Image

ബോര്‍ഡ്, കോര്‍പ്പറേഷന്‍ വീതംവെപ്പില്‍ പടയൊരുക്കം; കോണ്‍ഗ്രസിലെ ഗ്രൂപ്പ് പോരും യു.ഡി.എഫിന് വെല്ലുവിളിയാവുന്നു (എ.എസ് ശ്രീകുമാര്‍)

Published on 16 November, 2026
ബോര്‍ഡ്, കോര്‍പ്പറേഷന്‍ വീതംവെപ്പില്‍ പടയൊരുക്കം; കോണ്‍ഗ്രസിലെ ഗ്രൂപ്പ് പോരും യു.ഡി.എഫിന് വെല്ലുവിളിയാവുന്നു (എ.എസ് ശ്രീകുമാര്‍)

കേരളത്തിലെ ബോര്‍ഡ്, കോര്‍പ്പറേഷന്‍ നിയമനങ്ങള്‍ കേവലം ചില സ്ഥാനങ്ങളിലേക്കുള്ള വ്യക്തികളെ കണ്ടെത്താനുള്ള ഭരണപരമായ നടപടിയല്ലാതായി മാറിയിരിക്കുന്നു. അധികാരത്തിന്റെ പങ്കുവെപ്പ്, രാഷ്ട്രീയ സ്വാധീനം, ഗ്രൂപ്പ് സമവാക്യങ്ങള്‍, ഘടകകക്ഷികളുടെ അവകാശവാദങ്ങള്‍ എന്നിവയെല്ലാം പരസ്പരം കൂട്ടിമുട്ടുന്ന പുതിയൊരു രാഷ്ട്രീയ പോര്‍മുഖമായിരിക്കുകയാണ് ഈ നിയമന വിവാദം. ഭരണം തുടങ്ങി ആറുമാസം പിന്നിട്ടിട്ടും പ്രധാനപ്പെട്ട പല സ്ഥാപനങ്ങളുടെയും തലപ്പത്ത് പുതിയ നിയമനങ്ങള്‍ പൂര്‍ത്തിയാക്കാന്‍ കഴിയാത്തത് യു.ഡി.എഫിനുള്ളില്‍ അസ്വസ്ഥത പടര്‍ത്തുകയാണ്.

ഭരണത്തിന്റെ തുടക്കത്തില്‍ സ്വാഭാവികമായി പ്രതീക്ഷിക്കപ്പെട്ടിരുന്ന രാഷ്ട്രീയ നിയമനങ്ങള്‍ ഇപ്പോള്‍ കോണ്‍ഗ്രസിന്റെ ആഭ്യന്തര അധികാരപ്പോരിന്റെ പ്രതിഫലനമായി മാറിയിരിക്കുകയാണ്. സ്ഥാനങ്ങള്‍ ആര്‍ക്കു നല്‍കണം എന്നതിലുപരി, തീരുമാനമെടുക്കേണ്ടത് ആരാണ് എന്ന ചോദ്യമാണ് പാര്‍ട്ടിക്കുള്ളില്‍ കൂടുതല്‍ പ്രസക്തമാകുന്നത്. മുഖ്യമന്ത്രി വി.ഡി. സതീശന്‍, കെ.പി.സി.സി പ്രസിഡന്റ് സണ്ണി ജോസഫ്, ആഭ്യന്തര മന്ത്രി രമേശ് ചെന്നിത്തല എന്നിവര്‍ ചേര്‍ന്ന് ഏകപക്ഷീയമായി തീരുമാനങ്ങള്‍ കൈക്കൊള്ളുന്നുവെന്ന എ ഗ്രൂപ്പിന്റെ പരാതി ഈ അധികാരവടംവലിയുടെ ആഴം വ്യക്തമാക്കുന്നു.

