ചിക്കാഗോ: ഫോമയുടെ ചരിത്രത്തില്‍ പുതിയൊരു അധ്യായം കുറിച്ചുകൊണ്ട്, നാഷണല്‍ കണ്‍വന്‍ഷനുശേഷം ഇതാദ്യമായി സംഘടിപ്പിക്കുന്ന വിപുലമായ സൗഹൃദ സംഗമത്തിന് ചിക്കാഗോ ഒരുങ്ങുന്നു. ഫോമയുടെ ഇന്നലെകളിലെ അനുഭവങ്ങളും ഇന്നത്തെ പ്രവര്‍ത്തനങ്ങളും നാളെയുടെ സ്വപ്നങ്ങളും ഒരേ വേദിയില്‍ ചര്‍ച്ചയാകുന്ന 'ഫോമാ സൗഹൃദ സംഗമം 2026' ഒക്ടോബര്‍ 16-ന് വൈകിട്ട് അഞ്ചിന് ചിക്കാഗോയിലെ സീറോ മലബാര്‍ കത്തീഡ്രല്‍ പാരിഷ് ഹാളില്‍ നടക്കും. ഫോമയുടെ മുന്‍ പ്രസിഡന്റുമാരും മുന്‍ എക്‌സിക്യൂട്ടീവ് അംഗങ്ങളും ദേശീയ നേതാക്കളും ഡെലിഗേറ്റുകളും പ്രവര്‍ത്തകരും സുഹൃത്തുക്കളും ഒത്തുചേരുന്ന സംഗമത്തിന്റെ ഒരുക്കങ്ങള്‍ പൂര്‍ത്തിയായിവരികയാണ്.

വെറുമൊരു ഒത്തുചേരലിനപ്പുറം, സംഘടനയുടെ ചരിത്രത്തിലേക്ക് തിരിഞ്ഞുനോക്കാനും വര്‍ത്തമാനകാല പ്രവര്‍ത്തനങ്ങളെ വിലയിരുത്താനും ഭാവിയുടെ ദിശ നിര്‍ണയിക്കാനുമുള്ള സുപ്രധാന വേദിയായിരിക്കും ഈ സംഗമം. കാലത്തിന്റെ മാറ്റങ്ങള്‍ക്കൊപ്പം ഫോമയെ കൂടുതല്‍ കരുത്തുറ്റതും ജനകീയവുമായ സംഘടനയായി മുന്നോട്ടുകൊണ്ടുപോകുന്നതിനുള്ള ആശയങ്ങളും നിര്‍ദേശങ്ങളും ഇവിടെ ഉയര്‍ന്നുവരും. ഫോമയുടെ വിവിധ കാലഘട്ടങ്ങളിലെ നേതാക്കളെയും പ്രവര്‍ത്തകരെയും ഒരുമിപ്പിക്കുന്ന സംഗമം പഴയ സൗഹൃദങ്ങള്‍ പുതുക്കുന്നതിനും പുതിയ ബന്ധങ്ങള്‍ വളര്‍ത്തുന്നതിനും അനുഭവങ്ങള്‍ പങ്കുവയ്ക്കുന്നതിനും അവസരമൊരുക്കും. സംഘടനയുടെ വളര്‍ച്ചയ്ക്കായി നിസ്വാര്‍ഥമായി പ്രവര്‍ത്തിച്ചവരുടെ ഓര്‍മകളും അനുഭവങ്ങളും പുതിയ തലമുറയുടെ കാഴ്ചപ്പാടുകളും ഒരേ വേദിയില്‍ സംഗമിക്കുമ്പോള്‍, അത് ഫോമയുടെ ഭാവിയിലേക്കുള്ള പുതിയ ചുവടുവയ്പ്പുകള്‍ക്ക് പ്രചോദനമാകും.

