ഫ്‌ളൈദുബായ് വിമാനത്തിലെ കാപ്റ്റൻ സ്മിത് മച്ചാറിനെ മത തീവ്രവാദി എന്ന് ഇപ്പോൾ സംശയിക്കപ്പെടുന്ന കോ-പൈലറ്റ് ആക്രമിച്ചപ്പോൾ ധൈര്യത്തിനായി ഹനുമാൻ ചാലിസ ചൊല്ലി എന്ന് അദ്ദേഹം പ്രധാനമന്ത്രിയോട് പറഞ്ഞതായി  നമ്മൾ ടി.വി. യിലൂടെ കേട്ടു. ഇത് അദ്ദേഹത്തിന്റെ വിശ്വാസമാണ്. വിശ്വാസം എന്നത് തെളിവുകളുടെ പൂർണ്ണമായ സാന്നിധ്യമില്ലാതെ തന്നെ ഒരു കാര്യത്തിലോ, ആശയത്തിലോ, ദൈവത്തിലോ ഉറച്ചു നിൽക്കുന്ന മാനസികാവസ്ഥയാണ്. നമുക്ക് എന്താണ് ഹനുമാൻ ചാലിസ എന്ന് അറിയാൻ ശ്രമിക്കാം. 

ഒരിക്കൽ, അക്ബറിനു ശ്രീരാമാനുമായുള്ള ഒരു കൂടിക്കാഴ്ച വേണമെന്ന ഒരു ചിന്തയുണ്ടായി. അതിനവസരമുണ്ടാക്കികൊടുക്കാൻ തുളസിദാസ്‌ ഗോസ്വാമിജിയെ തന്റെ സദസ്സിലേക്ക് വിളിപ്പിക്കുകയും തന്റെ ആഗ്രഹം നിർവഹിച്ചുകൊടുക്കണമെന്നു ആവശ്യപ്പെടുകയുംചെയ്തു. തന്റെ ഭക്തർക്ക് മാത്രമേ ശ്രീരാമൻ ദർശനം നൽകാറുള്ളൂ എന്ന തുളസീദാസിന്റെ മറുപടി കേട്ട അക്ബർ കോപാകുലനായി ഗോസ്വാമി തുളസീദാസിനെ  തടവിലാക്കി. തടവിലായിരുന്നപ്പോൾ ഗോസ്വാമിജി അവധി ഭാഷയിൽ 'ഹനുമാൻ ചാലിസ' രചിച്ചു. ഭക്തിപൂർവ്വം ആ സൃഷ്ടി നിർവഹിക്കപ്പെട്ട ഉടൻ തന്നെ   കാരാഗ്രഹത്തിനു ചുറ്റും , കുരങ്ങന്മാർ വളയുകയും ആക്രമണം അഴിച്ചുവിടുകയും വളരെ അധികം  നാശനഷ്ടങ്ങൾ വരുത്തുകയും ചെയ്തു.  കുരങ്ങന്മാരെ നിയന്ത്രിക്കാൻ കൊട്ടാരത്തിലെ പട്ടാളക്കാർക്ക്    സാധിച്ചില്ല. സ്ഥിതിഗതികൾ വഷളാകുന്നുവെന്നു കണ്ട് ഒരു മന്ത്രിയുടെ ഉപദേശപ്രകാരം അക്ബർ തുളസീദാസിനെ ജയിൽമോചിതനാക്കി.  തുളസീദാസ് മോചിതനായ നിമിഷം തന്നെ ആ പ്രദേശത്തുണ്ടായിരുന്ന കുരങ്ങുകൾ അവിടം വിട്ടുപോയി.   ഈ അസാധാരണ സംഭവത്തെത്തുടർന്ന് ഗോസ്വാമി തുളസീദാസിന്റെ കീർത്തി ദൂരദേശങ്ങളിലേക്ക് പരക്കാൻ തുടങ്ങി.