കോണ്‍ഗ്രസില്‍ സംഘടനാപരമായ അഭിപ്രായവ്യത്യാസങ്ങള്‍ പുതിയ കാര്യമല്ല. എന്നാല്‍ അധികാരത്തിലിരിക്കുന്ന സമയത്ത് ഇത്തരം തര്‍ക്കങ്ങള്‍ പുറത്തുവരുമ്പോള്‍ അതിന്റെ പ്രത്യാഘാതം സര്‍ക്കാരിന്റെ പ്രവര്‍ത്തനങ്ങളിലേക്കും വ്യാപിക്കും. പാര്‍ട്ടിയിലെ വിവിധ ഗ്രൂപ്പുകള്‍ക്ക് അര്‍ഹമായ പരിഗണന ലഭിക്കുന്നില്ലെന്ന പരാതിക്കൊപ്പം, നേരത്തേ സ്ഥാനങ്ങള്‍ വഹിച്ചിരുന്നവരെത്തന്നെ വീണ്ടും പരിഗണിക്കുന്നുവെന്ന വിമര്‍ശനവും ഉയരുന്നുണ്ട്. ഇത് കേവലം വ്യക്തികളുടെ സ്ഥാനമോഹമായി തള്ളിക്കളയാന്‍ കഴിയില്ല. പാര്‍ട്ടിയുടെ താഴെത്തട്ടില്‍ പ്രവര്‍ത്തിച്ചവര്‍ക്കും സംഘടനയ്ക്കുവേണ്ടി ത്യാഗം സഹിച്ചവര്‍ക്കും അധികാരത്തിന്റെ ഭാഗമാകാന്‍ അവസരം ലഭിക്കുന്നില്ലെന്ന വികാരവും ഇതിനു പിന്നിലുണ്ട്.

കെ.സി. ജോസഫ്, ബെന്നി ബെഹനാന്‍, എം.എം. ഹസ്സന്‍, പി.സി. വിഷ്ണുനാഥ്, ഷാഫി പറമ്പില്‍ തുടങ്ങിയ നേതാക്കള്‍ അതൃപ്തി നേതൃത്വത്തെ അറിയിച്ചുവെന്ന വാര്‍ത്തകള്‍ പ്രശ്‌നം ഒരു ഗ്രൂപ്പിന്റെ മാത്രം പരാതിയല്ലെന്ന സൂചന നല്‍കുന്നു. വിഷയം എ.ഐ.സി.സി ജനറല്‍ സെക്രട്ടറി കെ.സി. വേണുഗോപാലിന്റെ മുന്നിലെത്തിക്കാനുള്ള നീക്കവും ശ്രദ്ധേയമാണ്. സംസ്ഥാന നേതൃത്വത്തിന്റെ തീരുമാനങ്ങളില്‍ വിശ്വാസക്കുറവ് ഉണ്ടാകുമ്പോള്‍ ദേശീയ നേതൃത്വത്തിന്റെ ഇടപെടല്‍ തേടുന്നത് കോണ്‍ഗ്രസിലെ ആഭ്യന്തര പ്രതിസന്ധി കൂടുതല്‍ സങ്കീര്‍ണമാക്കും.

നവംബര്‍ 13-ന് ചേര്‍ന്ന കെ.പി.സി.സി ഭാരവാഹികളുടെ ഓണ്‍ലൈന്‍ യോഗത്തില്‍ ഉയര്‍ന്ന വിമര്‍ശനങ്ങളും ഈ അസ്വസ്ഥതയുടെ പരസ്യമായ പ്രകടനമായിരുന്നു. ഡി.സി.സി പ്രസിഡന്റുമാര്‍ ഉള്‍പ്പെടെയുള്ളവര്‍ നിയമനങ്ങളിലെ കാലതാമസത്തിനെതിരെ രംഗത്തെത്തിയത് സംഘടനയ്ക്കുള്ളിലെ സമ്മര്‍ദം വര്‍ധിച്ചുവരുന്നതിന്റെ സൂചനയാണ്. അധികാരത്തിലെത്താന്‍ പ്രവര്‍ത്തിച്ചവരെ അവഗണിച്ച്, രാഷ്ട്രീയമായി സ്വാധീനമുള്ള ചിലര്‍ മാത്രം സ്ഥാനങ്ങള്‍ പങ്കിട്ടെടുക്കുന്നുവെന്ന തോന്നല്‍ വളര്‍ന്നാല്‍ അതിന്റെ പ്രത്യാഘാതം കടുത്തതായിരിക്കും.

