ഓറഞ്ച്ബര്‍ഗ്, ന്യൂയോര്‍ക്ക് :ന്യൂയോര്‍ക്കിലെ ഓറഞ്ച്ബര്‍ഗ് സെന്റ് ജോണ്‍സ് ഓര്‍ത്തഡോക്‌സ് ദേവാലയത്തില്‍ ദീര്‍ഘകാലം വികാരിയായി സേവനമനുഷ്ഠിച്ച റവ. ഫാ. എബി പൗലോസിനും കുടുംബത്തിനും ഇടവകാംഗങ്ങള്‍ സ്‌നേഹനിര്‍ഭരമായ യാത്രയയപ്പ് നല്‍കി. നവംബര്‍ 8-ന് പരുമല പെരുന്നാളിനോടനുബന്ധിച്ചായിരുന്നു സമ്മേളനം.

2020 ഡിസംബര്‍ 1 മുതല്‍ 2026 സെപ്റ്റംബര്‍ 28 വരെ സെന്റ് ജോണ്‍സ് ഇടവകയുടെ വികാരിയായി സേവനമനുഷ്ഠിച്ച ഫാ. എബി പൗലോസ് ഇപ്പോള്‍ പെന്‍സില്‍വേനിയയിലെ ബെന്‍സേലം സെന്റ് ഗ്രിഗോറിയോസ് ദേവാലയത്തിന്റെ വികാരിയായി ചുമതലയേറ്റിരിക്കുകയാണ്.

ഇടവക സെക്രട്ടറി ബിജോ തോമസ് സ്വാഗതപ്രസംഗം നടത്തി. നല്ല ഇടയനെക്കുറിച്ചുള്ള സുവിശേഷസന്ദേശവുമായി അച്ചന്റെ ശുശ്രൂഷാകാലത്തെ ബന്ധപ്പെടുത്തി സംസാരിച്ച അദ്ദേഹം, ഇടയന്റെ ശബ്ദം ആടുകള്‍ തിരിച്ചറിയുന്നതുപോലെ ഫാ. എബി പൗലോസിന്റെ ആത്മീയനേതൃത്വവും സ്‌നേഹപൂര്‍വമായ സമീപനവും ഇടവകാംഗങ്ങള്‍ക്ക് സുപരിചിതമായിരുന്നുവെന്ന് അനുസ്മരിച്ചു.

പ്രാര്‍ത്ഥനയിലും ഉപവാസത്തിലുമുള്ള വിശ്വാസം, ചെറിയ കാര്യങ്ങളില്‍പ്പോലും പുലര്‍ത്തിയ വിശ്വസ്തത, മനുഷ്യപ്രയത്‌നത്തോടൊപ്പം ദൈവാനുഗ്രഹത്തിലുള്ള ആശ്രയം എന്നിവ അച്ചന്റെ ജീവിതത്തിലും ശുശ്രൂഷയിലും പ്രകടമായിരുന്ന പ്രധാന മൂല്യങ്ങളാണെന്ന് ബിജോ തോമസ് പറഞ്ഞു. അച്ചന്റെ ശുശ്രൂഷയില്‍ പിന്തുണയായി നിന്ന ഭാര്യ അനിത പൗലോസിനും മക്കളായ എലിസബത്ത്, ജോഷ്വ, റെബേക്ക എന്നിവര്‍ക്കും അദ്ദേഹം നന്ദി അറിയിച്ചു. സെന്റ് ജോണ്‍സ് ദേവാലയം എന്നും അവരുടെ സ്വന്തം ഭവനമായിരിക്കുമെന്നും കൂട്ടിച്ചേര്‍ത്തു.

പുതിയ വികാരി റവ. ഫാ. ബേസില്‍ മണ്ണാത്തിക്കുളം അധ്യക്ഷത വഹിച്ചു. സണ്‍ഡേ സ്‌കൂള്‍ പ്രിന്‍സിപ്പലായി രണ്ടുവര്‍ഷം സേവനമനുഷ്ഠിക്കുകയും വെക്കേഷന്‍ ബൈബിള്‍ സ്‌കൂളിന്റെ പ്രവര്‍ത്തനങ്ങള്‍ക്ക് മികച്ച നേതൃത്വം നല്‍കുകയും ചെയ്ത അനിത പൗലോസിനെ സണ്‍ഡേ സ്‌കൂള്‍ പ്രതിനിധികളായ നിജി വര്‍ഗീസ്, ഷിജി വിനോദ്, സ്‌നേഹ സോജി എന്നിവര്‍ ആദരിച്ചു.

