അന്താരാഷ്ട്ര ബഹിരാകാശ നിലയത്തില്‍ അവസാന സോളാര്‍ പാനല്‍ സ്ഥാപിക്കും; വൈദ്യുതോല്‍പാദന ശേഷി 30 ശതമാനം വരെ വര്‍ധിപ്പിക്കുന്ന ദൗത്യത്തിന് NASAയുടെ അനുമതി

ചിക്കാഗോ, നവംബര്‍ 5: അന്താരാഷ്ട്ര ബഹിരാകാശ നിലയത്തില്‍ മറ്റൊരു നിര്‍ണായക ദൗത്യത്തിന് തയ്യാറെടുക്കുകയാണ് ഇന്ത്യന്‍ വംശജനായ NASA ബഹിരാകാശ സഞ്ചാരി ഡോ. അനില്‍ മേനോന്‍. നവംബര്‍ അഞ്ച് വ്യാഴാഴ്ച കനേഡിയന്‍ ബഹിരാകാശ സഞ്ചാരി ജോഷ്വ കുട്രിക്കിനൊപ്പം ഏഴുമണിക്കൂറോളം നീളുന്ന ബഹിരാകാശ നടത്തം നടത്തും. നിലയത്തിന്റെ വൈദ്യുതോല്‍പാദന ശേഷി വര്‍ധിപ്പിക്കുന്നതിനുള്ള എട്ടാമത്തെയും അവസാനത്തെയും സോളാര്‍ പാനല്‍ സ്ഥാപിക്കുകയാണ് ലക്ഷ്യം.

NASA നവംബര്‍ നാലിന് പുറത്തുവിട്ട ഔദ്യോഗിക അറിയിപ്പ് പ്രകാരം ബഹിരാകാശ നടത്തത്തിനുള്ള അന്തിമ തയ്യാറെടുപ്പുകള്‍ പൂര്‍ത്തിയായി. അമേരിക്കന്‍ ഈസ്റ്റേണ്‍ സമയം രാവിലെ 8.30-നാണ് ദൗത്യം ആരംഭിക്കുക. ചിക്കാഗോ സമയം രാവിലെ 7.30-ന് ആരംഭിക്കുന്ന ബഹിരാകാശ നടത്തത്തിന്റെ തത്സമയ സംപ്രേഷണം രാവിലെ ആറുമുതല്‍ കാണാം.

ഭൂമിയില്‍നിന്ന് ഏകദേശം 420 കിലോമീറ്റര്‍ ഉയരത്തില്‍ സഞ്ചരിക്കുന്ന ബഹിരാകാശ നിലയത്തിന്റെ പുറംഭാഗത്താണ് ഇരുവരും പ്രവര്‍ത്തിക്കുക. കാനഡയുടെ Canadarm2 റോബോട്ടിക് കൈയുടെ സഹായത്തോടെ സോളാര്‍ പാനല്‍ നിര്‍ദിഷ്ട സ്ഥാനത്തെത്തിച്ച് സ്ഥാപിക്കും.

ഒക്ടോബര്‍ 29-ന് ഇതേ സഞ്ചാരികള്‍ ഏഴുമണിക്കൂറും പതിനൊന്ന് മിനിറ്റും നീണ്ട ബഹിരാകാശ നടത്തം വിജയകരമായി പൂര്‍ത്തിയാക്കിയിരുന്നു. അന്ന് ഏഴാമത്തെ സോളാര്‍ പാനലാണ് സ്ഥാപിച്ചത്. നവംബര്‍ അഞ്ചിലെ ദൗത്യം അനില്‍ മേനോന്റെ അഞ്ചാമത്തെയും ജോഷ്വ കുട്രിക്കിന്റെ രണ്ടാമത്തെയും ബഹിരാകാശ നടത്തമായിരിക്കും.

2021-ല്‍ ആരംഭിച്ച സോളാര്‍ പാനല്‍ നവീകരണപദ്ധതിയുടെ അവസാനഘട്ടമാണിത്. എട്ട് പുതിയ പാനലുകളും പ്രവര്‍ത്തനസജ്ജമാകുന്നതോടെ നിലയത്തിന്റെ വൈദ്യുതോല്‍പാദന ശേഷി 160 കിലോവാട്ടില്‍നിന്ന് ഏകദേശം 215 കിലോവാട്ടായി ഉയരും. 30 ശതമാനം വരെ അധിക വൈദ്യുതി ലഭ്യമാകുന്നത് ശാസ്ത്രീയ പരീക്ഷണങ്ങള്‍ക്കും മറ്റ് പ്രധാന സംവിധാനങ്ങള്‍ക്കും സഹായകരമാകും.

മിനസോട്ടയിലെ മിനിയാപൊളിസില്‍ ഇന്ത്യന്‍-യുക്രേനിയന്‍ കുടുംബത്തില്‍ ജനിച്ച അനില്‍ മേനോന്‍ വൈദ്യശാസ്ത്രത്തിലും ബഹിരാകാശ ഗവേഷണത്തിലും ശ്രദ്ധേയമായ പ്രവര്‍ത്തനങ്ങള്‍ നടത്തിയിട്ടുണ്ട്. അടിയന്തര ചികിത്സാവിദഗ്ധനായ അദ്ദേഹം SpaceX-ന്റെ ആദ്യ ഫ്‌ലൈറ്റ് സര്‍ജനായും സേവനമനുഷ്ഠിച്ചിരുന്നു. 2021-ലാണ് NASAയുടെ ബഹിരാകാശ സഞ്ചാരികളുടെ സംഘത്തിലേക്ക് തിരഞ്ഞെടുക്കപ്പെട്ടത്.

നവംബര്‍ അഞ്ചിലെ ദൗത്യം അന്താരാഷ്ട്ര ബഹിരാകാശ നിലയത്തിന്റെ നിര്‍മാണത്തിനും അറ്റകുറ്റപ്പണികള്‍ക്കും നവീകരണത്തിനുമായി നടത്തുന്ന 286-ാമത്തെ ബഹിരാകാശ നടത്തമായിരിക്കും.

ഇന്ത്യന്‍ വംശജനായ അനില്‍ മേനോന്‍ പങ്കെടുക്കുന്ന ഈ ദൗത്യം വിജയകരമായി പൂര്‍ത്തിയാകുന്നതോടെ അന്താരാഷ്ട്ര ബഹിരാകാശ നിലയത്തിന്റെ അഞ്ചുവര്‍ഷം നീണ്ട സോളാര്‍ പാനല്‍ നവീകരണപദ്ധതി പൂര്‍ത്തിയാകും.