മഴക്കോള് മാഞ്ഞേ മാനം തെളിഞ്ഞേ,

കിളിപ്പാട്ട് മൂളും വയൽത്താളമുണ്ടേ,

ഇലച്ചാർത്തു തോറും മലർത്താലമേന്തി

കുളിച്ചീറൻ മാറി മലയാള മണ്ണ് !

പൂവേ പൊലി പൂവേ പൊലി   പുലരിപ്പൂമാനം,

തിരുമുറ്റ ത്തത്ത പൂക്കള കരിവള സംഗീതം !

ഒരു നാടിൻ  പുളകക്കതിരൊളി യരിവാൾ പൊന്നോണം,

കരിക്കാടി കർക്കിടത്തിന്   ചിങ്ങ നിറച്ചൂണ് !

ഗതകാല  സ്മരണപ്പൂവിളി യുണരും തിരുവോണം,

മനുഷ്യന്റെ മനം പൂത്ത  നിനവിൽ പൊന്നൂഞ്ഞാൽ !

ചെറുനാഴി കളവില്ലാ മലയാളപ്പെരുമ,

തിരിവില്ലാ തിരനോട്ട നിറവിൽ പുതുവർഷം !

പൂവേ പൊലി പൂവേ പൊലി പുതുയുഗമുണരുന്നേ,

കരൾ മൂടും കനവിന്റെ കാൽത്തള യുണരുന്നേ,

നിറ നിറ നിറ, നിറ താലപ്പൊലി കതിരാടും പാടം,

കനവിന്റെ കതിർ പൂത്ത തിരുവോണക്കാലം !