കോട്ടയം: വൈദ്യശാസ്ത്രരംഗത്തും പൊതുജനാരോഗ്യ മേഖലയിലും ദീർഘകാലമായി പ്രവർത്തിക്കുന്ന അമേരിക്കൻ മലയാളി ഡോ. ജേക്കബ് ഈപ്പന് കണ്ടത്തിൽ കുടുംബത്തിന്റെ ലൈഫ് ടൈം അച്ചീവ്‌മെന്റ് പുരസ്‌കാരം. ഒക്ടോബർ 20-ന് ചങ്ങനാശേരി കോണ്ടൂർ റിസോർട്ടിൽ നടന്ന 136-ാമത് കണ്ടത്തിൽ കുടുംബയോഗത്തിലാണ് പുരസ്‌കാരം സമ്മാനിച്ചത്. 800-ലധികം കുടുംബാംഗങ്ങൾ പങ്കെടുത്ത സംഗമത്തിൽ അമേരിക്ക, കാനഡ തുടങ്ങിയ രാജ്യങ്ങളിൽനിന്നുള്ള പ്രതിനിധികളും സന്നിഹിതരായി. പ്രസിഡന്റ് മോഹൻ വർഗീസിന്റെ നേതൃത്വത്തിലായിരുന്നു ഈ വർഷത്തെ കുടുംബയോഗം.

കണ്ടത്തിൽ ചാക്കോ ഈപ്പന്റെ മകനാണ് ഡോ. ജേക്കബ് ഈപ്പൻ. കുടുംബയോഗത്തിന്റെ നോർത്ത് അമേരിക്കൻ കോർഡിനേറ്ററായും അദ്ദേഹം പ്രവർത്തിച്ചു.

136 വർഷത്തെ കുടുംബപാരമ്പര്യം

തിരുവല്ലയിൽ വേരുകളുള്ള കണ്ടത്തിൽ കുടുംബം തലമുറകളിലൂടെ വ്യാപിച്ച് ആറു പ്രധാന ശാഖകളായി വളർന്നു. കുടുംബവൃക്ഷത്തിലെ മോണോത്ത് ശാഖയിലാണ് ഡോ. ജേക്കബ് ഈപ്പൻ ഉൾപ്പെടുന്നത്. കുടുംബത്തിലെ ആറു ശാഖകളിലായി ആറു പത്മ പുരസ്‌കാര ജേതാക്കളുണ്ടെന്നതും സവിശേഷമായ അപൂർവ്വതയാണ്.

കുടുംബചരിത്രവും പാരമ്പര്യവും പുതുതലമുറയ്ക്ക് പരിചയപ്പെടുത്തുന്നതിനും കുടുംബാംഗങ്ങളുടെ നേട്ടങ്ങൾ ആദരിക്കുന്നതിനുമുള്ള വേദിയാണ് വാർഷിക സംഗമം. വിവിധ ശാഖകളുടെ നേതൃത്വത്തിൽ കലാപരിപാടികളും മത്സരങ്ങളും സംഘടിപ്പിക്കാറുണ്ട്.

വൈദ്യസേവനവും പൊതുജനാരോഗ്യവും

ഇന്ത്യയിൽ വൈദ്യപഠനം പൂർത്തിയാക്കിയ ഡോ. ജേക്കബ് ഈപ്പൻ ടാൻസാനിയയിലെ ദാർ എസ് സലാമിലും നൈജീരിയയിലും സേവനമനുഷ്ഠിച്ചശേഷം അമേരിക്കയിലെത്തി പൊതുജനാരോഗ്യത്തിൽ ഉപരിപഠനം നടത്തി.

കാലിഫോർണിയയിലെ അലമേഡ കൗണ്ടി ഹെൽത്ത് സിസ്റ്റത്തിൽ 29 വർഷത്തോളം ശിശുരോഗവിദഗ്ധനായി പ്രവർത്തിച്ച അദ്ദേഹം പത്തുവർഷം മെഡിക്കൽ ഡയറക്ടറായും സേവനമനുഷ്ഠിച്ചു. കുട്ടികളുടെ ആരോഗ്യസംരക്ഷണത്തിനും സാമ്പത്തികമായി പിന്നാക്കം നിൽക്കുന്ന കുടുംബങ്ങളിലെ കുട്ടികൾക്ക് ചികിത്സ ലഭ്യമാക്കുന്നതിനും അദ്ദേഹം പ്രത്യേക ശ്രദ്ധ നൽകി.

ഐക്യരാഷ്ട്രസഭയുടെ അഭയാർഥികൾക്കായുള്ള ഹൈക്കമ്മീഷണറുടെ (UNHCR) പബ്ലിക് ഹെൽത്ത് അഡ്വൈസറായി പ്രവർത്തിച്ച ആദ്യ ഏഷ്യൻ വംശജനായ ഡോക്ടർ എന്ന പ്രത്യേകതയും അദ്ദേഹത്തിനുണ്ട്. അഭയാർഥി ക്യാമ്പുകളിലെ ആരോഗ്യസംരക്ഷണ പ്രവർത്തനങ്ങളിലും പങ്കാളിയായി.

നോർത്തേൺ കാലിഫോർണിയയിൽ പൊതുതിരഞ്ഞെടുപ്പിലൂടെ വിജയിച്ച ആദ്യ ഇന്ത്യക്കാരനെന്ന നേട്ടവും ഡോ. ഈപ്പനുണ്ട്. കാലിഫോർണിയയിലെ വാഷിംഗ്ടൺ ഹോസ്പിറ്റലിന്റെ ഡയറക്ടർ ബോർഡിൽ പ്രവർത്തിക്കുന്ന അദ്ദേഹം എട്ടാം തവണയും എതിരില്ലാതെ തിരഞ്ഞെടുക്കപ്പെട്ടു. നിലവിൽ ഫൊക്കാന ഇന്റർനാഷണലിന്റെ കോർഡിനേറ്ററായും പ്രവർത്തിക്കുന്നു.

അംഗീകാരങ്ങൾ

'എലിസ് ഐലൻഡ് മെഡൽ ഓഫ് ഓണർ', കാലിഫോർണിയ മെഡിക്കൽ ബോർഡിന്റെ ഫിസിഷ്യൻ റെക്കഗ്നിഷൻ അവാർഡ്, സ്റ്റാൻഫഡ് സർവകലാശാലയുടെ ഔട്ട്സ്റ്റാൻഡിങ് അലുംനി അംഗീകാരം എന്നിവ ഡോ. ഈപ്പന് ലഭിച്ചിട്ടുണ്ട്. തിരുവനന്തപുരം മെഡിക്കൽ കോളജിന്റെ വിശിഷ്ട പൂർവവിദ്യാർഥി പുരസ്‌കാരം, കഴക്കൂട്ടം സൈനിക് സ്കൂളിന്റെ ലൈഫ് ടൈം അച്ചീവ്‌മെന്റ് അവാർഡ്, ഫൊക്കാനയുടെ അംഗീകാരം എന്നിവയും പ്രധാന ബഹുമതികളാണ്.

കുടുംബം
ഭാര്യ ഷേർളി ജേക്കബ്. മകൻ ഡോ. നവീൻ ജേക്കബ്, മകൾ ഡോ.സന്ധ്യയും ഭർത്താവ് ഡോ. റയാനും. ഐസക്, ഈതൻ, എയ്റൺ എന്നിവരാണ് കൊച്ചുമക്കൾ.