ഹൂസ്റ്റണ്‍: സാഹിത്യത്തെ കേവലം ആസ്വാദനത്തിനുള്ള ഉപാധിയായി കാണാതെ സമൂഹത്തിന്റെ വളര്‍ച്ചയ്ക്കും മനുഷ്യജീവിതത്തിന്റെ ഗുണപരമായ മാറ്റങ്ങള്‍ക്കും വഴിയൊരുക്കുന്ന ശക്തിയായി വിലയിരുത്തി കേരള റൈറ്റേഴ്‌സ് ഫോറത്തിന്റെ ഒക്ടോബര്‍ മാസത്തെ സാഹിത്യസംഗമം. സാമൂഹികവും സാംസ്‌കാരികവുമായ വിഷയങ്ങള്‍ ചര്‍ച്ചചെയ്ത യോഗം, എഴുത്തും വായനയും സംവാദങ്ങളും സമൂഹത്തില്‍ സൃഷ്ടിക്കുന്ന സ്വാധീനത്തെക്കുറിച്ചുള്ള ശ്രദ്ധേയമായ ആശയവിനിമയത്തിന് വേദിയായി.

ഒക്‌ടോബര്‍ മാസം മനോഹരമാണല്ലേ..? പ്രകൃതിയുടെ ശാന്തമായ ശരത്കാല സായാഹ്നങ്ങള്‍! ഇനീം, മാസാവസാനമാകുമ്പോഴേയ്ക്കും പ്രേതോത്സവക്കാലവും..! ചില നഗരങ്ങളില്‍ ഡെവിള്‍സ് രാവും ആഘോഷിക്കാറുണ്ട്. പിന്നെ, നവംബര്‍ ഒന്ന് വിശുദ്ധന്മാരുടെ ദിനമാണെങ്കില്‍ അതിനു തലേന്ന് 'ഹാവോലിന്‍' നവംബര്‍ രണ്ട് എല്ലാ ആത്മാക്കളുടെ ദിനവും. അങ്ങനെ  ഇഹലോകവാസികളും പരലോകവാസികളും ഒത്തു ചേര്‍ന്ന് വിചിത്രമായ ഒരു ആഘോഷകാലം. ഇതിന്റെ മേളങ്ങള്‍ തുടങ്ങിയിടത്താണ് നമ്മള്‍ ഇപ്പോള്‍.

ഒക്ടോബര്‍ മാസം മലയാളികള്‍ക്ക് പ്രത്യേക പ്രാധാന്യമുള്ള കാലയളവാണെന്ന ചിന്തയോടെയാണ് യോഗത്തിലെ ചര്‍ച്ചകള്‍ മുന്നോട്ടുപോയത്. നവംബര്‍ ഒന്നിന് കേരളപ്പിറവി ദിനം അടുത്തുവരുന്ന ഈ കാലയളവ്, മലയാളികളുടെ ഭാഷാപൈതൃകത്തെയും സാംസ്‌കാരിക സ്വത്വത്തെയും ഓര്‍മിപ്പിക്കുന്ന അവസരമായി അവതരിപ്പിക്കപ്പെടുന്നു. ജീവിതത്തെയും സമൂഹത്തെയും സര്‍വോപരി പ്രകൃതിയെയും സാഹിത്യത്തിന്റെ കണ്ണിലൂടെ വിലയിരുത്താനും സാംസ്‌കാരിക പുരോഗതിയെക്കുറിച്ച് ചിന്തിക്കാനും ഇത്തരം സന്ദര്‍ഭങ്ങള്‍ പ്രചോദനമാകുന്നു. സാഹിത്യവും കലയും മനുഷ്യജീവിതത്തില്‍ ചെലുത്തുന്ന സ്വാധീനത്തെക്കുറിച്ചുള്ള ചര്‍ച്ചകള്‍ക്ക് പ്രാധാന്യം നല്‍കിക്കൊണ്ട്, സമകാലിക സമൂഹത്തിന്റെ ചിന്താഗതികളും സാംസ്‌കാരിക മാറ്റങ്ങളും വിലയിരുത്താനുള്ള വേദിയായി മസാല ഹട്ട് റസ്റ്റേറന്റിലെ ഒക്ടോബര്‍ മാസ സംഗമം മാറി.

കേരള റൈറ്റേഴ്‌സ് ഫോറത്തിന്റെ സാഹിത്യചര്‍ച്ചയ്ക്ക് തുടക്കമിട്ട പ്രധാന ചോദ്യം ശ്രദ്ധേയമായിരുന്നു: ടി.വി. സീരിയലുകള്‍ സമൂഹത്തിന് ഗുണമാണോ ദോഷമാണോ..? സാംസ്‌കാരിക പുരോഗതിയാണോ ജീര്‍ണതയാണോ അവ സൃഷ്ടിക്കുന്നത്..? സമൂഹത്തെ വളര്‍ത്തുകയാണോ അതോ തളര്‍ത്തുകയാണോ..?

