മുഖ്യമന്ത്രി വി.ഡി. സതീശനെതിരെ യു.ഡി.എഫ് കൺവീനർ അടൂർ പ്രകാശ് അടുത്തിടെ നടത്തിയ പരസ്യ വിമർശനം നിർഭാഗ്യകരവും എന്റെ കാഴ്ചപ്പാടിൽ അനാവശ്യവുമാണ്. മതിയായ കൂടിയാലോചനയില്ലാതെ സുപ്രധാന തീരുമാനങ്ങൾ കൈക്കൊള്ളുന്നുവെന്ന് കരുതുന്നുവെങ്കിൽ, അതേക്കുറിച്ച് ആശങ്കകൾ ഉന്നയിക്കാൻ അദ്ദേഹത്തിന് പൂർണ അവകാശമുണ്ട്. ഒരു രാഷ്ട്രീയ പാർട്ടിക്കുള്ളിലെ ആഭ്യന്തര ജനാധിപത്യത്തിന്റെ ഭാഗമാണത്. പ്രത്യേകിച്ച് യു.ഡി.എഫ് പോലൊരു മുന്നണിയിൽ അതിന് ഏറെ പ്രാധാന്യമുണ്ട്. എന്നാൽ, ഇത്തരം പരാതികൾ പാർട്ടിയിലും മുന്നണിയിലും ആവശ്യമായ ചർച്ചകൾക്ക് വിധേയമാക്കുന്നതിന് മുമ്പ് തന്നെ പരസ്യമായി ഉന്നയിക്കേണ്ടതുണ്ടോ എന്ന ചോദ്യം പ്രസക്തമാണ്.

ഇത്തരം അഭിപ്രായവ്യത്യാസങ്ങൾ പരിഹരിക്കാൻ കോൺഗ്രസിന് ആവശ്യത്തിന് ഫോറങ്ങളുണ്ട്. കെ.പി.സി.സി., യു.ഡി.എഫ് നേതൃത്വം, ആവശ്യമെങ്കിൽ കോൺഗ്രസ് ഹൈക്കമാൻഡ് എന്നിവയിലൂടെ ഇത്തരം വിഷയങ്ങൾ ചർച്ച ചെയ്യാം. സർക്കാർ അധികാരത്തിലെത്തി പ്രവർത്തനങ്ങൾ ക്രമപ്പെടുത്തുകയും ജനങ്ങൾക്ക് നൽകിയ വാഗ്ദാനങ്ങൾ നടപ്പാക്കാൻ ശ്രമിക്കുകയും ചെയ്യുന്ന ഘട്ടത്തിൽ സ്വന്തം മുഖ്യമന്ത്രിയെ പരസ്യമായി വിമർശിക്കുന്നത് പാർട്ടിക്കോ സർക്കാരിനോ യാതൊരു ഗുണവും ചെയ്യില്ല. മറിച്ച്, അത് പ്രതിപക്ഷത്തിന് പരിഹസിക്കാൻ അവസരം നൽകുകയും കോൺഗ്രസിലെ പഴയ ഗ്രൂപ്പ് പോരുകൾ വീണ്ടും തിരിച്ചെത്തിയെന്ന പ്രതീതി സൃഷ്ടിക്കുകയും ചെയ്യും.

അത്തരമൊരു സാഹചര്യം നിർഭാഗ്യകരമാണ്. കാരണം, പത്ത് വർഷത്തെ ഇടതുപക്ഷ ഭരണത്തിന് ശേഷം കേരളത്തിലെ ജനങ്ങൾ യു.ഡി.എഫിന് വലിയൊരു ഭൂരിപക്ഷമാണ് നൽകിയത്.  ആഭ്യന്തര തർക്കങ്ങൾക്കും വ്യക്തിപരമായ ഏറ്റുമുട്ടലുകൾക്കും വേണ്ടിയല്ല അവർ വോട്ട് ചെയ്തത്. മാറ്റത്തിനും സുസ്ഥിരമായ ഭരണത്തിനും സംസ്ഥാനത്തെ അഭിമുഖീകരിക്കുന്ന നിരവധി പ്രശ്നങ്ങളിൽ നിർണായകമായി ഇടപെടുന്ന ഒരു സർക്കാരിനും വേണ്ടിയാണ് പ്രതീക്ഷയോടെ അവർ വോട്ട് ചെയ്തത്.

