ന്യു യോർക്ക്: ന്യൂയോർക്കിലെ ലോംഗ് ഐലൻഡിൽനിന്നുള്ള ഡെമോക്രാറ്റിക് കോൺഗ്രസ് അംഗം ടോം സോസിയുടെ വിജയത്തിനായി ഇന്ത്യൻ അമേരിക്കൻ സമൂഹം നടത്തിയ സംഘടിത പ്രവർത്തനങ്ങൾ  തിരഞ്ഞെടുപ്പ് പ്രചാരണത്തിലെ ശ്രദ്ധേയമായ ഘടകമായി. കോൺഗ്രഷണൽ ഇന്ത്യ കോക്കസിന്റെ വൈസ് ചെയർമാനായ സോസി ഇന്ത്യൻ അമേരിക്കൻ സമൂഹവുമായി അടുത്ത ബന്ധം പുലർത്തുന്ന നേതാവാണ്.  പ്രചാരണത്തിൽ വിവിധ ഇന്ത്യൻ അമേരിക്കൻ സംഘടനകളുടെയും വിഭാഗങ്ങളുടെയും പിന്തുണ ഉറപ്പാക്കാൻ അദ്ദേഹം പ്രത്യേക ശ്രദ്ധ ചെലുത്തി.

ലോംഗ് ഐലൻഡിലെ വലിയ ഇന്ത്യൻ അമേരിക്കൻ ജനസംഖ്യയും അവരുടെ വോട്ടുകൾക്കുള്ള നിർണായക സ്വാധീനവും തിരിച്ചറിഞ്ഞ് സോസിയുടെ പ്രചാരണസംഘം സമൂഹത്തിലേക്കുള്ള പ്രവർത്തനങ്ങൾ ശക്തമാക്കി. ഒക്ടോബർ 13-ന് യൂണിയ്ഡെയിലിലെ ലോംഗ് ഐലൻഡ് മാരിയറ്റിൽ നടന്ന 'ഇന്ത്യൻ അമേരിക്കൻസ് ഫോർ സോസി' പ്രചാരണ സംഗമത്തിൽ 500-ലധികം പേർ പങ്കെടുത്തു.

പഞ്ചാബി, ഗുജറാത്തി, തെലുങ്ക്, തമിഴ്, മറാത്തി വിഭാഗങ്ങളുടെ പ്രതിനിധികൾക്കൊപ്പം ഹിന്ദു, സിഖ്, ക്രൈസ്തവ സമൂഹങ്ങളിലെ അംഗങ്ങളും ബിഎപിഎസ് സംഘടനയുടെ പ്രതിനിധികളും സംഗമത്തിൽ പങ്കെടുത്തു. ഇന്ത്യൻ അമേരിക്കൻ സമൂഹത്തിന്റെ വൈവിധ്യമാണ് അവരുടെ ഏറ്റവും വലിയ ശക്തികളിലൊന്നെന്ന് സോസി പറഞ്ഞു. ഇന്ത്യൻ അമേരിക്കൻ കുടുംബങ്ങൾ തനിക്ക് നൽകിയ സൗഹൃദത്തിനും പിന്തുണയ്ക്കും അദ്ദേഹം നന്ദി രേഖപ്പെടുത്തി.

സോസിയുടെ തിരഞ്ഞെടുപ്പ് പ്രചാരണത്തിൽ മലയാളികൾ നടത്തിയ സജീവമായ ഇടപെടൽ പ്രത്യേകം ശ്രദ്ധേയമായി. മലയാളി സമൂഹത്തിൽനിന്ന് കോശി ഒ. തോമസ്, കളത്തിൽ വർഗീസ്, ജോർജ് എബ്രഹാം, രാജു വർഗീസ്, അലക്സ് എസ്തപ്പാൻ, ക്രിസ് തോപ്പിൽ, ജോൺസൺ സാമുവൽ, ഉഷ ജോർജ്,  എന്നിവർ പ്രചാരണ പ്രവർത്തനങ്ങളിൽ സജീവ പങ്കാളികളായി.

