പോർട്ട് ഓഫ് സ്‌പെയിൻ: ട്രിനിഡാഡ് ആൻഡ് ടൊബാഗോയെ പ്രതിനിധീകരിച്ച 19കാരിയായ നിയമവിദ്യാർഥിനി ഹെയ്‌ലി പിസാഡി മിസ് ഇന്ത്യ വേൾഡ്‌വൈഡ് 2026 കിരീടം നേടി. ഇന്ത്യൻ വംശജരായ വനിതകൾക്കായി സംഘടിപ്പിച്ച അന്താരാഷ്ട്ര സൗന്ദര്യ മത്സരത്തിന്റെ 33-ാമത് പതിപ്പിലാണ് പിസാഡി വിജയിയായത്.

ട്രിനിഡാഡ് ആൻഡ് ടൊബാഗോയിലെ നാഷണൽ അക്കാദമി ഫോർ ദ പെർഫോമിങ് ആർട്‌സിൽ (NAPA) നടന്ന ചടങ്ങിൽ വേൾഡ്‌വൈഡ് പേജന്റ്സ് സഹഅധ്യക്ഷ നീലം സരൺ പിസാഡിക്ക് കിരീടം സമ്മാനിച്ചു.

വിവിധ രാജ്യങ്ങളിൽ നിന്നുള്ള ഇന്ത്യൻ വംശജരായ മത്സരാർഥികൾ പങ്കെടുത്ത പരിപാടി ഇന്ത്യയ്ക്ക് പുറത്തു നടക്കുന്ന ഏറ്റവും ദീർഘകാലമായി തുടരുന്ന ഇന്ത്യൻ സൗന്ദര്യമത്സരമാണെന്ന് സംഘാടകർ അറിയിച്ചു.

മിസ് ഇന്ത്യ വേൾഡ്‌വൈഡ് കിരീടത്തിന് പുറമെ മിസിസ് ഇന്ത്യ വേൾഡ്‌വൈഡ് 2026, മിസ് ടീൻ ഇന്ത്യ വേൾഡ്‌വൈഡ് 2026 എന്നീ കിരീടങ്ങളും സമ്മാനിച്ചു. അമേരിക്കയെ പ്രതിനിധീകരിച്ച ഡോ. ശ്രീദേവി മംഗിനാനി മിസിസ് ഇന്ത്യ വേൾഡ്‌വൈഡ് കിരീടവും നെതർലൻഡ്സിൽ നിന്നുള്ള ലൂന ജയറാം മിസ് ടീൻ ഇന്ത്യ വേൾഡ്‌വൈഡ് കിരീടവും നേടി.

ഇന്ത്യൻ സംസ്കാരം, പാരമ്പര്യം, കലാരൂപങ്ങൾ, മൂല്യങ്ങൾ എന്നിവയ്ക്ക് പ്രാധാന്യം നൽകിയാണ് മത്സരം സംഘടിപ്പിച്ചത്. ഇന്ത്യൻ-അമേരിക്കൻ ദമ്പതികളായ നീലം സരൺ, ധർമാത്മ സരൺ എന്നിവർ വേൾഡ്‌വൈഡ് പേജന്റ്സിന്റെ നേതൃത്വത്തിലാണ് മത്സരം സംഘടിപ്പിച്ചത്.

33 വർഷം പിന്നിട്ട മിസ് ഇന്ത്യ വേൾഡ്‌വൈഡ് മത്സരം ആഗോള ഇന്ത്യൻ പ്രവാസി സമൂഹത്തിലെ വിവിധ തലമുറകളെയും രാജ്യങ്ങളെയും ഒരുമിപ്പിക്കുന്ന വേദിയായി മാറിയിട്ടുണ്ട്.