വി.ഡി. സതീശൻ യാദൃച്ഛികമായല്ല മുഖ്യമന്ത്രിയുടെ സ്ഥാനത്തെത്തിയത്. വർഷങ്ങളോളം പിണറായി വിജയൻ സർക്കാരിനെതിരെ പ്രതിപക്ഷ പോരാട്ടത്തിന് അദ്ദേഹം നേതൃത്വം നൽകി. ആ പോരാട്ടത്തിന്റെ ഏറ്റവും ശ്രദ്ധേയമായ മുഖമായി അദ്ദേഹം മാറുകയും ചെയ്തു. തിരഞ്ഞെടുപ്പ് വിജയത്തിന് പിന്നാലെ അദ്ദേഹത്തിന് അനുകൂലമായ ശക്തമായ ജനവികാരവും ഉണ്ടായിരുന്നു. പോരാട്ടത്തിന് നേതൃത്വം നൽകിയ വ്യക്തിയെ തന്നെ സർക്കാരിനും നേതൃത്വം നൽകാൻ അനുവദിക്കണമെന്നായിരുന്നു നിരവധി സാധാരണ കോൺഗ്രസ് പ്രവർത്തകരുടെയും പാർട്ടിക്ക് പുറത്തുള്ളവരുടെയും നിലപാട്.

എന്നാൽ, സതീശനെ മുഖ്യമന്ത്രിയാക്കുന്നതിൽ കോൺഗ്രസിനുള്ളിൽ എല്ലാവരും ആവേശഭരിതരായിരുന്നില്ലെന്നതും രഹസ്യമല്ല. മറ്റ് അവകാശവാദികളും വ്യത്യസ്ത ഗ്രൂപ്പുകളും ഉണ്ടായിരുന്നു. രാഷ്ട്രീയത്തിൽ അതൊന്നും അസാധാരണമായ കാര്യമല്ല. എന്നാൽ, പാർട്ടി നേതൃത്വം തീരുമാനം കൈക്കൊണ്ട് സതീശൻ മുഖ്യമന്ത്രിയായിക്കഴിഞ്ഞാൽ, എല്ലാവരും അഭിപ്രായവ്യത്യാസങ്ങൾ മാറ്റിവെച്ച് അദ്ദേഹത്തിന് ഭരിക്കാൻ ന്യായമായ അവസരം നൽകുമെന്നാണ് പ്രതീക്ഷിക്കപ്പെട്ടത്.

നിർഭാഗ്യവശാൽ, കേരളത്തിലെ കോൺഗ്രസിന്റെ ആവർത്തിച്ച് പ്രത്യക്ഷപ്പെടുന്ന ദൗർബല്യങ്ങളിലൊന്നാണ് ഗ്രൂപ്പ് പോര്. രാഷ്ട്രീയ എതിരാളികളോട് പോരാടാൻ ചെലവഴിക്കുന്നതിനേക്കാൾ കൂടുതൽ ഊർജം പലപ്പോഴും നേതാക്കൾ പരസ്പരം പോരാടാനാണ് ചെലവഴിച്ചിട്ടുള്ളത്. ഈ പ്രവണത കഴിഞ്ഞ കാലങ്ങളിൽ പലതവണ പാർട്ടിക്ക് തിരിച്ചടിയായിട്ടുണ്ട്. നിർണായകമായ ഒരു തിരഞ്ഞെടുപ്പ് വിജയത്തിന് തൊട്ടുപിന്നാലെ അതേ പെരുമാറ്റം വീണ്ടും തുടങ്ങുകയാണെങ്കിൽ, പ്രതിപക്ഷത്തിരുന്ന വർഷങ്ങളിൽ നിന്ന് കോൺഗ്രസ് എന്തെങ്കിലും പഠിച്ചിട്ടുണ്ടോ എന്ന് ജനങ്ങൾ സ്വാഭാവികമായും ചോദിക്കും.

കൂടിയാലോചന സംബന്ധിച്ച് ന്യായമായ പരാതികൾ ഉണ്ടാകാം. ഒരു മുന്നണി സർക്കാരിന് നേതൃത്വം നൽകുന്ന മുഖ്യമന്ത്രി സഹപ്രവർത്തകരെയും സഖ്യകക്ഷികളെയും കേൾക്കേണ്ടതുണ്ട്. സതീശൻ അത് ചെയ്യണം. ചുറ്റുമുള്ളവരിൽ നിന്ന് സ്വയം അകന്നുനിന്നുകൊണ്ട് ഒരു നേതാവിനും ഫലപ്രദമായി ഭരിക്കാനാവില്ല. എന്നാൽ, ഓരോ തീരുമാനവും വിവിധ ഗ്രൂപ്പുകളുടെയും വ്യക്തിഗത താൽപര്യങ്ങളുടെയും സമ്മർദത്തിന് വിധേയമാകുന്നതല്ല കൂടിയാലോചനയുടെ അർഥം. ഒരു സർക്കാരിന് നേതൃത്വം, ദിശാബോധം, തീരുമാനമെടുക്കാനുള്ള ശേഷി എന്നിവയും ആവശ്യമാണ്.

ജോലിക്ക് ആവശ്യമായ ബൗദ്ധികശേഷിയും വാഗ്മിത്വവും മറ്റുള്ളവരെ ബോധ്യപ്പെടുത്താനുള്ള കഴിവും കോൺഗ്രസ് ആശയങ്ങളോടുള്ള പ്രതിബദ്ധതയും സതീശനുണ്ട്. പ്രതിപക്ഷ നേതാവായിരുന്ന വർഷങ്ങളിൽ ഒരു നിലപാട് സ്വീകരിക്കാനും അത് ശക്തമായി സംരക്ഷിക്കാനും അദ്ദേഹം തയ്യാറാണെന്ന് തെളിയിച്ചിട്ടുമുണ്ട്. രാഷ്ട്രീയമായി ഏറെ വെല്ലുവിളികൾ നിറഞ്ഞ കേരളം പോലൊരു സംസ്ഥാനത്തെ നയിക്കുമ്പോൾ ഈ ഗുണങ്ങൾ പ്രധാനമാണ്.

അദ്ദേഹത്തിന് തെറ്റുകൾ സംഭവിക്കും. എല്ലാ മുഖ്യമന്ത്രിമാർക്കും സംഭവിക്കാറുണ്ട്. തെറ്റ് മനുഷ്യസഹജമാണ്. സഹപ്രവർത്തകരായ കോൺഗ്രസ് നേതാക്കൾ അദ്ദേഹത്തിന്റെ തെറ്റുകൾ ചൂണ്ടിക്കാണിക്കുന്നതിലോ അദ്ദേഹത്തോട് വിയോജിക്കുന്നതിലോ തെറ്റില്ല. എന്നാൽ, ഒരു നേതാവിനെ തിരുത്തുന്നതും അദ്ദേഹത്തെ ദുർബലപ്പെടുത്താൻ ശ്രമിക്കുന്നതും തമ്മിൽ വലിയ വ്യത്യാസമുണ്ട്. സതീശനെ മുഖ്യമന്ത്രിയാക്കുന്നതിൽ അതൃപ്തിയുള്ളവർ അദ്ദേഹത്തെ ദുർബലപ്പെടുത്താനുള്ള അവസരമായി ഓരോ തെറ്റിനെയും കാണാൻ തുടങ്ങിയാൽ, അതിന്റെ പ്രത്യാഘാതം സതീശന് മാത്രമല്ല, കോൺഗ്രസിനും യു.ഡി.എഫിനും തന്നെയായിരിക്കും.

ഇവിടെ മറ്റൊരു വിരോധാഭാസവുമുണ്ട്. ഇപ്പോൾ സതീശന്റെ വീഴ്ചകൾ കണ്ടെത്താൻ തിടുക്കം കാണിക്കുന്ന പലരും, കഴിഞ്ഞ പത്ത് വർഷത്തിനിടെ കോൺഗ്രസ് പ്രതിപക്ഷത്തിരുന്ന് പിണറായി വിജയൻ സർക്കാരിനെതിരെ പോരാടുമ്പോൾ ഇത്രയും ശബ്ദമുയർത്തിയിരുന്നില്ല. നിയമസഭയ്ക്കകത്തും പുറത്തും സതീശൻ സർക്കാരിനെതിരെ പോരാട്ടം നയിക്കുമ്പോൾ, മറ്റു പലരും താരതമ്യേന നിശ്ശബ്ദരായിരുന്നു.

അതുകൊണ്ടുതന്നെ, അദ്ദേഹത്തെ മുഖ്യമന്ത്രിയാക്കിയതിൽ ഇപ്പോഴും അസന്തുഷ്ടരായവർ യാഥാർഥ്യബോധത്തോടെ ചിന്തിക്കേണ്ട സമയമാണിത്. വ്യക്തിപരമായ അഭിലാഷങ്ങൾക്കും പഴയ ഗ്രൂപ്പ് താൽപര്യങ്ങൾക്കും ജനങ്ങൾ നൽകിയ അവസരം നശിപ്പിക്കാൻ അനുവദിക്കരുത്. കേരളത്തിലെ വോട്ടർമാർ ഈ സർക്കാരിൽ വിശ്വാസം അർപ്പിച്ചിരിക്കുകയാണ്. അവർ അതിനുള്ള ഫലമാണ് പ്രതീക്ഷിക്കുന്നത്.

അതുകൊണ്ട്, മുഖ്യമന്ത്രിക്ക് പിന്നിൽ കോൺഗ്രസ് നേതൃത്വം ഉറച്ചുനിൽക്കുകയും ജനങ്ങളുടെ പ്രതീക്ഷകൾ നിറവേറ്റാൻ അദ്ദേഹത്തെ സഹായിക്കുകയും വേണം. വിമർശനം ക്രിയാത്മകമായിരിക്കണം. അഭിപ്രായവ്യത്യാസങ്ങൾ ആഭ്യന്തരമായി ചർച്ച ചെയ്യണം. മുന്നണി പങ്കാളികളുമായി തീർച്ചയായും കൂടിയാലോചന നടത്തണം. എന്നാൽ, സ്വന്തം സർക്കാരിനെ പരസ്യമായി വിമർശിക്കുകയും ദുർബലപ്പെടുത്താൻ ശ്രമിക്കുകയും ചെയ്യുന്നതിന് ഒടുക്കം കോൺഗ്രസിന് വലിയ വില നൽകേണ്ടിവരും.

സതീശൻ പോരാട്ടത്തിന് നേതൃത്വം നൽകി. ഭരിക്കാനുള്ള അവസരം അദ്ദേഹം നേടിയെടുത്തു. അദ്ദേഹത്തിന് ആവശ്യമുള്ളപ്പോൾ ഉപദേശം നൽകണം. തെറ്റുപറ്റുമ്പോൾ തിരുത്തുകയും വേണം. എന്നാൽ, നേതൃത്വം നൽകാനുള്ള രാഷ്ട്രീയപരമായ ഇടം അദ്ദേഹത്തിന് നൽകുകയും വേണം.

അദ്ദേഹത്തെ സ്വസ്ഥമായി ഭരിക്കാൻ അനുവദിക്കൂ.

ജോർജ്ജ് എബ്രഹാം
വൈസ് ചെയർമാൻ, ഇന്ത്യൻ ഓവർസീസ് കോൺഗ്രസ്, യു.എസ്.എ.
6 ഒക്ടോബർ 2026