ഹൂസ്റ്റണ്‍: കേവലം ആരാധനകള്‍ക്കും ആചാരങ്ങള്‍ക്കും അപ്പുറം കാലഘട്ടത്തിന്റെ പ്രവാചകശബ്ദമായി മാറാന്‍ സഭയ്ക്ക് കഴിയണമെന്ന് റവ. സോനു വര്‍ഗീസ് ആഹ്വാനം നല്‍കി.ഒക്ടോബര്‍ 13 ചൊവ്വാഴ്ച രാത്രി ഭക്തിനിര്‍ഭരമായ അന്തരീക്ഷത്തില്‍ നടന്ന ഇന്റര്‍നാഷണല്‍ പ്രെയര്‍ ലൈനിന്റെ (IPL) 648-ാമത് പ്രതിവാര പ്രാര്‍ത്ഥനാ യോഗത്തില്‍ മുഖ്യാതിഥിയായി പങ്കെടുത്തു  വചനസന്ദേശം നല്‍കുകയായിരുന്നു സോനു അച്ചന്‍.

സമൂഹത്തിലെ തിന്മകള്‍ ചൂണ്ടിക്കാണിക്കുന്നതോടൊപ്പം സ്വന്തം ജീവിതത്തിലേക്ക് തിരിഞ്ഞുനോക്കുന്ന ആന്തരിക മാനസാന്തരം അനിവാര്യമാണ്. മറ്റുള്ളവരെ കുറ്റപ്പെടുത്തുന്നതിന് മുന്‍പ് സ്വന്തം ജീവിതം പരിശോധിക്കണം. സഭയുടെ ദൗത്യം കേവലം ചടങ്ങുകളില്‍ ഒതുങ്ങേണ്ടതല്ല. ഓരോ വിശ്വാസിയും സ്വാര്‍ത്ഥതയും സ്വയംകേന്ദ്രീകൃതമായ ചിന്തകളും വെടിഞ്ഞ് ഈ കാലഘട്ടത്തിന്റെ പ്രവാചകശബ്ദമായി മാറണമെന്നു അസിന്‍ ഓര്‍മപ്പെടുത്തി.

പ്രതിസന്ധികളുടെയും വരള്‍ച്ചയുടെയും നടുവിലും ദൈവത്തിന്റെ അപാരമായ ദിവ്യപരിപാലനം വെളിപ്പെടുന്നു. കേരീത്ത് തോട്ടിനരികില്‍ ഒളിച്ചിരുന്ന ഏലിയാവിന് ഭക്ഷണമെത്തിക്കാന്‍ ദൈവം കാക്കകളെ നിയോഗിച്ചതുപോലെ, വരള്‍ച്ചയുടെ നടുവിലും ദൈവം തന്റെ ജനത്തെ പൂര്‍ണ്ണമായി കൈവിടുന്നില്ല.ബൈബിള്‍ കോടിക്കണക്കിന് മനുഷ്യര്‍ക്ക് പ്രത്യാശയും സഹാനുഭൂതിയും ധൈര്യവും നല്‍കുന്ന ഗ്രന്ഥമാണ്. വഴികളെല്ലാം അടഞ്ഞുവെന്ന് തോന്നുന്ന ഘട്ടങ്ങളില്‍ പോലും ദൈവം പുതിയ വഴികള്‍ ഒരുക്കുന്നു.

'ഞാന്‍ മാത്രം ബാക്കി' എന്ന ഏലിയാവിന്റെ ചിന്തയെ തിരുത്തിക്കൊണ്ട്, ബാലിന് മുട്ടുകുത്താത്ത ഏഴായിരം പേരെ ദൈവം വിശുദ്ധിയില്‍ കാത്തുസൂക്ഷിച്ചിട്ടുണ്ടെന്ന് തിരിച്ചറിയണമെന് ഉദ് ബോധിപ്പിച്ചു അച്ചന്‍ തന്റെ പ്രസംഗം ഉപസംഹരിച്ചു.

ഡിട്രോയിറ്റില്‍ നിന്നുള്ള ഐ.പി.എല്‍ കോര്‍ഡിനേറ്റര്‍ സി. വി. സാമുവല്‍ മുഖ്യാതിഥിയായി പങ്കെടുക്കുന്ന ഹൂസ്റ്റണ്‍ ട്രിനിറ്റി മാര്‍ത്തോമ്മാ ഇടവക വികാരി റവ. സോനു വര്‍ഗീസിനെ ഉള്‍പ്പെടെ ഏവരെയും സ്വാഗതം ചെയ്തു. തുടര്‍ന്ന് ഹൂസ്റ്റണില്‍ നിന്നുള്ള രാജു പ്രാരംഭ പ്രാര്‍ത്ഥനയ്ക്കു നേതൃത്വം നല്‍കി. വിശുദ്ധ വേദപുസ്തകത്തില്‍ നിന്നുള്ള 1 രാജാക്കന്മാര്‍ 19:1-13 വരെയുള്ള വാക്യങ്ങള്‍ ഹൂസ്റ്റണില്‍ നിന്നുള്ള ഗ്രേസി വട്ടക്കുന്നേല്‍ വായിച്ചു.

ലോകസമാധാനത്തിനായി ഏകമനസ്സോടെ പ്രാര്‍ത്ഥിക്കാന്‍ ആഹ്വാനം ചെയ്ത യോഗത്തില്‍, ഇസ്രായേല്‍-ഗാസ, മിഡില്‍ ഈസ്റ്റ്, ഉക്രെയ്ന്‍-റഷ്യ തുടങ്ങിയ മേഖലകളിലെ യുദ്ധങ്ങള്‍ക്കും സംഘര്‍ഷങ്ങള്‍ക്കും ഉടനടി പരിഹാരമുണ്ടാകാനും ലോകനേതാക്കളില്‍ സമാധാനത്തിന്റെ വികാരം ഉടലെടുക്കാനുമായി പ്രത്യേക മധ്യസ്ഥ പ്രാര്‍ത്ഥനകള്‍ നടന്നു.

വടക്കേ അമേരിക്കയുടെ വിവിധ ഭാഗങ്ങളില്‍ നിന്നുള്ള നിരവധി വിശ്വാസികള്‍ ഫോണ്‍ കോണ്‍ഫറന്‍സ് വഴി യോഗത്തില്‍ പങ്കെടുത്തു.

ഐ.പി.എല്‍ പ്രാര്‍ത്ഥനാ കൂട്ടായ്മയുടെ പ്രവര്‍ത്തനങ്ങള്‍ക്ക് എല്ലാവിധ പങ്കാളികളും നല്‍കുന്ന പിന്തുണയ്ക്ക് കോഓര്‍ഡിനേറ്റര്‍ ടി. എ. മാത്യു നന്ദി അറിയിച്ചു.