ന്യൂജേഴ്‌സി: വടക്കേ അമേരിക്കയിലെ ഹിന്ദുക്കളുടെ കൂട്ടായ്മയായ കോയലിഷൻ ഓഫ് ഹിന്ദൂസ് ഓഫ് നോർത്ത് അമേരിക്കയുടെ (CoHNA) യുവജന വിഭാഗമായ CYAN (Youth Action Network) ആദ്യ ദേശീയ ഹിന്ദു യുവജന സമ്മേളനം സംഘടിപ്പിച്ചു. ഒക്ടോബർ 10-ന് ന്യൂജേഴ്‌സിയിലെ പിസ്കാറ്റവേയിൽ നടന്ന സമ്മേളനത്തിൽ ഹിന്ദു യുവജനങ്ങൾ, സമുദായ നേതാക്കൾ, സാമൂഹിക പ്രവർത്തകർ എന്നിവർ പങ്കെടുത്തു.

ഹിന്ദുക്കൾക്കെതിരായ മുൻവിധികളും വിവേചനങ്ങളും (ഹിന്ദുഫോബിയ), ഹിന്ദുമതത്തെക്കുറിച്ചുള്ള തെറ്റിദ്ധാരണകൾ, പൗരസമൂഹത്തിലെ യുവജനപങ്കാളിത്തം തുടങ്ങിയ വിഷയങ്ങൾ സമ്മേളനം ചർച്ച ചെയ്തു. കോളജ് ക്യാംപസുകളിലും വിദ്യാഭ്യാസ സ്ഥാപനങ്ങളിലും ഹിന്ദു മതത്തെയും സംസ്കാരത്തെയും തെറ്റായി ചിത്രീകരിക്കുന്ന പ്രവണതകൾ തിരിച്ചറിയുക, വിവേചനങ്ങൾ രേഖപ്പെടുത്തുക, നയരൂപീകരണത്തിൽ പങ്കാളികളാകുക തുടങ്ങിയ വിഷയങ്ങളിൽ പരിശീലന ശിൽപ്പശാലകളും സംഘടിപ്പിച്ചു.

സ്കൂൾ പാഠപുസ്തകങ്ങളിലെ ഹിന്ദുമത ചിത്രീകരണം, സർവകലാശാലകളിലെ ഭക്ഷണശാലകളിൽ ബീഫിൽനിന്നുള്ള ചേരുവകളും അവയ്ക്കുള്ള ബദൽ ഉൽപ്പന്നങ്ങളും ലേബൽ ചെയ്യുന്നതുമായി ബന്ധപ്പെട്ട വിഷയങ്ങൾ തുടങ്ങിയവയെ ആസ്പദമാക്കി പ്രായോഗിക പരിശീലനങ്ങളും നടന്നു.

യുവജനങ്ങൾക്ക് സാമൂഹിക വിഷയങ്ങളിൽ ഇടപെടുന്നതിനും സ്വന്തം സമുദായത്തിന്റെ താൽപര്യങ്ങൾ ഫലപ്രദമായി അവതരിപ്പിക്കുന്നതിനും ആവശ്യമായ പ്രായോഗിക കഴിവുകൾ നൽകുകയാണ് സമ്മേളനത്തിന്റെ ലക്ഷ്യമെന്ന് CYAN എക്സിക്യൂട്ടീവ് ഡയറക്ടറും സംഘാടകരിലൊരാളുമായ ധ്യേയ് റേ പറഞ്ഞു. സമാനമായ ആശങ്കകൾ പങ്കുവയ്ക്കുന്ന യുവാക്കൾക്ക് പരസ്പരം പരിചയപ്പെടാനും അനുഭവങ്ങൾ കൈമാറാനും വേദിയൊരുക്കുകയെന്നതും ലക്ഷ്യമായിരുന്നുവെന്ന് അദ്ദേഹം വ്യക്തമാക്കി.

വിർജീനിയയിലെ പത്താം കോൺഗ്രസ് ഡിസ്ട്രിക്ടിനെ പ്രതിനിധീകരിക്കുന്ന ഇന്ത്യൻ വംശജനായ യുഎസ് കോൺഗ്രസ് അംഗം സുഹാസ് സുബ്രഹ്മണ്യം ഓൺലൈനായി സമ്മേളനത്തെ അഭിസംബോധന ചെയ്തു. പൊതുപ്രവർത്തനത്തിലേക്കുള്ള തന്റെ കടന്നുവരവ്, അമേരിക്കൻ പൊതുരംഗത്തെ ഹിന്ദു പ്രാതിനിധ്യം, സാംസ്കാരികവും മതപരവുമായ സ്വത്വം കാത്തുസൂക്ഷിക്കേണ്ടതിന്റെ പ്രാധാന്യം എന്നിവ അദ്ദേഹം വിശദീകരിച്ചു.

