ഷിക്കാഗോ: ഇന്ത്യൻ അമേരിക്കൻ ഡെമോക്രാറ്റിക് നേതാവ് രാജാ കൃഷ്ണമൂർത്തി ഒഴിയുന്ന ഇല്ലിനോയിയിലെ എട്ടാം കോൺഗ്രസ് ഡിസ്ട്രിക്ടിലെ സീറ്റിലേക്ക് റിപ്പബ്ലിക്കൻ സ്ഥാനാർഥിയായി ടെക് സംരംഭക ജെന്നിഫർ ഡേവിസ് മത്സരിക്കുന്നു. ആദ്യമായാണ് ഡേവിസ് തെരഞ്ഞെടുപ്പ് രാഷ്ട്രീയത്തിലേക്ക് പ്രവേശിക്കുന്നത്.

വിസ്കോൺസിനിലെ കർഷക കുടുംബത്തിൽ ഒൻപത് മക്കളിൽ ആറാമതായി വളർന്ന ഡേവിസ് കോളജ് പഠനകാലത്താണ് ഭർത്താവിനൊപ്പം ടെക്നോളജി കമ്പനി ആരംഭിച്ചത്. പിന്നീട് കമ്പനി ഇന്ത്യയിലേക്ക് പ്രവർത്തനം വ്യാപിപ്പിക്കുകയും കൊൽക്കത്തയിലും ഹൈദരാബാദിലും സാന്നിധ്യം സ്ഥാപിക്കുകയും ചെയ്തു. 2019ൽ സ്വകാര്യ നിക്ഷേപ സ്ഥാപനത്തിന് കമ്പനി കൈമാറുമ്പോൾ ഏകദേശം 240 ജീവനക്കാരുണ്ടായിരുന്നുവെന്ന് ഡേവിസ് വ്യക്തമാക്കി.

ഇന്ത്യയുമായുള്ള ദീർഘകാല ബന്ധം തന്റെ രാഷ്ട്രീയ നിലപാടുകളെയും സ്വാധീനിച്ചിട്ടുണ്ടെന്ന് ഡേവിസ് അഭിപ്രായപ്പെട്ടു. ഇന്ത്യൻ ജീവനക്കാരെയും അവരുടെ കുടുംബങ്ങളെയും അമേരിക്കയിൽ സ്ഥിരതാമസമാക്കാൻ സഹായിച്ച അനുഭവം ഇന്ത്യൻ അമേരിക്കൻ സമൂഹത്തിന്റെ ആശങ്കകൾ മനസ്സിലാക്കാൻ സഹായിച്ചതായും അവർ കൂട്ടിച്ചേർത്തു.

എച്ച്-1ബി വിസ, അന്താരാഷ്ട്ര വിദ്യാർഥികൾക്ക് പഠനത്തിനുശേഷം തൊഴിൽ നേടാനുള്ള അവസരങ്ങൾ, പൗരത്വത്തിലേക്കുള്ള വഴികൾ എന്നിവയിൽ കൂടുതൽ വ്യക്തമായ നയം ആവശ്യമാണെന്നാണ് ഡേവിസിന്റെ നിലപാട്. ഇന്ത്യൻ അമേരിക്കൻ സമൂഹത്തിന് വിദ്യാഭ്യാസം, കുടിയേറ്റം, രാഷ്ട്രീയ പ്രതിനിധിത്വം എന്നിവ പ്രധാന വിഷയങ്ങളാണെന്നും അവർ പറഞ്ഞു.

അതേസമയം, താൻ മത്സരിക്കുന്ന സീറ്റിന്റെ നിലവിലെ പ്രതിനിധിയായ രാജാ കൃഷ്ണമൂർത്തിയെക്കുറിച്ച് ഡേവിസ് അനുകൂലമായ അഭിപ്രായമാണ് പ്രകടിപ്പിച്ചത്. കഴിഞ്ഞ ഒരു ദശാബ്ദമായി കൃഷ്ണമൂർത്തി മണ്ഡലത്തെ മികച്ച രീതിയിൽ പ്രതിനിധീകരിച്ചുവെന്നാണ് പ്രാദേശിക നേതാക്കളുമായി നടത്തിയ ചർച്ചകളിൽ നിന്ന് തനിക്ക് മനസ്സിലായതെന്ന് ഡേവിസ് വ്യക്തമാക്കി.

ആർട്ടിഫിഷ്യൽ ഇന്റലിജൻസ്, ഡാറ്റാ സെന്ററുകൾ, ബ്ലോക്ക്ചെയിൻ തുടങ്ങിയ സാങ്കേതിക മേഖലകളിൽ കൂടുതൽ പരിജ്ഞാനമുള്ള നിയമനിർമാതാക്കൾ കോൺഗ്രസിൽ ആവശ്യമാണെന്നും ഡേവിസ് അഭിപ്രായപ്പെട്ടു. കുടുംബങ്ങളുടെ ഡിജിറ്റൽ സുരക്ഷയ്ക്കായി ‘ഡിജിറ്റൽ ഡോം’ എന്ന ആശയവും അവർ മുന്നോട്ടുവച്ചിട്ടുണ്ട്.

സാമ്പത്തിക മേഖലയിലെ താങ്ങാവുന്ന ജീവിതച്ചെലവ്, സർക്കാർ കടം, ചെറുകിട ബിസിനസുകൾ എന്നിവയ്ക്കാണ് ഡേവിസ് പ്രാധാന്യം നൽകുന്നത്. കോൺഗ്രസിലെത്തിയാൽ ചെറുകിട ബിസിനസ്, എനർജി ആൻഡ് കൊമേഴ്സ്, ഫിനാൻഷ്യൽ സർവീസസ് കമ്മിറ്റികളിൽ പ്രവർത്തിക്കാനാണ് താൽപര്യമെന്നും അവർ പറഞ്ഞു.

ഡെമോക്രാറ്റിക് സ്ഥാനാർഥി മെലിസ ബീനാണ് ഡേവിസിന്റെ എതിരാളി. 2017 മുതൽ ഇല്ലിനോയിയിലെ എട്ടാം ജില്ലയെ പ്രതിനിധീകരിച്ചുവരുന്ന രാജാ കൃഷ്ണമൂർത്തിയുടെ പിന്മാറ്റത്തോടെയാണ് സീറ്റ് തുറന്നത്. ഇന്ത്യൻ, ഏഷ്യൻ അമേരിക്കൻ സമൂഹത്തിന് ശക്തമായ സാന്നിധ്യമുള്ള മണ്ഡലമായതിനാൽ മത്സരത്തിന് പ്രത്യേക പ്രാധാന്യമുണ്ട്.