ന്യൂയോര്‍ക്ക്: ഫെഡറേഷന്‍ ഓഫ് മലയാളി അസോസിയേഷന്‍സ് ഓഫ് അമേരിക്കാസ് (FOMAA)യുടെ 2028 കണ്‍വെന്‍ഷന്‍ ചെയറായി ഫിലാഡല്‍ഫിയയില്‍ നിന്നുള്ള മുന്‍ ഫോമാ വൈസ് പ്രസിഡന്റ് ഷാലു പുന്നൂസിനെ തിരഞ്ഞെടുത്തു. FOMAAയുടെ ദേശീയ നേതൃത്വമാണ് ഷാലു പുന്നൂസിനെ ഈ സുപ്രധാന ചുമതലയിലേക്ക് തിരഞ്ഞെടുത്തത്. വിവിധ സംഘടനകളിലും സാമൂഹിക, സാംസ്‌കാരിക, ആരോഗ്യപരിപാലന മേഖലകളിലും ദീര്‍ഘകാലമായി പ്രവര്‍ത്തിച്ചുവരുന്ന ഷാലു പുന്നൂസിന്റെ നേതൃത്വപരിചയം 2028 കണ്‍വെന്‍ഷന്റെ സംഘാടനത്തിന് മുതല്‍ക്കൂട്ടാകുമെന്നാണ് പ്രതീക്ഷ.

FOMAA പ്രസിഡന്റ് ബിജു തോണിക്കടവില്‍, ജനറല്‍ സെക്രട്ടറി പോള്‍ പി. ജോസ്, ട്രഷറര്‍ പ്രദീപ് നായര്‍, വൈസ് പ്രസിഡന്റ് സാമുവല്‍ മത്തായി, ജോയിന്റ് സെക്രട്ടറി ഡോ. മഞ്ജു പിള്ള, ജോയിന്റ് ട്രഷറര്‍ ജോണ്‍സണ്‍ കണ്ണൂക്കാടന്‍ എന്നിവരടങ്ങുന്ന ദേശീയ നേതൃത്വമാണ് നിലവില്‍ FOMAAയുടെ പ്രവര്‍ത്തനങ്ങള്‍ക്ക് നേതൃത്വം നല്‍കുന്നത്. ഈ ദേശീയ നേതൃത്വത്തിന്റെ തീരുമാനത്തിലൂടെയാണ് ഷാലു പുന്നൂസിനെ 2028 കണ്‍വെന്‍ഷന്‍ ചെയറായി തിരഞ്ഞെടുത്തിരിക്കുന്നത്. അതുകൊണ്ടുതന്നെ അദ്ദേഹത്തിന്റെ ചുമതല FOMAAയുടെ ദേശീയ തലത്തിലുള്ള പ്രധാന ഉത്തരവാദിത്വമായാണ് വിലയിരുത്തപ്പെടുന്നത്.

സെന്റ് ജോര്‍ജ് ഓര്‍ത്തഡോക്‌സ് ദേവാലയത്തില്‍ ട്രസ്റ്റിയായാണ് ഷാലു പുന്നൂസ് സാമൂഹിക പ്രവര്‍ത്തനരംഗത്ത് സജീവമാകുന്നത്. എക്കുമെനിക്കല്‍ ഫെലോഷിപ്പ് ഓഫ് ഇന്ത്യന്‍ ചര്‍ച്ചസില്‍ ട്രസ്റ്റി സെക്രട്ടറിയായും അദ്ദേഹം പ്രവര്‍ത്തിച്ചിട്ടുണ്ട്. മലയാളി അസോസിയേഷന്‍ ഓഫ് ഗ്രേറ്റര്‍ ഫിലാഡല്‍ഫിയയുടെ പ്രസിഡന്റായും FOMAA നാഷണല്‍ കമ്മിറ്റി അംഗമായും FOMAA വൈസ് പ്രസിഡന്റായും പ്രവര്‍ത്തിച്ചിട്ടുള്ള ഷാലു പുന്നൂസിന് സംഘടനാ രംഗത്ത് വിപുലമായ അനുഭവസമ്പത്തുണ്ട്.

ഫിലാഡല്‍ഫിയയിലെ ബഡി ബോയ്‌സ് ഫിലാഡല്‍ഫിയയുടെ സ്ഥാപകനായ അദ്ദേഹം ഫിലാഡല്‍ഫിയ പോലീസ് അഡൈ്വസറി ബോര്‍ഡ് അംഗം, മോണ്ട്‌ഗോമറി കൗണ്ടി ഹെല്‍ത്ത് അഡൈ്വസറി കമ്മിറ്റി അംഗം എന്നീ നിലകളിലും പ്രവര്‍ത്തിച്ചിട്ടുണ്ട്.

ആരോഗ്യപരിപാലന രംഗത്തും ഷാലു പുന്നൂസിന് വിപുലമായ പ്രവര്‍ത്തന പരിചയമുണ്ട്. ഫിലാഡല്‍ഫിയ കറക്ഷന്‍ ഡിപ്പാര്‍ട്ട്‌മെന്റില്‍ നഴ്‌സായി സേവനമനുഷ്ഠിച്ച അദ്ദേഹം ഹോം കെയര്‍, അഡള്‍ട്ട് ഡേ കെയര്‍ മേഖലകളില്‍ സംരംഭകനായും പ്രവര്‍ത്തിക്കുന്നു.

സാമൂഹിക-സംഘടനാ പ്രവര്‍ത്തനങ്ങള്‍ക്കൊപ്പം കലാരംഗത്തും സാന്നിധ്യമറിയിച്ചിട്ടുള്ള ഷാലു പുന്നൂസ് രണ്ട് സിനിമകളില്‍ അഭിനയിച്ചിട്ടുണ്ട്.

2028-ലെ FOMAA കണ്‍വെന്‍ഷന്റെ സംഘാടന പ്രവര്‍ത്തനങ്ങള്‍ക്ക് ഷാലു പുന്നൂസിന്റെ നേതൃത്വത്തില്‍ തുടക്കം കുറിക്കും. അമേരിക്കന്‍ മലയാളി സമൂഹത്തിന്റെ വിവിധ മേഖലകളെ ഒരുമിപ്പിക്കുന്ന ദേശീയ വേദിയെന്ന നിലയില്‍ കണ്‍വെന്‍ഷനെ വിജയകരമാക്കുന്നതിനുള്ള പ്രവര്‍ത്തനങ്ങള്‍ക്കായിരിക്കും ഇനി മുന്‍ഗണന.

ഷാലു പുന്നൂസിന്റെ തിരഞ്ഞെടുപ്പിനെ FOMAA ദേശീയ ഭാരവാഹികളും വിവിധ അംഗസംഘടനാ പ്രതിനിധികളും അഭിനന്ദിച്ചു.