വാഷിങ്ടൺ: റഷ്യയിലേക്ക് യാത്ര ചെയ്തെന്ന വാർത്ത പിൻവലിച്ചതിൽ അമേരിക്കൻ മാധ്യമസ്ഥാപനമായ എംഎസ് നൗ (MS NOW) മാപ്പപേക്ഷ നടത്തണമെന്ന് എഫ്ബിഐ ഡയറക്ടർ കാഷ് പട്ടേൽ. താൻ റഷ്യയിലിറങ്ങിയെന്ന രണ്ട് അജ്ഞാത സ്രോതസ്സുകളെ ഉദ്ധരിച്ചുള്ള റിപ്പോർട്ട് തെറ്റാണെന്ന് തെളിഞ്ഞതിനെത്തുടർന്നാണ് പട്ടേലിന്റെ പ്രതികരണം.

താൻ റഷ്യയിലായിരുന്നില്ലെന്നും വിർജീനിയയിലെ ലിബർട്ടി സർവകലാശാലയിൽ നിയമപാലകരെ ആദരിക്കുന്ന ചടങ്ങിൽ പങ്കെടുക്കുകയായിരുന്നെന്നും പട്ടേൽ എക്സിൽ കുറിച്ചു. തെറ്റായ റിപ്പോർട്ട് തിരുത്തിയ മാധ്യമസ്ഥാപനം എഫ്ബിഐയോടും നിയമപാലക സമൂഹത്തോടും അമേരിക്കൻ ജനതയോടും മാപ്പുപറയണമെന്നും അദ്ദേഹം ആവശ്യപ്പെട്ടു.ഒക്ടോബർ 14-ന് എംഎസ് നൗ ലേഖകൻ കെൻ ഡിലാനിയൻ രണ്ട് സ്രോതസ്സുകളെ ഉദ്ധരിച്ച് പട്ടേൽ റഷ്യയിലെത്തിയതായി റിപ്പോർട്ട് ചെയ്തിരുന്നു. എന്നാൽ, ഏകദേശം രണ്ട് മണിക്കൂറിനുശേഷം റിപ്പോർട്ട് തെറ്റാണെന്ന് ചാനൽ തിരുത്തി. തെറ്റായ വിവരം നൽകിയതിൽ ഖേദിക്കുന്നതായി ലേഖകൻ സംപ്രേഷണത്തിനിടെ അറിയിച്ചു.

അതേസമയം, വാർത്ത ചോർത്തിയവരെ കണ്ടെത്താനുള്ള ശ്രമം എഫ്ബിഐ തുടരുകയാണെന്ന് ഒരു ഉദ്യോഗസ്ഥൻ ഫോക്സ് ന്യൂസ് ഡിജിറ്റലിനോട് പറഞ്ഞു. വിവരങ്ങൾ ചോർത്തിയ രണ്ടുപേരെയും തിരിച്ചറിയാൻ കഴിയുമെന്നാണ് പ്രതീക്ഷയെന്നും അദ്ദേഹം വ്യക്തമാക്കി.

പട്ടേലിന്റെ ക്രിമിനൽ അറസ്റ്റ് കണക്കുകളെച്ചൊല്ലിയും എഫ്ബിഐയും മാധ്യമസ്ഥാപനവും തമ്മിൽ തർക്കം തുടരുകയാണ്. അക്രമക്കുറ്റങ്ങളുമായി ബന്ധപ്പെട്ട അറസ്റ്റുകളിൽ 90 ശതമാനം വർധനയുണ്ടായെന്ന പട്ടേലിന്റെ അവകാശവാദം, സംസ്ഥാന-പ്രാദേശിക പൊലീസിന്റെയും മറ്റ് ഫെഡറൽ ഏജൻസികളുടെയും അറസ്റ്റുകൾ കൂടി ഉൾപ്പെടുത്തിയതിനാൽ പെരുപ്പിച്ചുകാട്ടിയതാണെന്ന് എംഎസ് നൗ റിപ്പോർട്ട് ചെയ്തിരുന്നു.

ബൈഡൻ ഭരണകാലത്തെ ഇതേ കാലയളവിനെ അപേക്ഷിച്ച് ഫെഡറൽ പ്രോസിക്യൂഷനായി എഫ്ബിഐ കൈമാറിയ ക്രിമിനൽ കേസുകളിൽ 15 ശതമാനം കുറവുണ്ടായെന്നും മാധ്യമസ്ഥാപനം ചൂണ്ടിക്കാട്ടി. എന്നാൽ, കണക്കുകൾ ഫീൽഡ് ഓഫീസുകളിൽനിന്നും പങ്കാളി ഏജൻസികളിൽനിന്നുമാണ് ശേഖരിക്കുന്നതെന്നും കഴിഞ്ഞ 18 മാസത്തെ അപേക്ഷിച്ച് അക്രമക്കുറ്റങ്ങളുമായി ബന്ധപ്പെട്ട അറസ്റ്റുകളിൽ 90 ശതമാനം വർധനയുണ്ടായെന്നത് വസ്തുതയാണെന്നും പട്ടേൽ പ്രതികരിച്ചു. എഫ്ബിഐ ഡെപ്യൂട്ടി ഡയറക്ടർ ക്രിസ്റ്റഫർ റായയും മാധ്യമറിപ്പോർട്ടിനെ വിമർശിച്ചു.

അതേസമയം, ജൂൺ ഒന്ന് മുതൽ സെപ്റ്റംബർ 20 വരെ സംസ്ഥാന-പ്രാദേശിക ഏജൻസികളുമായി ചേർന്ന് നടത്തിയ 'സമ്മർ ഹീറ്റ് 2.0' നടപടിയുടെ ഭാഗമായി 8,927 പേരെ അറസ്റ്റ് ചെയ്തതായി എഫ്ബിഐ അറിയിച്ചു. ഇതിൽ 5,900-ലേറെ അറസ്റ്റുകൾ അക്രമക്കുറ്റങ്ങൾക്കും സംഘകുറ്റകൃത്യങ്ങൾക്കുമെതിരായ എഫ്ബിഐ പദ്ധതിയുടെ പരിധിയിലാണെന്നും ഏജൻസി വ്യക്തമാക്കി.

ഇന്ത്യൻ വംശജനായ കാഷ് പട്ടേൽ 2025 ഫെബ്രുവരിയിലാണ് എഫ്ബിഐ ഡയറക്ടറായി ചുമതലയേറ്റത്.