സ്കൂളിൽ അഞ്ചാം ക്ലാസിൽ പഠിക്കുന്ന കാലത്താണ് എസ്.എസ്.എഫിനെക്കുറിച്ച് ആദ്യമായി അറിയുന്നത്. ഉമ്മയുടെ നിർദേശപ്രകാരമാണ് സംഘടനയെക്കുറിച്ച് കൂടുതൽ അറിയാനും ക്ലാസുകളിൽ പങ്കെടുക്കാനും തുടങ്ങിയത്.തുടക്കത്തിൽ ചെറിയൊരു മടിയും നാണക്കേടുമൊക്കെ തോന്നിയിരുന്നു. കൂട്ടുകാരെല്ലാം കളിക്കാൻ പോകുമ്പോൾ മീറ്റിങ്ങിന് വിളിച്ചാൽ പലപ്പോഴും പോകാൻ മടിക്കും. കളിക്കാനുള്ള പ്രായത്തിൽ സംഘടനാ പ്രവർത്തനങ്ങളിലേക്ക് ഇറങ്ങുന്നതിന്റെ പ്രാധാന്യം അന്ന് അത്രത്തോളം തിരിച്ചറിഞ്ഞിരുന്നില്ല.എങ്കിലും ഉമ്മയുടെ നിർദേശങ്ങൾക്കൊപ്പം നടന്നു.അന്ന് ഉമ്മ പറഞ്ഞതനുസരിച്ച് എടുത്ത ചെറിയ ചുവടുകളാണ് പിന്നീട് എന്റെ ജീവിതത്തിലെ വലിയൊരു അനുഭവമായി മാറിയത്.

ഉമ്മയുടെ നിർദേശപ്രകാരമാണ് പിന്നീട് കളത്തൂർ സുന്നി സെന്ററിൽ നടക്കുന്ന ദിക്ർ ഹൽഖയിൽ പങ്കെടുക്കാൻ തുടങ്ങിയത്. അവിടെ എനിക്ക് പരിചയമില്ലാത്ത ഒരുപാട് മുഖങ്ങളുണ്ടായിരുന്നു. കളിക്കുമ്പോൾ കണ്ടിരുന്ന ചില മുഖങ്ങൾ അവിടെയും ഉണ്ടായിരുന്നു. അവരോടൊക്കെ പരിചയപ്പെടാൻ ആദ്യം ചെറിയൊരു മടിയുണ്ടായിരുന്നെങ്കിലും പതുക്കെപ്പതുക്കെ ആ മടി മാറി. പുതിയ സൗഹൃദങ്ങൾ രൂപപ്പെട്ടു. അങ്ങനെ എസ്.എസ്.എഫ് എന്ന പ്രസ്ഥാനത്തെ അകലെനിന്ന് അറിഞ്ഞിരുന്ന ഞാൻ അതിന്റെ പ്രവർത്തനങ്ങളിലേക്ക് പതുക്കെ നടന്നടുക്കുകയായിരുന്നു.