മര്‍ത്തമറിയം വനിതാസമാജം സെക്രട്ടറി സൂര്യ വെട്ടത്ത്, ഭദ്രാസന വനിതാസമാജം വൈസ് പ്രസിഡന്റായി ഒമ്പതു വര്‍ഷം പ്രവര്‍ത്തിച്ച ഫാ. എബി പൗലോസിന്റെ സേവനങ്ങളും അദ്ദേഹത്തിന്റെ നേതൃത്വത്തില്‍ നടന്ന ജീവകാരുണ്യപ്രവര്‍ത്തനങ്ങളും അനുസ്മരിച്ചു. മാനേജിംഗ് കമ്മിറ്റി അംഗം സക്കറിയ വര്‍ഗീസ് അച്ചന്റെ ഭരണനൈപുണ്യത്തെയും സമര്‍പ്പിതമായ പ്രവര്‍ത്തനശൈലിയെയും പ്രശംസിച്ചു.

ഇടവകയുടെ സോഷ്യല്‍ മീഡിയ ടീം തയ്യാറാക്കിയ 'A Journey of Grace' എന്ന വീഡിയോ അച്ചന്റെ ശുശ്രൂഷാകാലത്തെ ഓര്‍മകള്‍ പുതുക്കി. മദ്ബഹാ ശുശ്രൂഷകരെ പ്രതിനിധീകരിച്ച് സംസാരിച്ച ജോഷ്വ ജോര്‍ജ്, ആരാധനാശുശ്രൂഷയ്ക്കിടയിലെ ചെറിയ തെറ്റുകള്‍പോലും അച്ചന്‍ സ്‌നേഹത്തോടെയും ക്ഷമയോടെയും തിരുത്തിനല്‍കിയിരുന്നതായി അനുസ്മരിച്ചു. എം.ജി.ഒ.സി.എസ്.എം. പ്രതിനിധിയായി ക്രിസ് മാത്യൂസും സഭാ മാനേജിംഗ് കമ്മിറ്റി പ്രതിനിധിയായി കെ. ജി. ഉമ്മനും ആശംസകളും അനുസ്മരണങ്ങളും പങ്കുവച്ചു.

യാത്രയയപ്പ് സന്ദേശത്തില്‍ അനിത പൗലോസ്, 2020-ല്‍ കോവിഡ് മഹാമാരിക്കാലത്ത് ചെറിയ കുട്ടികളുമായി ദൂരെയുള്ള അപരിചിതമായ ഇടവകയിലെത്തിയപ്പോള്‍ തങ്ങള്‍ ഒരു പുതിയ ശുശ്രൂഷാജീവിതം തുടങ്ങുകയായിരുന്നുവെന്ന് പറഞ്ഞു. ആറു വര്‍ഷത്തിനുശേഷം സെന്റ് ജോണ്‍സിലേക്കുള്ള വരവ് ദൈവം നല്‍കിയ ഏറ്റവും വലിയ അനുഗ്രഹങ്ങളിലൊന്നായി കാണുന്നുവെന്നും അവര്‍ കൂട്ടിച്ചേര്‍ത്തു.

വൈദികപത്‌നി എന്ന നിലയിലെ ഉത്തരവാദിത്വങ്ങള്‍ക്കിടയിലും ഇടവകാംഗങ്ങള്‍ തനിക്ക് ഭാരമോ പ്രത്യേക പ്രതീക്ഷകളോ നല്‍കിയില്ലെന്നും, സ്വന്തം മകളെയോ സഹോദരിയെയോ പോലെ ചേര്‍ത്തുപിടിച്ചെന്നും അനിത പൗലോസ് പറഞ്ഞു. കുടുംബത്തില്‍ പ്രിയപ്പെട്ടവരെ നഷ്ടപ്പെട്ടപ്പോഴും ആരോഗ്യസംബന്ധമായ    പ്രതിസന്ധിഘട്ടത്തിലും  ഇടവകാംഗങ്ങള്‍ ഒപ്പമുണ്ടായിരുന്നു. കുട്ടികളുടെ കാര്യങ്ങള്‍ ഉള്‍പ്പെടെ കുടുംബത്തെ സ്വന്തം കുടുംബത്തെപ്പോലെ പരിചരിച്ച അവരുടെ കരുതലിനും സ്‌നേഹത്തിനും നന്ദി പറഞ്ഞ അവര്‍, ഏറ്റവും ഇളയ മകള്‍ റെബേക്ക ജനിച്ചത് സെന്റ് ജോണ്‍സിലാണെന്നും അവള്‍ക്ക് അറിയാവുന്ന ഏക ദേവാലയം അതാണെന്നും ഓര്‍മിപ്പിച്ചു. കുട്ടികള്‍ വളര്‍ന്നുവരുമ്പോള്‍ ഈ ഇടവകകുടുംബത്തെ  തങ്ങളുടെ    ബാല്യത്തിന്റെ വിലപ്പെട്ട ഭാഗമായി ഓര്‍ക്കുമെന്നും അവര്‍ പറഞ്ഞു.