പതിനാറാം നൂറ്റാണ്ടിലെ ഹിന്ദു കവിയും സന്യാസിയും തത്വചിന്തകനുമായ തുളസീദാസ് ‘ഹനുമാൻ ചാലിസ’ കൂടാതെ  രാമചരിതമാനസ്* ഉൾപ്പെടെ രചിച്ചിട്ടുള്ള അദ്ദേഹത്തിന്റെ കൃതികൾക്ക് ഹൈന്ദവധർമ്മത്തിൽ ഉന്നതമായ സ്ഥാനമാണുള്ളത്. അവ അതീവ ഭക്തിബഹുമാനങ്ങളോടെ ആദരിക്കപ്പെടുകയും ചെയ്യുന്നു. ശ്രീരാമന്റെ അടിയുറച്ച ഭക്തനായ ഹനുമാന്റെ ഗുണങ്ങൾ, വീര്യം, പരിശുദ്ധമായ സ്വഭാവം എന്നിവയെക്കുറിച്ച് നാല്‍പ്പത് 'ചൗപായി'കളിലായി (നാല് വരികളുള്ള ശ്ലോകങ്ങൾ) ഈ കൃതി വിവരിക്കുന്നു. ഹിന്ദുമതവിശ്വാസികൾ , ചൊവ്വ, ശനി ദിവസങ്ങൾ ബജ്രംഗ്ബലിക്ക് (ഹനുമാൻ) സമർപ്പിക്കപ്പെട്ടവയായി കണക്കാക്കപ്പെടുന്നു. എം.എസ്. സുബ്ബുലക്ഷ്മി, ലതാ മങ്കേഷ്‌കർ, മഹേന്ദ്ര കപൂർ, എസ്.പി. ബാലസുബ്രഹ്മണ്യം, ശങ്കർ മഹാദേവൻ, അനുരാധ പൗഡ്‌വാൾ, തുടങ്ങിയവർ ഹനുമാൻ ചാലിസ് ആലപിച്ചിട്ടുണ്ട്.  

ശ്രീറാം ഭക്തനായ ഹനുമാന് സമർപ്പിക്കപ്പെട്ട കാവ്യരചനയാണ് ഹനുമാൻ ചാലിസ. വടക്കേ ഇന്ത്യയിൽ പ്രചാരത്തിലുള്ള ഒന്നാണ്ഹനുമാൻ ചാലീസ. സനാതന ധർമ്മത്തിൽ, ധീരതയുടെയും ഭക്തിയുടെയും ആത്മധൈര്യത്തിന്റെയും മൂർത്തിമദ്ഭാവമായാണ് ഹനുമാൻ സ്വാമിയെ കണക്കാക്കുന്നത്. ഹനുമാൻ ഒരു ഹിന്ദു ദേവനും ശ്രീരാമന്റെ ഭക്തനുമാണ്. രാമായണത്തിലെ പ്രധാന കഥാപാത്രങ്ങളിൽ ഒരാളാണ് അദ്ദേഹം. ശൈവ പാരമ്പര്യമനുസരിച്ച്, അദ്ദേഹം ശിവന്റെ ഒരു അവതാരം കൂടിയാണ്. ഹനുമാൻ ബജ്രംഗ്ബലി, പവൻപുത്രൻ, മാരുതിനന്ദനൻ, കേസരിനന്ദനൻ, മഹാവീരൻ തുടങ്ങിയ പേരുകളിലും അറിയപ്പെടുന്നു. ഹൈന്ദവ ഗ്രന്ഥങ്ങൾ പ്രകാരം ഹനുമാൻ നിത്യനും അമർത്യനുമാണ്. 