സാഹിത്യ-സാമൂഹിക വിഷയങ്ങള്‍ ഗൗരവമായി അവതരിപ്പിക്കുന്ന എ.സി ജോര്‍ജാണ് ഈ വിഷയം ചര്‍ച്ചയ്ക്കായി മുന്നോട്ടുവച്ചത്. ടെലിവിഷന്‍ പരമ്പരകള്‍ കുടുംബജീവിതത്തിലും വ്യക്തികളുടെ ചിന്താഗതിയിലും ചെലുത്തുന്ന സ്വാധീനം, മാനസികാരോഗ്യം, യാഥാര്‍ഥ്യബോധം, സാമൂഹിക സമീപനം തുടങ്ങിയ വിവിധ തലങ്ങളിലൂടെ വിഷയം വിലയിരുത്തപ്പെട്ടു. ജീവിതത്തിലെ പ്രതിസന്ധികള്‍ നേരിടുന്നതിനും ദൈനംദിന ജീവിതസമ്മര്‍ദങ്ങളില്‍നിന്ന് ആശ്വാസം കണ്ടെത്തുന്നതിനും കലയും സാഹിത്യവും എങ്ങനെ സഹായകമാകുന്നു എന്നതും ചര്‍ച്ചയുടെ ഭാഗമായി. ജോസഫ് തച്ചാറ, ഡോളി കാച്ചപ്പിള്ളി, സെന്നി ഉമ്മന്‍, തെരേസ ടോം, മോട്ടി മാത്യു, ഡോ. ജോസഫ് പൊന്നോലി, സുരേന്ദ്രന്‍ നായര്‍, ബോബി മാത്യു തുടങ്ങിയവര്‍ ചര്‍ച്ചയില്‍ പങ്കെടുത്തു. വിഷയത്തിന്റെ വിവിധ വശങ്ങള്‍ അവതരിപ്പിച്ച അംഗങ്ങള്‍ തങ്ങളുടെ നിരീക്ഷണങ്ങളും അഭിപ്രായങ്ങളും പങ്കുവെച്ചു.

സാഹിത്യസംഗമത്തിന്റെ ഭാഗമായി കവിതയ്ക്കും കഥയ്ക്കും പ്രത്യേക പ്രാധാന്യം നല്‍കി. മുക്തകവിതയുടെ ആവിഷ്‌കാരസാധ്യതകളും കഥകളിലൂടെ ജീവിതാനുഭവങ്ങള്‍ അവതരിപ്പിക്കുന്ന രീതികളും ചര്‍ച്ചചെയ്തു. എഴുത്തിന്റെ വൈവിധ്യവും അവതരണത്തിലെ പുതുമയും സാഹിത്യസൃഷ്ടികള്‍ക്ക് നല്‍കുന്ന സ്വാധീനവും അംഗങ്ങള്‍ വിലയിരുത്തി.

പ്രവാസജീവിതത്തിന്റെ പശ്ചാത്തലത്തില്‍ അമേരിക്കയിലെ മലയാളി സമൂഹത്തിന്റെ ബൗദ്ധികവും സാംസ്‌കാരികവുമായ വളര്‍ച്ചയ്ക്കും ഇത്തരം സംഗമങ്ങള്‍ സഹായകമാകുന്നുവെന്ന സന്ദേശവും യോഗം മുന്നോട്ടുവച്ചു. സാഹിത്യസൃഷ്ടികള്‍ വായനക്കാരില്‍ ചിന്തയുണര്‍ത്തുകയും വ്യത്യസ്ത കാഴ്ചപ്പാടുകള്‍ പരിചയപ്പെടുത്തുകയും സമൂഹത്തെ കൂടുതല്‍ ആഴത്തില്‍ മനസ്സിലാക്കാന്‍ സഹായിക്കുകയും ചെയ്യുന്നു. അതുകൊണ്ടുതന്നെ സാഹിത്യചര്‍ച്ചകള്‍ എഴുത്തുകാരുടെ ഒത്തുചേരലുകള്‍ മാത്രമല്ല, ആശയങ്ങള്‍ കൈമാറുന്നതിനും പരസ്പരബോധം വളര്‍ത്തുന്നതിനുമുള്ള വേദികളുമാണ്.

കേരള റൈറ്റേഴ്‌സ് ഫോറം സെക്രട്ടറി മോട്ടി മാത്യു യോഗത്തില്‍ അധ്യക്ഷത വഹിച്ചു. സാഹിത്യസെഷന്റെ മോഡറേറ്ററായി ജോണ്‍ മാത്യു പ്രവര്‍ത്തിച്ചു. സെന്നി ഉമ്മന്‍ വീഡിയോ ചിത്രീകരണവും മോട്ടി മാത്യു ഫോട്ടോഗ്രാഫിയും നിര്‍വഹിച്ചു. ജോണ്‍ മാത്യു നന്ദി രേഖപ്പെടുത്തി. സാഹിത്യവും സാമൂഹികജീവിതവും തമ്മിലുള്ള ബന്ധം തിരിച്ചറിയാനും സമകാലിക വിഷയങ്ങളെ വിമര്‍ശനാത്മകമായി സമീപിക്കാനും അവസരമൊരുക്കിയ ഒക്ടോബര്‍ സംഗമം, മലയാളികളുടെ ഈ സര്‍ഗ സാഹിത്യ സാംസ്‌കാരിക കൂട്ടായ്മയില്‍ കേരള റൈറ്റേഴ്‌സ് ഫോറം വഹിക്കുന്ന പങ്ക് വീണ്ടും അടയാളപ്പെടുത്തി.