കോണ്‍ഗ്രസിലെ ആഭ്യന്തര തര്‍ക്കങ്ങള്‍ക്കിടയില്‍ ഘടകകക്ഷികളുടെ അതൃപ്തിയും ശക്തിപ്പെടുകയാണ്. കേരള കോണ്‍ഗ്രസ് (ജോസഫ് വിഭാഗം), ആര്‍.എസ്.പി തുടങ്ങിയ കക്ഷികള്‍ നിയമനങ്ങള്‍ വേഗത്തില്‍ പൂര്‍ത്തിയാക്കണമെന്ന് ആവശ്യപ്പെട്ട് രംഗത്തെത്തിയിരിക്കുന്നത് യു.ഡി.എഫ് നേതൃത്വത്തിന് പുതിയ തലവേദനയാണ്. പ്രത്യേകിച്ച് കേരള കോണ്‍ഗ്രസ് ചെയര്‍മാന്‍ പി.ജെ. ജോസഫിന് ഭരണരംഗത്ത് അര്‍ഹമായ സ്ഥാനം നല്‍കണമെന്ന മന്ത്രി മോന്‍സ് ജോസഫിന്റെ ആവശ്യം രാഷ്ട്രീയ പ്രാധാന്യമുള്ളതാണ്. നിയമനങ്ങള്‍ ഇനിയും നീണ്ടുപോയാല്‍ മുന്നണിയില്‍ വലിയ പ്രതിസന്ധിയുണ്ടാകുമെന്ന മുന്നറിയിപ്പ് വെറുമൊരു സമ്മര്‍ദതന്ത്രമായി മാത്രം കാണാനാവില്ല. മുന്നണിയിലെ കക്ഷികള്‍ക്ക് ലഭിക്കേണ്ട രാഷ്ട്രീയ പ്രാതിനിധ്യത്തെക്കുറിച്ചുള്ള ആശങ്കയാണ് അതിലൂടെ പുറത്തുവരുന്നത്.

യു.ഡി.എഫിന്റെ നിലനില്‍പ്പുതന്നെ പരസ്പരമുള്ള രാഷ്ട്രീയ വിട്ടുവീഴ്ചകളുടെയും അധികാരപങ്കാളിത്തത്തിന്റെയും അടിസ്ഥാനത്തിലാണ്. അതിനാല്‍ കോണ്‍ഗ്രസിലെ ഗ്രൂപ്പ് സമവാക്യങ്ങള്‍ പരിഹരിക്കാനാകാതെ ഘടകകക്ഷികളുടെ അവകാശവാദങ്ങള്‍ നീട്ടിക്കൊണ്ടുപോകുന്നത് മുന്നണിയുടെ കെട്ടുറപ്പിനെ ബാധിച്ചേക്കാം. കോണ്‍ഗ്രസിന് സ്വന്തം പാര്‍ട്ടിക്കുള്ളിലെ പ്രശ്‌നങ്ങള്‍ പരിഹരിക്കാന്‍ കഴിയുന്നില്ലെങ്കില്‍ മുന്നണിയിലെ മറ്റ് കക്ഷികളുടെ ആവശ്യങ്ങള്‍ എങ്ങനെ പരിഗണിക്കുമെന്ന ചോദ്യവും ഉയരും.