ഏകദേശം മൂന്ന് മാസത്തോളം നീണ്ട പ്രവർത്തനങ്ങളിലൂടെ ഇവർ വോട്ടർമാരെ നേരിട്ട് ബന്ധപ്പെടുകയും സോസിയുടെ നിലപാടുകളും വികസന കാഴ്ചപ്പാടുകളും വിശദീകരിക്കുകയും സമൂഹത്തിന്റെ പിന്തുണ ഉറപ്പാക്കുകയും ചെയ്തു. പ്രചാരണ പരിപാടികൾ സംഘടിപ്പിക്കുന്നതിലും തിരഞ്ഞെടുപ്പ് ദിനത്തിലെ പ്രവർത്തനങ്ങളിലും ഇവർ സജീവമായി പങ്കെടുത്തു. അമേരിക്കൻ തിരഞ്ഞെടുപ്പ് രാഷ്ട്രീയത്തിൽ മലയാളികളുടെ വർധിച്ചുവരുന്ന പങ്കാളിത്തത്തിന്റെ പ്രതിഫലനം കൂടിയായിരുന്നു ഈ ഇടപെടൽ.

ലോംഗ് ഐലൻഡിലുടനീളം സോസിക്ക് പിന്തുണ ഉറപ്പാക്കാൻ ഇന്ത്യൻ അമേരിക്കൻ സംഘടനകൾ നടത്തിയ വിപുലമായ പ്രവർത്തനങ്ങളുടെ ഭാഗമായിരുന്നു മലയാളികളുടെ ഈ മുന്നേറ്റം. വോട്ടർമാർ എന്ന നിലയിൽ മാത്രമല്ല, തിരഞ്ഞെടുപ്പ് പ്രചാരണത്തിന്റെയും താഴെത്തട്ടിലുള്ള രാഷ്ട്രീയ പ്രവർത്തനങ്ങളുടെയും ഭാഗമായും ഇന്ത്യൻ അമേരിക്കൻ സമൂഹം സ്വാധീനം വർധിപ്പിച്ചുവരുന്നതിന്റെ തെളിവുകൂടിയായി ഈ തിരഞ്ഞെടുപ്പ്.

ഇന്ത്യൻ അമേരിക്കൻ സമൂഹവുമായി ബന്ധപ്പെട്ട വിഷയങ്ങളിൽ സോസി നടത്തിയ ഇടപെടലുകളും വോട്ടർമാർക്കിടയിൽ അദ്ദേഹത്തിന് പിന്തുണ വർധിപ്പിക്കാൻ സഹായിച്ചു. ക്ഷേത്രങ്ങളിലും ഗുരുദ്വാരകളിലും സേവനം ചെയ്യുന്ന ഇന്ത്യൻ വംശജരായ പുരോഹിതർക്ക് മതപരമായ വിസാ ആനുകൂല്യങ്ങൾ ഉറപ്പാക്കുന്നതിനുള്ള പിന്തുണ, മതസേവന രംഗത്തുള്ളവർക്ക് ഗ്രീൻ കാർഡ് ലഭ്യമാക്കുന്നതിനുള്ള നിയമനിർമാണത്തെ അനുകൂലിക്കൽ, വിസാ സംബന്ധമായ വെല്ലുവിളികൾ നേരിടുന്ന ഇന്ത്യൻ വംശജരായ ഡോക്ടർമാർക്കും സാങ്കേതിക വിദഗ്ധർക്കും സഹായം നൽകൽ തുടങ്ങിയവ ഇതിൽ ഉൾപ്പെടുന്നു.

അമേരിക്കൻ രാഷ്ട്രീയത്തിൽ ഇന്ത്യൻ അമേരിക്കൻ സമൂഹം നിർണായക ശക്തിയായി വളർന്നുവരുകയാണെന്ന് തിരഞ്ഞെടുപ്പ് ഫലം വീണ്ടും വ്യക്തമാക്കുന്നു. മലയാളികൾ ഉൾപ്പെടെയുള്ള ഇന്ത്യൻ അമേരിക്കക്കാർ വോട്ടർമാർ എന്ന നിലയിൽ മാത്രമല്ല, തിരഞ്ഞെടുപ്പ് പ്രചാരണങ്ങളിലും പ്രാദേശിക രാഷ്ട്രീയ പ്രവർത്തനങ്ങളിലും സജീവ പങ്കാളികളായും സ്വാധീനം ഉറപ്പിക്കുകയാണ്.