അങ്ങനെയിരിക്കെയാണ് ഉമ്മയുടെ അനിയൻ കെ.എം. കളത്തൂർ അടുത്ത ദിവസം എസ്.എസ്.എഫിന്റെ ഒരു ക്യാമ്പുണ്ടെന്നും വരണമെന്നും പറഞ്ഞത്. ഞാൻ വരാമെന്ന് തലയാട്ടി. വീട്ടിലെത്തിയപ്പോൾ ഉമ്മയോടും കാര്യം പറഞ്ഞു. രാവിലെ ഒമ്പത് മണിക്കായിരുന്നു ക്യാമ്പ്. ആദ്യമായി പങ്കെടുക്കുന്ന ക്യാമ്പായതിനാൽ മനസ്സിൽ ചെറിയൊരു മടിയുണ്ടായിരുന്നു. എങ്കിലും പോയി. എസ്.എസ്.എഫിലൂടെയുള്ള എന്റെ ജീവിതത്തിലെ ആദ്യ ക്യാമ്പായിരുന്നു അത്. അന്ന് മടിച്ചുമടിച്ച് പങ്കെടുത്ത ആ ക്യാമ്പ് പിന്നീട് എന്റെ ജീവിതത്തിലെ പ്രധാനപ്പെട്ട അനുഭവങ്ങളിലൊന്നായി മാറി. ക്യാമ്പിലെ അനുഭവങ്ങളും സൗഹൃദങ്ങളും സംഘടനയെ കൂടുതൽ അറിയാനുള്ള താൽപര്യം വളർത്തി. പിന്നീട് എസ്.എസ്.എഫിന്റെ ക്യാമ്പുകളിലേക്ക് പോകാൻ ആവേശത്തോടെ കാത്തിരിക്കുന്ന ഒരാളായി ഞാൻ മാറി.

പിന്നീട് യൂണിറ്റിൽ മെമ്പർഷിപ്പെടുത്തു. സംഘടനാ പ്രവർത്തനങ്ങളിലൂടെ ഒരുപാട് ഊർജവും കരുത്തും ആത്മവിശ്വാസവും ലഭിച്ചു. പുതിയ മനുഷ്യരെ പരിചയപ്പെടാനും വ്യത്യസ്തമായ അനുഭവങ്ങൾ സ്വന്തമാക്കാനും സ്വന്തം കഴിവുകൾ തിരിച്ചറിയാനും എസ്.എസ്.എഫ് സഹായിച്ചു. ഒരിക്കൽ പോകാൻ മടിച്ചിരുന്ന ക്യാമ്പുകളിലേക്ക് പിന്നീട് കൊതിയോടെ പോകുന്ന അവസ്ഥയിലേക്കുള്ള മാറ്റം എന്റെ ജീവിതത്തിലെ വലിയൊരു അനുഭവമാണ്. സംഘടനയോടുള്ള അടുപ്പം വളർന്നതും അതിന്റെ പ്രവർത്തനങ്ങളിൽ സജീവമാകാനുള്ള താൽപര്യം ഉണ്ടായതും ഈ അനുഭവങ്ങളിലൂടെയാണ്.

എന്റെ എഴുത്തുജീവിതത്തിനും വളരാനുള്ള ഇടം നൽകിയത് എസ്.എസ്.എഫ് തന്നെയാണ്. സംഘടനയുടെ കീഴിലുള്ള കലാലയം ആർട്ട് സ്കൂൾ എഴുത്തിന് കൂടുതൽ വളമേകി. എഴുതാനുള്ള താൽപര്യത്തെ വളർത്താനും ചിന്തകൾ അക്ഷരങ്ങളിലൂടെ അവതരിപ്പിക്കാനും ആ ഇടം സഹായിച്ചു. മൂസ സഖാഫി ഉസ്താദ്, ഇർഷാദ് മാഷ് കളത്തൂർ, ഉമൈർ സഖാഫി കളത്തൂർ തുടങ്ങിയവർ തുടക്കകാലം മുതൽതന്നെ സംഘടനയിൽ സജീവമാകണമെന്ന് എന്നോട് പറയാറുണ്ടായിരുന്നു. അവരുടെ വാക്കുകളും പ്രോത്സാഹനങ്ങളും മുന്നോട്ടുപോകാനുള്ള പ്രചോദനമായി. ഇന്ന് സംഘടനാ പ്രവർത്തനം സെക്ടർ തലത്തിൽവരെ എത്തിനിൽക്കുമ്പോൾ അതിനു പിന്നിൽ ഒരുപാട് പേരുടെ നിരന്തരമായ ഇടപെടലുകളും പ്രോത്സാഹനങ്ങളുമുണ്ട്. ഈ യാത്രയിൽ കൈപിടിച്ചവരെയും വഴികാട്ടിയവരെയും ഒരിക്കലും മറക്കാനാവില്ല.