നിയമനങ്ങളില്‍ മുസ്ലീം ലീഗിന് ലഭിച്ച പരിഗണനയും രാഷ്ട്രീയ ചര്‍ച്ചകളില്‍ പ്രധാനമാണ്. ഡോ. എം.കെ. മുനീറിനെ ഭരണപരിഷ് കാര കമ്മീഷന്‍ അധ്യക്ഷനായും പി.എം.എ. സലാമിനെ സില്‍ക്ക് ചെയര്‍മാനായും ശ്യാം സുന്ദറിനെ ഇന്‍കെല്‍ ചെയര്‍മാനായും നിയമിച്ചതിലൂടെ ലീഗിന് ലഭിക്കേണ്ട ചില പ്രധാന സ്ഥാനങ്ങളില്‍ തീരുമാനമുണ്ടായി. എന്നാല്‍ മറ്റ് ഘടകകക്ഷികള്‍ക്കും കോണ്‍ഗ്രസിലെ വിവിധ വിഭാഗങ്ങള്‍ക്കും അര്‍ഹമായ പ്രാതിനിധ്യം ലഭിച്ചുവെന്ന ബോധ്യം സൃഷ്ടിക്കാന്‍ നേതൃത്വത്തിന് കഴിഞ്ഞിട്ടില്ല. ഒരു കക്ഷിക്ക് ലഭിച്ച പരിഗണന മറ്റൊരു കക്ഷിയുടെ അതൃപ്തിക്ക് കാരണമാകുന്ന സാഹചര്യം ഒഴിവാക്കാന്‍ രാഷ്ട്രീയമായ സൂക്ഷ്മത ആവശ്യമാണ്. മുന്നണിയിലെ ഓരോ കക്ഷിയുടെയും സംഘടനാ ശക്തിയും തിരഞ്ഞെടുപ്പുകളിലെ സംഭാവനയും പരിഗണിച്ചുള്ള സന്തുലിതമായ പങ്കുവെപ്പാണ് ഇവിടെ അനിവാര്യം.

ഇതിനിടയില്‍ മുന്‍ സര്‍ക്കാരിന്റെ കാലത്ത് നിയമിക്കപ്പെട്ട പലരും ഇപ്പോഴും ബോര്‍ഡ്, കോര്‍പ്പറേഷന്‍ തലപ്പത്ത് തുടരുന്നുവെന്ന വിമര്‍ശനവും ശക്തമാണ്. അധികാരമാറ്റം സംഭവിച്ചിട്ടും സ്ഥാപനങ്ങളിലെ രാഷ്ട്രീയ നേതൃത്വത്തില്‍ മാറ്റമുണ്ടാകാത്തത് യു.ഡി.എഫ് പ്രവര്‍ത്തകര്‍ക്കിടയില്‍ നിരാശ സൃഷ്ടിക്കുന്നുണ്ട്. സര്‍ക്കാര്‍ മാറുമ്പോള്‍ ഭരണനയങ്ങളിലും മുന്‍ഗണനകളിലും മാറ്റമുണ്ടാകുമെന്ന് ജനങ്ങള്‍ പ്രതീക്ഷിക്കുന്നു. എന്നാല്‍ പൊതുമേഖലാ സ്ഥാപനങ്ങളുടെയും വിവിധ ബോര്‍ഡുകളുടെയും തലപ്പത്ത് പഴയ നിയമനങ്ങള്‍ തുടരുമ്പോള്‍ പുതിയ സര്‍ക്കാരിന്റെ രാഷ്ട്രീയ അവകാശവാദങ്ങള്‍ ചോദ്യം ചെയ്യപ്പെടും. അതേസമയം, എല്ലാ സ്ഥാനങ്ങളിലും രാഷ്ട്രീയ നിയമനങ്ങള്‍ നടത്തുന്നതിനെക്കാള്‍ കഴിവും പ്രവര്‍ത്തനക്ഷമതയും ഉറപ്പാക്കേണ്ടതിന്റെ ആവശ്യകതയും സര്‍ക്കാര്‍ മറക്കരുത്.