ക്രിസ്തുവിനെ ഹൃദയത്തിന്റെ കേന്ദ്രത്തില്‍ നിലനിര്‍ത്താനും പരസ്പരം പിന്തുണച്ചും പ്രാര്‍ത്ഥിച്ചും സെന്റ് ജോണ്‍സ് ഇടവകയുടെ ഒരുമയുടെ മനോഭാവം കാത്തുസൂക്ഷിക്കാനും അനിത പൗലോസ് ആഹ്വാനം ചെയ്തു. ''ദൈവം ഞങ്ങളെ എവിടേക്കു നയിച്ചാലും നിങ്ങള്‍ ഞങ്ങളുടെ ഹൃദയത്തിലുണ്ടാകും,'' എന്ന സന്ദേശത്തോടെയാണ് അവര്‍ പ്രസംഗം അവസാനിപ്പിച്ചത്.

ഫാ. എബി പൗലോസ്, ഹൃദയപൂര്‍വം ശുശ്രൂഷിച്ച ഇടം വിട്ടുപോകുന്നതും ഹൃദയം തുറന്ന് സ്‌നേഹം നല്‍കിയവരില്‍നിന്ന് പിരിയുന്നതും വേദനയുള്ള അനുഭവമാണെന്ന് പറഞ്ഞു. കഴിഞ്ഞ ഫെബ്രുവരി മുതല്‍ കുടുംബത്തിന് ജീവിതം എളുപ്പമായിരുന്നില്ലെന്നും ആ കാലയളവില്‍ സ്വന്തം കുടുംബത്തെപ്പോലെ ചേര്‍ത്തുപിടിച്ച ഇടവകാംഗങ്ങളോട് എത്ര നന്ദി പറഞ്ഞാലും മതിയാവില്ലെന്നും അദ്ദേഹം പറഞ്ഞു.

പുതിയ വികാരി ഫാ. ബേസില്‍ മണ്ണാത്തിക്കുളത്തിന് എല്ലാ ഭാവുകങ്ങളും നേര്‍ന്ന ഫാ. എബി പൗലോസ്, ഇടവകാംഗങ്ങള്‍ തനിക്കു നല്‍കിയ സ്‌നേഹവും കരുതലും സഹകരണവും പുതിയ അച്ചനും നല്‍കണമെന്ന് അഭ്യര്‍ഥിച്ചു. പ്രായഭേദമില്ലാതെ എല്ലാവരെയും ഉള്‍ക്കൊള്ളുന്ന ഇടവകയുടെ സംസ്‌കാരം ആരോഗ്യകരമായ അന്തരീക്ഷം സൃഷ്ടിക്കുന്നുവെന്നും അത് തുടര്‍ന്നുകൊണ്ടുപോകണമെന്നും അദ്ദേഹം പറഞ്ഞു. കോവിഡ് കാലത്ത് എത്തിയപ്പോള്‍ ആഴത്തിലുള്ള ബന്ധങ്ങള്‍ സ്ഥാപിക്കാന്‍ കഴിയാതിരുന്ന തങ്ങള്‍ ആറു വര്‍ഷത്തിനുശേഷം എല്ലാവരെയും ഹൃദയത്തോടു ചേര്‍ത്തറിയുന്ന സാഹചര്യത്തിലാണ് വിടപറയുന്നതെന്നും അദ്ദേഹം അനുസ്മരിച്ചു. തങ്ങള്‍ക്കുവേണ്ടി പ്രാര്‍ത്ഥിക്കണമെന്നും ഇടവകയോടൊപ്പം തങ്ങളുടെ സാന്നിധ്യം തുടരുമെന്നും പറഞ്ഞ് അദ്ദേഹം സന്ദേശം അവസാനിപ്പിച്ചു.

ഇടവക ട്രഷറര്‍ ഫിലിപ്പ് പി. ഈശോ, ജോയിന്റ് ട്രഷറര്‍ സാജന്‍ രാജു, ജോയിന്റ് സെക്രട്ടറി ഉമ്മന്‍ ഡാനിയേല്‍ എന്നിവര്‍ ചേര്‍ന്ന് ഫാ. എബി പൗലോസിന് സ്മരണികയും ഉപഹാരവും സമര്‍പ്പിച്ചു. ആറുവര്‍ഷത്തോളമായി ഇടവകയുടെ ആത്മീയവും സംഘടനാപരവുമായ പ്രവര്‍ത്തനങ്ങള്‍ക്ക് നേതൃത്വം നല്‍കിയ വൈദികനോടും കുടുംബത്തോടുമുള്ള സ്‌നേഹവും നന്ദിയും പങ്കുവെച്ച അവസരമായി യാത്രയയപ്പ് സമ്മേളനം മാറി.

വാര്‍ത്തയ്ക്ക് ആധാരം: ഇടവക സെക്രട്ടറി ബിജോ തോമസ് നല്‍കിയ റിപ്പോര്‍ട്ട്.