മൂന്ന് പേരുടെ ജീവനെടുത്ത നെടുമ്പാശേരി മിനി കൂപ്പർ അപകടക്കേസിൽ അന്വേഷണം ഊർജിതമാക്കി പൊലീസ്. എറണാകുളം റൂറൽ എസ്‌പിയുടെ മേൽനോട്ടത്തിൽ പ്രത്യേക അന്വേഷണസംഘത്തെ നിയോഗിച്ചു. ആലുവ ഡിവൈഎസ്‌പി ബൈജു കെ. പൗലോസിനാണ് അന്വേഷണച്ചുമതല. കേസിലെ പ്രതി സുഹൈൽ സജീവിനെ രണ്ട് ദിവസത്തെ പൊലീസ് കസ്റ്റഡിയിൽ വിട്ടു. പ്രതിയെ കസ്റ്റഡിയിൽ വേണമെന്ന പൊലീസിന്റെ അപേക്ഷ അങ്കമാലി മജിസ്‌ട്രേറ്റ് കോടതി പരിഗണിച്ചാണ് നടപടി.

കേസിൽ സമഗ്രമായ അന്വേഷണം വേണമെന്ന് പ്രോസിക്യൂഷൻ കോടതിയിൽ ആവശ്യപ്പെട്ടു. അശ്രദ്ധയും അപകടകരവുമായ ഡ്രൈവിങാണ് ദുരന്തത്തിലേക്ക് നയിച്ചതെന്ന് പ്രോസിക്യൂഷൻ വാദിച്ചു. മരിച്ച കുട്ടികൾക്ക് നിരവധി സ്വപ്നങ്ങളുണ്ടായിരുന്നുവെന്നും പ്രതികൾക്ക് പ്രായക്കുറവിന്റെ ആനുകൂല്യം നൽകേണ്ടതില്ലെന്നും വ്യക്തമാക്കി. പ്രതികൾ ഉച്ചമുതൽ മദ്യപിച്ചിരുന്നുവെന്നും പിന്നീട് മാരിയറ്റ് ഹോട്ടലിൽ വീണ്ടും മദ്യപിക്കാൻ ഒത്തുകൂടിയെന്നുമാണ് പ്രോസിക്യൂഷന്റെ ആരോപണം. മദ്യപിച്ച് വാഹനം ഓടിക്കുന്നത് മനുഷ്യജീവന് അപകടമാണെന്ന് പ്രതികൾക്ക് അറിയില്ലേയെന്നും പ്രോസിക്യൂഷൻ ചോദിച്ചു.

അതേസമയം, മരണത്തെ ന്യായീകരിക്കുന്നില്ലെന്നും കേസിൽ സത്യസന്ധമായ അന്വേഷണം വേണമെന്നും പ്രതിഭാഗം കോടതിയിൽ പറഞ്ഞു. മാധ്യമങ്ങളെ തൃപ്തിപ്പെടുത്താനാണ് പൊലീസ് ശ്രമിച്ചതെന്നും കേസിന്റെ അന്തിമഫലം നേരത്തേ തീരുമാനിച്ച നിലയിലാണ് അന്വേഷണവുമായി മുന്നോട്ടുപോകുന്നതെന്നും പ്രതിഭാഗം ആരോപിച്ചു. പ്രതികളെ മാധ്യമങ്ങൾക്കു മുന്നിൽ പ്രദർശിപ്പിച്ചതും അറസ്റ്റ് വാർത്തകൾ ആഘോഷിച്ചതും ചൂണ്ടിക്കാട്ടിയ പ്രതിഭാഗം, അപകടസമയത്ത് സ്കൂട്ടറിൽ സഞ്ചരിച്ചവരിൽ ആർക്കും ഹെൽമറ്റ് ഉണ്ടായിരുന്നില്ലെന്നും വാദിച്ചു.

അപകടത്തിൽ മിനി കൂപ്പർ ഓടിച്ച സുഹൈൽ സജീവിന് പരമാവധി ശിക്ഷ ഉറപ്പാക്കുമെന്ന് ആഭ്യന്തരമന്ത്രി രമേശ് ചെന്നിത്തല നിയമസഭയിൽ വ്യക്തമാക്കി. അന്വേഷണത്തിലോ എഫ്‌ഐആർ രജിസ്റ്റർ ചെയ്യുന്നതിലോ പൊലീസിന്റെ ഭാഗത്ത് ബോധപൂർവമായ വീഴ്ചയുണ്ടായിട്ടില്ലെന്നും പ്രതിപക്ഷത്തിന്റെ വിമർശനങ്ങൾക്ക് മറുപടിയായി മന്ത്രി പറഞ്ഞു