ്ണി ലൂക്കിന് പ്രത്യേക ആദരം. യുവജനവേദി സംഘടിപ്പിച്ച ഈ ചരിത്രസമ്മേളനം, തലമുറകൾ കൈമാറിയ സംസ്‌കാരത്തിന്റെ ആത്മാവിനെ ശക്തമായ പ്രകടനങ്ങളിലൂടെ പുനർസൃഷ്ടിച്ചതിലൂടെ ശ്രദ്ധയാകർഷിച്ചു.

പരമ്പരാഗത വേഷഭൂഷണവുമായി യുവാക്കൾ അണിനിരന്നുകൊണ്ട് വിശ്വാസപരമായ ഘോഷയാത്രയും ക്നാനായ ആചാരങ്ങളുടെയും പൈതൃകത്തിന്റെയും കലാപരിപാടികളും നടത്തി വിശുദ്ധ ക്നായി തൊമ്മന്റെ ഓർമ പുതുക്കിയ വേദി, ക്നാനായ സമൂഹത്തിന്റെ ഐക്യബോധം ലോകത്തിനുമുൻപിൽ വീണ്ടും തെളിയിച്ചു. 1970–80കളിൽ ഗൾഫിലേക്കും പിന്നീട് അമേരിക്കയിലേക്കും കുടിയേറിയ ക്നാനായാക്കാർ ഇന്നും സംസ്‌കാരത്തെ അതിന്റെ ഉജ്ജ്വലതയിൽ കാത്തുസൂക്ഷിക്കുന്നതിന്റെ തെളിവായിരുന്നു പ്രസ്തുത സംഗമം.

ഈ മഹാസമ്മേളനത്തിന്റെ ഏറ്റവും ശ്രദ്ധേയ നിമിഷമായിരുന്നു അമേരിക്കയിൽ മൂന്ന് ദശാബ്ദത്തോളം മെഡിക്കൽ സയന്റിസ്റ്റായി പ്രവർത്തിച്ച ശേഷം ജന്മനാടായ കേരളത്തിലേക്ക് മടങ്ങി സമൂഹത്തിനും അക്കാദമിക് ലോകത്തിനുമായി ജീവിതം ഉഴിഞ്ഞുവച്ച പ്രൊഫ. ഡോ. സണ്ണി ലൂക്കിന് നൽകിയ ആദരം.മന്ത്രി വി.എൻ.വാസവനിൽ നിന്നാണ് അദ്ദേഹം പുരസ്‌കാരം ഏറ്റുവാങ്ങിയത്.
മോളിക്യുലർ മെഡിസിൻ, കാൻസർ ബയോളജി, ഹ്യൂമൻ ജനറ്റിക്സ്, സ്റ്റംസെൽ ടെക്നോളജി, ടിഷ്യു എഞ്ചിനീയറിംഗ് എന്നിവയിലെ ഗവേഷണങ്ങൾക്ക് അന്താരാഷ്ട്ര നിലവാരത്തിലുള്ള 80-ലധികം പ്രസിദ്ധീകരണങ്ങൾ അദ്ദേഹത്തിന്റെ സംഭാവനകളിൽ ചിലതുമാത്രമാണ്.

സണ്ണി ലൂക്കിന്റെ ദൗത്യപരമായ സംഭാവനകളിൽ ഏറ്റവും ശ്രദ്ധേയമായത് IISAC (ഇന്റർനാഷണൽ ഇൻസ്റ്റിറ്റ്യൂട്ട് ഫോർ സയന്റിഫിക് ആൻഡ് അക്കാദമിക് കൊളാബറേഷൻ) സ്ഥാപിച്ചതാണ്. ഈ സ്ഥാപനം രൂപപ്പെടുത്തിയ സെമസ്റ്റർ ഇന്ത്യ പ്രോഗ്രാം വഴി അമേരിക്കൻ സർവകലാശാലകളിലെ വിദ്യാർത്ഥികൾക്ക് ഇന്ത്യയിൽ പഠനവും ഗവേഷണവും നടത്താനുള്ള വഴിതുറന്നുകിട്ടി.

അദ്ദേഹം നയിച്ച മറ്റൊരു മഹത്തായ പദ്ധതിയാണ് 1,400-പേജുള്ള 'ഇൻട്രൊഡക്ഷൻ ടു കേരള സ്റ്റഡീസ് ' എന്ന ഗ്രന്ഥം—യു.എസ്. സർവകലാശാലകൾ കേരളവുമായി ബന്ധപ്പെട്ട പഠനത്തിന് ഉപയോഗിക്കുന്ന ഏകീകൃത അക്കാദമിക് ഗ്രന്ഥം. 
ഓട്ടിസം, ഡൗൺ സിൻഡ്രോം, സെറിബ്രൽ പാൽസി തുടങ്ങിയ വെല്ലുവിളികളുള്ള കുട്ടികൾക്ക് സാന്ത്വനം പകരുന്ന ജിമ്പയർ (ചങ്ങനാശ്ശേരി), ഏഞ്ചൽസ് വില്ലേജ്, ആശാഭവൻ എന്നിവയുമായി ചേർന്ന് ചെയ്യുന്ന പ്രവർത്തനം അദ്ദേഹത്തിന്റെ ശാസ്ത്രീയ ജീവിതത്തിന്‍റെ ഏറ്റവും മനുഷ്യസ്നേഹപരമായ അദ്ധ്യായമാണ്.

മഹാത്മാ ഗാന്ധി സർവകലാശാല,കാരിത്താസ് നഴ്സിംഗ് കോളേജ്, സേക്രഡ് ഹാർട്ട് മെഡിക്കൽ സെന്റർ എന്നീ  പ്രമുഖ ഗവേഷണ സ്ഥാപനങ്ങളിലെ സന്ദർശക പ്രൊഫസറായും അദ്ദേഹം പ്രവർത്തിക്കുന്നുണ്ട്. രാജഗിരി കോളേജിലും ആശുപത്രിയിലും ബയോമെഡിക്കൽ സയൻസ് ഇൻസ്റ്റിറ്റ്യൂട്ട് രൂപീകരണത്തിന് നേതൃത്വം നൽകിയതാണ് മറ്റൊരു മഹത്തായ സംഭാവന.

അമേരിക്കയിലെ ശാസ്ത്രീയ ജീവിതത്തിനു ശേഷം നാട്ടിലേക്ക് മടങ്ങിയ അദ്ദേഹം, ജീവിതത്തിലെ രണ്ടാമത്തെ ഘട്ടം അതിവിപുലമായി ആവിഷ്കരിച്ചത് അമേരിക്കൻ മലയാളികൾക്ക് വലിയൊരു പാഠമാണെന്ന് സഭാനേതാക്കൾ അഭിപ്രായപ്പെട്ടു.