ഒഹായോ: അമേരിക്കയിലെ ഹിന്ദു സമൂഹത്തെക്കുറിച്ച് തെറ്റായ വിവരങ്ങളും മുൻവിധികളും പ്രചരിക്കുന്നതിനെതിരെ ശബ്ദമുയർത്തി ഇന്ത്യൻ-അമേരിക്കൻ വിദ്യാഭ്യാസ പ്രവർത്തകയും വിരമിച്ച അധ്യാപികയുമായ രജനി ഹർഷ്. ഹിന്ദു മതത്തെയും വിശ്വാസങ്ങളെയും കുറിച്ചുള്ള തെറ്റിദ്ധാരണകൾ മാറ്റാൻ നേരിട്ടുള്ള ഇടപെടലുകളും പരസ്പര സംവാദങ്ങളും അനിവാര്യമാണെന്ന് അവർ പറഞ്ഞു.

ഒഹായോയിലെ ഹാമിൽട്ടൺ കൗണ്ടിയിലുള്ള ഇന്ത്യൻ ഹിൽ സിറ്റി കൗൺസിൽ യോഗത്തിൽ സംസാരിക്കുകയായിരുന്നു രജനി ഹർഷ്. അമേരിക്കൻ ഹിന്ദു സമൂഹത്തിന്റെ അവകാശങ്ങൾക്കായി പ്രവർത്തിക്കുന്ന ലാഭേച്ഛയില്ലാത്ത സംഘടനയായ ഹിന്ദുആക്ഷൻ (HinduACTion) ആണ് ഇക്കാര്യം അറിയിച്ചത്. ഇന്ത്യൻ ഹിൽ വില്ലേജ് മേയർ റിച്ച് ഹൈഡിയും ഹിന്ദു സമൂഹത്തിന് പിന്തുണ പ്രഖ്യാപിച്ചു.

സാമൂഹിക മാധ്യമങ്ങളിലൂടെയും ചില മുൻവിധികളിലൂടെയും പരിമിതമായ അറിവിലൂടെയുമാണ് പല അമേരിക്കക്കാരും ഹിന്ദുമതത്തെക്കുറിച്ച് ധാരണ രൂപപ്പെടുത്തുന്നതെന്ന് രജനി ഹർഷ് ചൂണ്ടിക്കാട്ടി. പരിചിതമല്ലാത്ത മതവിശ്വാസങ്ങളെയും ആചാരങ്ങളെയും ശരിയായി മനസ്സിലാക്കാൻ അവയുടെ പശ്ചാത്തലം അറിയുകയും വിശ്വാസികളുമായി ആശയവിനിമയം നടത്തുകയും വേണം. അല്ലാത്തപക്ഷം തെറ്റായ ധാരണകൾ സമൂഹത്തിന്റെ കാഴ്ചപ്പാടുകളെ സ്വാധീനിക്കുമെന്നും അവർ മുന്നറിയിപ്പ് നൽകി.

ഹിന്ദു കുടുംബങ്ങൾ പൊതുവെ പുലർത്തുന്ന മൂല്യങ്ങൾ എല്ലാവർക്കും പരിചിതവും സ്വീകാര്യവുമാണെന്ന് അവർ വിശദീകരിച്ചു. ധർമം എന്ന ഹിന്ദു സങ്കൽപ്പത്തിലൂടെ പ്രതിഫലിക്കുന്ന സത്യസന്ധത, ധാർമികത, കുടുംബത്തോടും സമൂഹത്തോടുമുള്ള ഉത്തരവാദിത്തം, മാതാപിതാക്കളോടും മുതിർന്നവരോടുമുള്ള ആദരവ്, സാമൂഹിക സേവനം, ആത്മനിയന്ത്രണം, കൃതജ്ഞത, ജീവജാലങ്ങളോടുള്ള ആദരവ്, സ്വന്തം പ്രവൃത്തികൾക്ക് ഉത്തരവാദിത്തം ഏറ്റെടുക്കൽ തുടങ്ങിയ മൂല്യങ്ങൾ അവർ എടുത്തുപറഞ്ഞു.