ഔപചാരിക പ്രസംഗങ്ങളിലും ചടങ്ങുകളിലും ഒതുങ്ങാതെ, തുറന്ന സംവാദത്തിനും ആശയവിനിമയത്തിനും പ്രാധാന്യം നല്‍കുന്ന രീതിയിലാണ് പരിപാടി വിഭാവനം ചെയ്തിരിക്കുന്നത്. ഫോമയെ വിവിധ കാലഘട്ടങ്ങളില്‍ നയിച്ച മുന്‍ പ്രസിഡന്റുമാരുടെയും മുന്‍ എക്‌സിക്യൂട്ടീവ് അംഗങ്ങളുടെയും സാന്നിധ്യം സംഗമത്തിന് പ്രത്യേക പ്രാധാന്യം നല്‍കുന്നു. നേതാക്കള്‍ക്കും ഡെലിഗേറ്റുകള്‍ക്കും പ്രവര്‍ത്തകര്‍ക്കും പരസ്പരം അടുത്തറിയാനും സംഘടനയുടെ ഭാവി സംബന്ധിച്ച അഭിപ്രായങ്ങള്‍ സ്വതന്ത്രമായി പങ്കുവയ്ക്കാനും ഈ സൗഹൃദവേദി അവസരമൊരുക്കും. സംഗമത്തിലെ പ്രധാന ആകര്‍ഷണം 'ഫോമയുടെ ഇന്നലെ, ഇന്ന്, നാളെ' എന്ന വിഷയത്തെ ആസ്പദമാക്കിയുള്ള നേതൃസംവാദമായിരിക്കും. ഫോമയുടെ രൂപീകരണം മുതല്‍ സംഘടന പിന്നിട്ട വഴികള്‍, വിവിധ കാലഘട്ടങ്ങളില്‍ കൈവരിച്ച നേട്ടങ്ങള്‍, പ്രവര്‍ത്തനരംഗത്തെ അനുഭവങ്ങള്‍, നിലവിലെ പ്രവര്‍ത്തനങ്ങളുടെ വിലയിരുത്തല്‍, ഭാവിയില്‍ ഏറ്റെടുക്കേണ്ട ദൗത്യങ്ങള്‍ എന്നിവ ചര്‍ച്ചയാകും.

സംഘടനയുടെ വളര്‍ച്ചയ്ക്ക് അടിത്തറ പാകിയവരും നിലവില്‍ നേതൃത്വത്തിലും പ്രവര്‍ത്തനരംഗത്തും സജീവമായവരും ഒരുമിക്കുമ്പോള്‍, അത് തലമുറകള്‍ തമ്മിലുള്ള ആശയവിനിമയത്തിന്റെയും കൂട്ടായ മുന്നേറ്റത്തിന്റെയും വേദിയായി മാറും. ഓര്‍മകള്‍ പങ്കുവയ്ക്കുന്നതിനൊപ്പം പുതിയ സ്വപ്നങ്ങള്‍ പങ്കിടാനും അഭിപ്രായവ്യത്യാസങ്ങള്‍ സൗഹൃദസംവാദത്തിലൂടെ പരിഹരിക്കാനും സംഘടനയുടെ പൊതുലക്ഷ്യങ്ങള്‍ക്കായി കൈകോര്‍ക്കാനുമുള്ള അവസരമായിരിക്കും ഈ സംഗമം.  ഫോമാ നാഷണല്‍ പ്രസിഡന്റ് ബേബി മണക്കുന്നേല്‍ നേതൃത്വം നല്‍കുന്ന എക്‌സിക്യൂട്ടീവ് കമ്മിറ്റിയുടെയും സംഗമത്തിന് ചുക്കാന്‍ പിടിക്കുന്ന സെന്‍ട്രല്‍ റീജിയന്‍ ആര്‍.വി.പി. ജോണ്‍സണ്‍ കണ്ണൂക്കാടന്റെയും നേതൃത്വത്തിലാണ് പരിപാടിയുടെ ഒരുക്കങ്ങള്‍ പുരോഗമിക്കുന്നത്. ഏവരെയും  സൗഹൃദ സംഗമത്തിലേക്ക് ഇരുവരും ഹൃദയപൂര്‍വം ക്ഷണിക്കുന്നു.