ഡൽഹിയിൽ ദസ്‌റ ആഘോഷങ്ങളുടെ ഭാഗമായി രാവണന്റെയും കുംഭകർണ്ണന്റെയും കോലങ്ങൾക്കൊപ്പം പാറ്റയുടെ കോലവും കത്തിച്ച സംഭവത്തിൽ സംഘാടകർക്കും ബിജെപി നേതാക്കൾക്കുമെതിരെ രൂക്ഷവിമർശനവുമായി ആം ആദ്മി പാർട്ടി. 

എഎപി ഡൽഹി പ്രസിഡന്റ് സൗരഭ് ഭരദ്വാജ് ഇതുസംബന്ധിച്ച് ഡൽഹി ലഫ്റ്റനന്റ് ഗവർണർ തരൺജിത്ത് സിങ് സന്ധുവിനും ഡൽഹി പോലീസ് കമ്മീഷണർക്കും പരാതി നൽകി. ബിജെപി എംഎൽഎ അശോക് ഗോയൽ അധ്യക്ഷനായ ശ്രീ കേശവ് രാംലീല കമ്മിറ്റി സംഘടിപ്പിച്ച പരിപാടിക്കെതിരെയാണ് നിയമനടപടി ആവശ്യപ്പെട്ടിരിക്കുന്നത്. 

ചൊവ്വാഴ്ച (ഒക്ടോബർ 20) രാത്രി നടന്ന പരിപാടിയിൽ രാവണൻ, കുംഭകർണ്ണൻ, മേഘനാഥൻ എന്നിവരുടെ പരമ്പരാഗത കോലങ്ങൾക്കൊപ്പമാണ് 30 അടി ഉയരമുള്ള പാറ്റയുടെ കോലവും അഗ്നിക്കിരയാക്കിയത്. ഡൽഹി മന്ത്രി കപിൽ മിശ്രയാണ് പാറ്റയുടെ കോലത്തിന് തീയിട്ടത്.

ദസ്‌റ ആഘോഷത്തിന്റെ സംഘാടകർ മനപ്പൂർവ്വം ജനങ്ങളുടെ മതവികാരം വ്രണപ്പെടുത്തുകയും പവിത്രമായ ഹൈന്ദവ ആചാരങ്ങളിൽ അനാവശ്യ മാറ്റങ്ങൾ വരുത്തി വിവിധ ജനവിഭാഗങ്ങൾക്കിടയിൽ ശത്രുത വളർത്താൻ ശ്രമിക്കുകയുമാണെന്ന് സൗരഭ് ഭരദ്വാജ് പരാതിയിൽ ആരോപിച്ചു. 

സംഭവത്തിൽ ബിജെപി എംഎൽഎ അശോക് ഗോയൽ, മന്ത്രി കപിൽ മിശ്ര ഉൾപ്പെടെയുള്ള സംഘാടകർക്കെതിരെ ഉടൻ തന്നെ എഫ്ഐആർ രജിസ്റ്റർ ചെയ്യണമെന്നും, പാറ്റയെ കത്തിക്കുന്ന ദൃശ്യങ്ങൾ സമൂഹമാധ്യമ പ്ലാറ്റ്‌ഫോമുകളിൽ നിന്ന് എത്രയും വേഗം നീക്കം ചെയ്യണമെന്നും അദ്ദേഹം ആവശ്യപ്പെട്ടു.

എസ്ഐആർ ക്രമക്കേട് ആരോപണങ്ങളിൽ മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് കോക്റോച്ച് ജനതാ പാർട്ടി ശക്തമായ പ്രതിഷേധം നടത്തിയതിന് തൊട്ടുപിന്നാലെയാണ് ഈ സംഭവം അരങ്ങേറിയത്. വീടുകളിലും സമൂഹത്തിലും നിന്ന് മാലിന്യം പൂർണ്ണമായും ഇല്ലാതാക്കേണ്ടതിന്റെ ആവശ്യകത ജനങ്ങളെ ബോധ്യപ്പെടുത്താനാണ് പാറ്റയുടെ കോലം കത്തിച്ചതെന്നായിരുന്നു അശോക് ഗോയലിന്റെ വിശദീകരണം.