ഹനുമാനെ ധ്യാനിക്കുന്നതും അദ്ദേഹത്തിന്റെ മന്ത്രങ്ങൾ നിത്യവും ജപിക്കുന്നതും എല്ലാ ഭയങ്ങളെയും അകറ്റുന്നുവെന്നാണ് ഹൈന്ദവ വിശ്വാസം. കടുത്ത പ്രതിസന്ധി ഘട്ടങ്ങളിൽ ഹനുമാൻജിയുടെ ദൈവികമായ സഹായം ലഭ്യമാക്കാൻ ചാലിസ ചൊല്ലുന്നത് സഹായിക്കുമെന്ന് ഹിന്ദുക്കൾ വിശ്വസിക്കുന്നു. ഹിന്ദുമതത്തിലെ ഏറ്റവും ജനപ്രിയവും വ്യാപകമായി ചൊല്ലപ്പെടുന്നതുമായ സ്തുതിഗീതങ്ങളിൽ ഒന്നാണ്. ഹനുമാൻ ചാലിസ. നിരവധി ഭക്തർ ദിവസവും  ഇത് ചൊല്ലാറുണ്ട്.
ചാലിസ' എന്ന വാക്ക് 'നാൽപത്' (40) എന്നതിനെ സൂചിപ്പിക്കുന്നു. ഈ കാവ്യം 40 വരികളുള്ള ശ്ലോകങ്ങളും (ചൗപായികൾ), അവയ്ക്ക് മുൻപും പിൻപുമായി വരുന്ന ചെറിയ ഈരടികളും (ദോഹകൾ) ഉൾപ്പെടെ ആകെ 43 വരികൾ ചേർന്നതാണ്. ഹനുമാന് ശ്രീരാമനോടുള്ള അചഞ്ചലമായ ഭക്തിയും രാമനോടുള്ള സമർപ്പണവും,  സീതയെ  അന്വേഷിച്ച് സമുദ്രം ചാടി കടന്നത്, ലങ്കയ്ക്ക്  തീ കൊളുത്തിയത്  ലക്ഷ്മണനെ രക്ഷിക്കാൻ മൃതസഞ്ജീവനി കൊണ്ടുവന്നത് തുടങ്ങി രാമായണത്തിലെ പ്രധാന സംഭവങ്ങൾ  വിവരിച്ചിട്ടുണ്ട്. ഹനുമാൻ സ്വാമിയുടെ അളവറ്റ ശക്തി, ധൈര്യം, ജ്ഞാനം,  ബ്രഹ്മചര്യം , ബുദ്ധിശക്തി തുടങ്ങിയ ദിവ്യഗുണങ്ങളെ ഇതിൽ വാഴ്ത്തുന്നു. ഭയം, ഉത്കണ്ഠ, തടസ്സങ്ങൾ എന്നിവ മറികടക്കാൻ ഭക്തർ ഈ സ്തോത്രം ജപിക്കുന്നു; ഹനുമാന്റെ സംരക്ഷകമായ അനുഗ്രഹവും ആന്തരിക ശക്തിയും ഇതിലൂടെ ലഭിക്കുമെന്ന് അവർ വിശ്വസിക്കുന്നു.

ഇരുപത്തിനാലാമത്തെ  ശ്ലോകം താഴെ പറയുന്നതാണ്. ഇത് ഭക്‌തർ കൂടുതൽ തവണ  ആവർത്തിക്കുന്നു.

ഭൂത പിശാച നികട നഹി ആവൈ ।
മഹവീര ജബ നാമ സുനാവൈ

=മഹാവീരനായ അങ്ങയുടെ  നാമം ജപിക്കുമ്പോൾ പ്രേതങ്ങളോ ദുഷ്ടശക്തികളോ അടുത്തെത്തുന്നില്ല. ഇത് ഭയവും നെഗറ്റീവ് ഊർജ്ജവും അകറ്റാൻ സഹായിക്കുന്നു.
ഹനുമാൻ ചാലിസ അവസാനിക്കുന്നത് താഴെ പറയുന്ന വരികളോടെയാണ്.

പവന തനയ സംകട ഹരണ - മംഗള മൂർത്തി  രൂപ് ।
രാമ ലഖന സീതാ സഹിത്  - ഹൃദയ ബസഹു സുർ ഭൂപ്

=വായുപുത്രാ, ദുഃഖനാശകാ, മംഗളസ്വരൂപാ—ദയവായി രാമനോടും ലക്ഷ്മണനോടും സീതയോടുമൊപ്പം എന്റെ ഹൃദയത്തിൽ വസിച്ചരുളേണമേ.

ഹനുമാൻ ചാലിസ വായിക്കാൻ താൽപ്പര്യമുള്ളവർക്ക് നാട്ടിലെ ആത്മീയ പുസ്തകശാലകളിൽ നിന്നോ ഇവിടെ വാൾമാർട്ടിൽ നിന്നോ വാങ്ങാവുന്നതാണ്.
ശുഭം