ഹിന്ദു ആരാധനാരീതികളെയും മതചിഹ്നങ്ങളെയും കുറിച്ചുള്ള തെറ്റിദ്ധാരണകളും രജനി ഹർഷ് വിശദീകരിച്ചു. ദൈവികത അനന്തവും ഒരു രൂപത്തിൽ മാത്രം ഒതുങ്ങാത്തതുമാണെന്നാണ് ഹിന്ദുക്കൾ വിശ്വസിക്കുന്നതെന്ന് അവർ പറഞ്ഞു. ക്ഷേത്രങ്ങളിലെ വിഗ്രഹങ്ങളും പവിത്രമായ പ്രതീകങ്ങളും പ്രാർഥനയിലും ധ്യാനത്തിലും ആത്മീയ ഏകാഗ്രത കൈവരിക്കാനും ദൈവികതയുമായി ബന്ധം സ്ഥാപിക്കാനും സഹായിക്കുന്നവയാണെന്നും അവർ കൂട്ടിച്ചേർത്തു.

ജാതിവ്യവസ്ഥയെക്കുറിച്ച് സംസാരിക്കവേ, സങ്കീർണമായ ചരിത്രത്തെ ലളിതമായ പൊതുവൽക്കരണങ്ങളിലൂടെ വിലയിരുത്തരുതെന്ന് അവർ ആവശ്യപ്പെട്ടു. ജാതി എന്ന പദത്തിന്റെ ഉത്ഭവവും കൊളോണിയൽ കാലഘട്ടത്തിലെ വർഗീകരണങ്ങൾ സാമൂഹിക വിഭാഗങ്ങളെ ഔദ്യോഗികമായി നിർവചിക്കുന്നതിൽ വഹിച്ച പങ്കും അവർ ചൂണ്ടിക്കാട്ടി.

അമേരിക്കൻ സമൂഹത്തിൽ ഹിന്ദുക്കൾ നൽകുന്ന സംഭാവനകളും രജനി ഹർഷ് എടുത്തുപറഞ്ഞു. വൈദ്യശാസ്ത്രം, വിദ്യാഭ്യാസം, എൻജിനീയറിങ്, ഗവേഷണം, ബിസിനസ്, പൊതുസേവനം തുടങ്ങി വിവിധ മേഖലകളിൽ ഹിന്ദു വംശജർ സജീവമായി പ്രവർത്തിക്കുന്നുണ്ട്. സ്വന്തം തൊഴിൽരംഗത്തെ സംഭാവനകൾക്കൊപ്പം പ്രാദേശിക സമൂഹങ്ങളിൽ സന്നദ്ധസേവനത്തിലും അവർ പങ്കാളികളാകുന്നുണ്ടെന്നും അവർ വ്യക്തമാക്കി.

മതപരമായ തത്ത്വചിന്തകളിൽ എല്ലാവരും ഒരേ അഭിപ്രായം പുലർത്തണമെന്നല്ല തന്റെ ആവശ്യമെന്നും പരസ്പര ബഹുമാനത്തോടെയും തുറന്ന മനസ്സോടെയും ഹിന്ദു സമൂഹത്തെ മനസ്സിലാക്കണമെന്നുമാണ് അഭ്യർഥനയെന്നും രജനി ഹർഷ് വ്യക്തമാക്കി. നേരിട്ടുള്ള മനുഷ്യബന്ധങ്ങളിലൂടെയും ആത്മാർഥമായ അന്വേഷണങ്ങളിലൂടെയും ഹിന്ദുക്കളെ മനസ്സിലാക്കാൻ കഴിയുമെന്ന പ്രതീക്ഷയും അവർ പങ്കുവച്ചു.