എന്റെ എഴുത്തിന്റെ ആദ്യ ചുവടുകളും എസ്.എസ്.എഫിന്റെ മുഖപത്രമായ രിസാലയുമായി ബന്ധപ്പെട്ടാണ്. 2013-ലാണ് രിസാലയിൽ എന്റെ ആദ്യ പ്രതികരണം പ്രസിദ്ധീകരിച്ചുവന്നത്. എഴുത്തിനോട് താൽപര്യമുണ്ടായിരുന്നെങ്കിലും സ്വന്തം ചിന്തകൾ അക്ഷരങ്ങളാക്കി മറ്റുള്ളവരിലേക്ക് എത്തിക്കാനുള്ള ആത്മവിശ്വാസം വളർത്തുന്നതിൽ രിസാലയുടെ പങ്ക് ചെറുതല്ല. ആദ്യമായി ഒരു പ്രതികരണം പ്രസിദ്ധീകരിച്ചുവന്നതിന്റെ സന്തോഷം ഇന്നും മനസ്സിലുണ്ട്. പിന്നീട് പല വിഷയങ്ങളിലും എഴുതാൻ ശ്രമിച്ചു. ഇന്നും എഴുത്ത് തുടരുന്നുണ്ടെങ്കിൽ അതിനു പിന്നിൽ രിസാലയും എസ്.എസ്.എഫും നൽകിയ പ്രോത്സാഹനവും ഇടവും വലിയ പങ്കുവഹിക്കുന്നുണ്ട്. എന്റെ ചിന്തകൾ പങ്കുവെക്കാനും എഴുത്തിലൂടെ സമൂഹത്തോട് സംവദിക്കാനും ലഭിച്ച അവസരങ്ങൾ ഈ പ്രസ്ഥാനത്തോടുള്ള കടപ്പാട് വർധിപ്പിക്കുന്നു.

എസ്.എസ്.എഫ് എന്നത് ഇന്ന് എനിക്ക് ഒരു സംഘടനയുടെ പേര് മാത്രമല്ല. എന്റെ കുട്ടിക്കാലത്തിന്റെ ഓർമകളും സൗഹൃദങ്ങളും അനുഭവങ്ങളും എഴുത്തിന്റെ ആദ്യാക്ഷരങ്ങളും ചേർന്നുനിൽക്കുന്ന ഒരു ലോകമാണ്. ഒരിക്കൽ മടിയോടെ നടന്നുചെന്ന ഇടങ്ങളിലേക്ക് ഇന്ന് സന്തോഷത്തോടെ തിരിച്ചെത്തുമ്പോൾ മനസ്സിൽ വലിയൊരു സംതൃപ്തിയുണ്ട്. ഉമ്മയുടെ നിർദേശപ്രകാരം തുടങ്ങിയ ആ യാത്ര ഇത്രത്തോളം വളരുമെന്ന് അന്ന് കരുതിയിരുന്നില്ല. ഇന്ന് എസ്.എസ്.എഫ് എന്ന് കേൾക്കുമ്പോൾ മനസ്സിൽ ഒരു പ്രത്യേക സൗന്ദര്യമുണ്ട്. അത് ഒരു പ്രസ്ഥാനത്തോടുള്ള അടുപ്പം മാത്രമല്ല, എന്നെ വളർത്തിയെടുത്ത അനുഭവങ്ങളോടും പ്രോത്സാഹിപ്പിച്ച മനുഷ്യരോടുമുള്ള സ്നേഹവും കടപ്പാടുമാണ്. മടിയോടെ തുടങ്ങിയ ഈ യാത്ര ഇന്നും തുടരുകയാണ്. ആ യാത്രയിൽ എസ്.എസ്.എഫും രിസാലയും എന്നും എന്റെ ഹൃദയത്തോട് ചേർന്നുനിൽക്കും.