തിരഞ്ഞെടുപ്പിൽ മത്സരിച്ച ആദ്യകാലത്ത് ഹിന്ദു പശ്ചാത്തലം കുറച്ചുകാണിക്കാനും പേര് മാറ്റാനും നിർദേശങ്ങൾ നേരിട്ടതായി അദ്ദേഹം വെളിപ്പെടുത്തി. യുവാക്കൾ പൊതുപ്രവർത്തനത്തിലും പൗരജീവിതത്തിലും സജീവമായി ഇടപെടണമെന്നും പൊതുസ്ഥാപനങ്ങളിൽ വിവിധ സമുദായങ്ങൾക്ക് പ്രാതിനിധ്യം ഉറപ്പാക്കേണ്ടത് പ്രധാനമാണെന്നും അദ്ദേഹം പറഞ്ഞു. 'ഞാൻ ഹിന്ദുവായതിൽ അഭിമാനിക്കുന്നു. അമേരിക്കക്കാരനായതിലും അഭിമാനിക്കുന്നു' എന്ന അദ്ദേഹത്തിന്റെ വാക്കുകൾ സമ്മേളനത്തിലെ പ്രധാന സന്ദേശമായി.

ആഗോള ഹിന്ദു മതവിദ്യാഭ്യാസ പ്രവർത്തകനും 'ഹിന്ദു ലൈഫ്‌സ്റ്റൈൽ' സംരംഭത്തിന്റെ സ്രഷ്ടാവുമായ ഷോൺ ബിന്ദയായിരുന്നു മുഖ്യപ്രഭാഷകൻ. ഇൻഡോ-കരീബിയൻ പശ്ചാത്തലത്തിൽ വളർന്നുവന്ന തന്റെ അനുഭവങ്ങൾ പങ്കുവച്ച അദ്ദേഹം, 'നിങ്ങൾ എന്തുകൊണ്ടാണ് ഹിന്ദുവായിരിക്കുന്നത്?' എന്ന ചോദ്യത്തിലൂടെ യുവാക്കളെ ആത്മപരിശോധനയ്ക്ക് പ്രേരിപ്പിച്ചു.

ഹിന്ദു പാരമ്പര്യത്തെക്കുറിച്ചുള്ള അറിവ്, ധർമത്തോടുള്ള വ്യക്തിപരമായ ബന്ധം, വ്യത്യസ്ത പശ്ചാത്തലങ്ങളിലുള്ള ഹിന്ദുക്കൾക്കിടയിലെ കൂട്ടായ്മ എന്നിവയാണ് ഫലപ്രദമായ സാമൂഹിക ഇടപെടലിന്റെ അടിസ്ഥാനമെന്ന് അദ്ദേഹം വിശദീകരിച്ചു. ഹിന്ദുമതത്തിനെതിരായ ആക്രമണങ്ങളോട് പ്രതികരിക്കുക മാത്രമാകരുത് മതസംരക്ഷണ പ്രവർത്തനങ്ങളുടെ ലക്ഷ്യം. പാരമ്പര്യത്തോടുള്ള ആഴത്തിലുള്ള അറിവും ആത്മബന്ധവുമാണ് പ്രവർത്തനങ്ങൾക്ക് പ്രചോദനമാകേണ്ടതെന്നും അദ്ദേഹം പറഞ്ഞു.

ഹിന്ദുക്കൾക്കെതിരായ വിദ്വേഷവും വിവേചനവും തിരിച്ചറിയുന്നതിനും വിദ്യാഭ്യാസ സ്ഥാപനങ്ങളിലെ തെറ്റായ മതചിത്രീകരണങ്ങളെ നേരിടുന്നതിനും സമ്മേളനത്തിൽ പ്രത്യേക സെഷനുകൾ നടന്നു.

എൻസിആർഐയിലെ അനലിസ്റ്റും യുവജന പ്രവർത്തകയുമായ പ്രസിദ്ധ സുധാകർ 'From the Room to the Record' എന്ന സെഷന് നേതൃത്വം നൽകി.