പ്രശസ്ത നടനും പ്രേക്ഷകശ്രദ്ധ നേടിയ നിരവധി കഥാപാത്രങ്ങളിലൂടെ ശ്രദ്ധേയനുമായ രാജേഷ് മാധവൻ ആദ്യമായി സംവിധാനം ചെയ്യുന്ന ചിത്രം ‘പെണ്ണും പൊറാട്ടും’ അന്താരാഷ്ട്ര ചലച്ചിത്ര വേദികളിൽ തിളങ്ങാൻ ഒരുങ്ങുന്നു. നവംബർ 26-ന് ഗോവയിൽ നടക്കുന്ന IFFI (ഇൻ്റർനാഷണൽ ഫിലിം ഫെസ്റ്റിവൽ ഓഫ് ഇന്ത്യ) യുടെ ഗാലാ വിഭാഗത്തിൽ ചിത്രം പ്രീമിയർ ചെയ്യും. അനവധി ലോകോത്തര സിനിമകൾ പ്രദർശിപ്പിക്കുന്ന ഗാലാ പ്രീമിയർ വിഭാഗത്തിൽ പ്രദർശിപ്പിക്കുന്ന ഒരേയൊരു മലയാള സിനിമയാണ് ‘പെണ്ണും പൊറാട്ടും’ എന്ന പ്രത്യേകത ഈ ചിത്രത്തിനുണ്ട്.

‘ന്നാ താൻ കേസ് കൊട്’, ‘ആൻഡ്രോയിഡ് കുഞ്ഞപ്പൻ’ തുടങ്ങിയ ഹിറ്റ് ചിത്രങ്ങൾ നിർമ്മിച്ച സന്തോഷ് ടി കുരുവിള, ബിനു ജോർജ് അലക്‌സാണ്ടർ എന്നിവർ ചേർന്നാണ് ‘പെണ്ണും പൊറാട്ടും’ നിർമ്മിച്ചിരിക്കുന്നത്. ഒരു സോഷ്യൽ സറ്റയർ വിഭാഗത്തിൽപ്പെടുന്ന ഈ സിനിമയിൽ ശ്രദ്ധേയമായ ഒരുപിടി ഘടകങ്ങളുണ്ട്: നൂറോളം പുതുമുഖ അഭിനേതാക്കൾക്കൊപ്പം, കഥയിലെ പ്രധാന കഥാപാത്രങ്ങളിലൊന്ന് ‘സുട്ടു’ എന്ന നായയാണ്.
നാനൂറിലധികം പരിശീലിപ്പിച്ച മൃഗങ്ങളും ചിത്രത്തിൽ അണിനിരക്കുന്നുണ്ട്.

രവിശങ്കറിൻ്റെ തിരക്കഥയിൽ, രാജേഷ് മാധവൻ സംവിധാനം ചെയ്യുന്ന ഈ സിനിമയുടെ ഛായാഗ്രഹണം സബിൻ ഊരാളികണ്ടിയാണ് നിർവഹിച്ചിരിക്കുന്നത്.