നവംബര്‍ അവസാനത്തോടെ നിയമനങ്ങള്‍ പൂര്‍ത്തിയാക്കാനാണ് സര്‍ക്കാര്‍ ലക്ഷ്യമിടുന്നതെന്ന സൂചനയുണ്ട്. വി.ഡി. സതീശന്‍, സണ്ണി ജോസഫ്, രമേശ് ചെന്നിത്തല എന്നിവര്‍ ക്ലിഫ് ഹൗസില്‍ നടത്തിയ കൂടിക്കാഴ്ചയും പ്രശ്‌നപരിഹാരത്തിനുള്ള ശ്രമമായി വിലയിരുത്തപ്പെടുന്നു. എന്നാല്‍ കൂടിക്കാഴ്ചകള്‍കൊണ്ട് മാത്രം പരിഹരിക്കാവുന്ന ഒന്നല്ല ഇപ്പോഴത്തെ പ്രതിസന്ധി. സ്ഥാനങ്ങള്‍ സംബന്ധിച്ച വ്യക്തമായ മാനദണ്ഡവും ഘടകകക്ഷികളുമായുള്ള തുറന്ന ചര്‍ച്ചയും പാര്‍ട്ടിക്കുള്ളിലെ അഭിപ്രായവ്യത്യാസങ്ങള്‍ പരിഹരിക്കാനുള്ള രാഷ്ട്രീയ ഇച്ഛാശക്തിയും ആവശ്യമാണ്.

അധികാരം ലഭിച്ചാല്‍ അതിന്റെ പങ്കുവെപ്പിനെച്ചൊല്ലി തര്‍ക്കിക്കുന്നതാണ് ഇന്ത്യന്‍ മുന്നണി രാഷ്ട്രീയത്തിന്റെ പതിവ് ദൗര്‍ബല്യം. തിരഞ്ഞെടുപ്പിനു മുമ്പ് ഒന്നിച്ചുനിന്ന് ജനവിധി തേടുന്നവര്‍ അധികാരത്തിലെത്തിയശേഷം സ്വന്തം വിഹിതം ഉറപ്പാക്കാനുള്ള മത്സരത്തിലേക്ക് നീങ്ങുമ്പോള്‍ ഭരണത്തിന്റെ മുന്‍ഗണനകള്‍ പിന്നിലാകുന്നു. കേരളത്തിലെ ഇപ്പോഴത്തെ നിയമന വിവാദവും അതിന്റെ മറ്റൊരു പതിപ്പാണ്. യു.ഡി.എഫിനെ സംബന്ധിച്ചിടത്തോളം ഇത് കേവലം ബോര്‍ഡ്, കോര്‍പ്പറേഷന്‍ സ്ഥാനങ്ങള്‍ വീതംവയ്ക്കാനുള്ള പ്രശ്‌നമല്ല. മുന്നണിക്കുള്ളിലെ വിശ്വാസവും കോണ്‍ഗ്രസിലെ നേതൃത്വത്തിന്റെ ഏകോപനശേഷിയും പരിശോധിക്കപ്പെടുന്ന രാഷ്ട്രീയ പരീക്ഷണമാണ്. എല്ലാവരെയും തൃപ്തിപ്പെടുത്താന്‍ കഴിയില്ലെങ്കിലും ആരെയും അവഗണിക്കപ്പെടുന്നുവെന്ന തോന്നലിലേക്ക് തള്ളിവിടരുത്.

അധികാരത്തിലെത്താന്‍ ഒരുമിച്ചുനിന്ന മുന്നണിക്ക് അധികാരം പങ്കിടാന്‍ കഴിയുന്നില്ലെങ്കില്‍, ആ ഐക്യത്തിന്റെ രാഷ്ട്രീയ പ്രസക്തി എന്താണ് എന്ന ചോദ്യമാണ് ഇപ്പോള്‍ യു.ഡി.എഫിനുള്ളില്‍ ഉയരുന്നത്. നിയമനങ്ങള്‍ പൂര്‍ത്തിയാക്കുന്നതിലുപരി, അതിന്റെ പേരില്‍ രൂപപ്പെട്ട അസ്വസ്ഥതകള്‍ക്ക് പരിഹാരം കാണുന്നതിലായിരിക്കും മുഖ്യമന്ത്രിയയുടെയും കോണ്‍ഗ്രസ് നേതൃത്വത്തിന്റെയും യഥാര്‍ഥ രാഷ്ട്രീയ മികവ് തെളിയിക്കപ്പെടുക.
 

Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക