പ്രണയേശ്വരീ മമ ഹൃദയ ഭാവത്തിലെ

പ്രാണവാഞ്ജലീ സുമ തർപ്പണങ്ങൾ, പ്രിയ വസുന്ധരേ സ്വീകരിക്കൂ നിന്റെ മറവി തൻ മാണിക്യ  മൺ ചുവപ്പിൽ !

അലയുകയായിരുനിന്നലെ കാലമാം അലയാഴിയിൽ ഒരു പരമാണുവായ്‌,

പരിഗണിച്ചെന്നെ  പുണർന്നതീ ജീവിത

പരിണാമ സൗഭാഗ്യ വർത്തമാനം !

പാലൊളിച്ചന്ദ്രികാ നീരിൽ കുളിപ്പിച്ചു

താരാട്ടു പാട്ടിന്റെ കാറ്റിലാട്ടി,

തേനും  വയമ്പും  നിവേദിച്ചു ലാളിച്ച

ജീവിതപ്പാതയിൽ കൈ പിടിച്ചു !

തിന്നും കുടിച്ചു മിണ ചേർന്നും സ്വപ്‌നങ്ങൾ

നെഞ്ചോട് ചേർത്തും പുണർന്നുറങ്ങീ,  എങ്കിലും ഇന്നിതാ വച്ചൊഴിയുന്നെന്റെ

ചങ്കിലെ സ്വപ്ന നിറ കുടങ്ങൾ !

ആദി - അനന്തമാ മാദി വിളിക്കുന്നു കാ‌ലകേയന്റെ കളിയരങ്ങിൽ,

ആരോ ഘടിപ്പിച്ച മൂല ഭാവങ്ങളെ

വേണമാ ശിൽപ്പിക്കുടച്ചു വാർക്കാൻ !

പോവുകയാണ് മടങ്ങി യെൻ കാലടി

പാടുകൾ പോലും മറഞ്ഞു പോകും,

എന്നുമുണ്ടാവും പ്രപഞ്ച ഭാവത്തിന്റെ-  പിന്നരങ്ങിൽ എന്റെ തന്മാത്രകൾ !