അമേരിക്കൻ ഇടക്കാല തിരഞ്ഞെടുപ്പ് ഫലം പ്രസിഡന്റ് ഡൊണാൾഡ് ട്രംപിനും റിപ്പബ്ലിക്കൻ പാർട്ടിക്കും കനത്ത രാഷ്ട്രീയ തിരിച്ചടിയായി. ഹൗസിലും  സെനറ്റിലും ഭൂരിപക്ഷം ഉറപ്പാക്കി ഡെമോക്രാറ്റുകൾ കോൺഗ്രസിന്റെ ഇരുസഭകളുടെയും നിയന്ത്രണം തിരിച്ചുപിടിച്ചു. ട്രംപിന്റെ രണ്ടാം ഭരണകാലത്തെ അവസാന രണ്ടു വർഷങ്ങളിൽ ഭരണകൂടത്തിന്റെ നയങ്ങളെയും തീരുമാനങ്ങളെയും ശക്തമായി ചോദ്യം ചെയ്യാൻ ഇതോടെ പ്രതിപക്ഷത്തിന് അവസരമൊരുങ്ങി.

ജീവിതച്ചെലവിലെ വർധന, പണപ്പെരുപ്പം, ഇറാനുമായുള്ള യുദ്ധം, താരിഫ് നയങ്ങൾ, ഭരണകൂടത്തിനെതിരായ അഴിമതി ആരോപണങ്ങൾ തുടങ്ങിയവയിലുള്ള ജനങ്ങളുടെ അതൃപ്തിയാണ് ഡെമോക്രാറ്റുകളുടെ വിജയത്തിന് പ്രധാന കാരണമായതെന്നാണ് പ്രാഥമിക വിലയിരുത്തൽ. പരമ്പരാഗതമായി റിപ്പബ്ലിക്കൻ പാർട്ടിക്ക് ശക്തമായ സ്വാധീനമുള്ള സംസ്ഥാനങ്ങളിൽപ്പോലും ഡെമോക്രാറ്റുകൾ മുന്നേറ്റം നടത്തിയതും തിരഞ്ഞെടുപ്പ് ഫലത്തിന്റെ രാഷ്ട്രീയ പ്രാധാന്യം വർധിപ്പിക്കുന്നു.

സെനറ്റിൽ നോർത്ത് കരോലിന, സൗത്ത് കരോലിന, ടെക്സസ്, കൻസാസ്, അയോവ, മെയ്ൻ, ഒഹായോ തുടങ്ങിയ സംസ്ഥാനങ്ങളിൽ റിപ്പബ്ലിക്കൻ പാർട്ടിയുടെ സീറ്റുകൾ പിടിച്ചെടുത്താണ് ഡെമോക്രാറ്റുകൾ ഭൂരിപക്ഷം ഉറപ്പിച്ചത്. ഹൗസിൽ  റിപ്പബ്ലിക്കൻ പാർട്ടിയുടെ രണ്ട് ഡസനിലധികം സീറ്റുകളും ഡെമോക്രാറ്റുകൾ സ്വന്തമാക്കി. ഗവർണർ തിരഞ്ഞെടുപ്പുകളിലും പാർട്ടി ശ്രദ്ധേയമായ നേട്ടമുണ്ടാക്കി.

കോൺഗ്രസിന്റെ ഇരുസഭകളുടെയും നിയന്ത്രണം ഡെമോക്രാറ്റുകൾക്ക് ലഭിച്ചതോടെ ട്രംപ് ഭരണകൂടത്തിന് നിയമനിർമാണ അജൻഡകൾ മുന്നോട്ടുകൊണ്ടുപോകുന്നതിൽ വലിയ വെല്ലുവിളികൾ നേരിടേണ്ടിവരും. ഭരണകൂടത്തിന്റെ പ്രവർത്തനങ്ങളെക്കുറിച്ച് കോൺഗ്രസ് അന്വേഷണങ്ങൾ ആരംഭിക്കാനും ഉന്നത ഉദ്യോഗസ്ഥരോട് വിശദീകരണം തേടാനും നയപരമായ തീരുമാനങ്ങൾ തടയാനോ മാറ്റങ്ങൾ ആവശ്യപ്പെടാനോ ഡെമോക്രാറ്റുകൾക്ക് കൂടുതൽ അധികാരമുണ്ടാകും. ഉന്നത സർക്കാർ, ജുഡീഷ്യൽ പദവികളിലേക്കുള്ള നിയമനങ്ങളിലും സെനറ്റിന്റെ നിയന്ത്രണം നിർണായക സ്വാധീനം ചെലുത്തും.