2026 ലെ അന്താരാഷ്ട്ര വയോജന ദിനത്തിന്റെ പ്രമേയം " ദീർഘായുസ്സിന്റെ യുഗം, ദീർഘായുസ്സിനായുള്ള പുനർവിചിന്തന സംവിധാനങ്ങൾ " എന്നതാണ്. കൂടുതൽ കാലം ജീവിക്കുന്ന ജനങ്ങൾക്ക് ആരോഗ്യ സംരക്ഷണം, സാമൂഹിക സംരക്ഷണം, തൊഴിൽ, പാർപ്പിടം, പരിചരണ സംവിധാനങ്ങൾ എന്നിവ പുനർരൂപകൽപ്പന ചെയ്യേണ്ടതിന്റെ ആവശ്യകത ഈ തീം എടുത്തുകാണിക്കുന്നു. പ്രായമായവരെ ആരോഗ്യത്തോടെയും സാമ്പത്തികമായി സുരക്ഷിതരായും നിലനിർത്താനും അവരുടെ സമൂഹങ്ങൾക്ക് അർത്ഥവത്തായ സംഭാവന നൽകാൻ പ്രാപ്തരാക്കാനും സഹായിക്കുന്ന നയങ്ങൾ ഇത് പ്രോത്സാഹിപ്പിക്കുന്നു.  

ഒക്ടോബർ 1 അന്താരാഷ്ട്ര വയോജന ദിനം. പ്രായം ജീവിതത്തിന്റെ സായാഹ്നമാണെന്നു പറയാറുണ്ട്. എന്നാൽ സായാഹ്നം ഒരു അവസാനമല്ല, പകലിന്റെ അനുഭവങ്ങളെല്ലാം ചേർത്ത് ജീവിതത്തെ കൂടുതൽ അർത്ഥവത്താക്കുന്ന മനോഹരമായൊരു ഘട്ടമാണ്. ഒരു വ്യക്തിയുടെ ജീവിതത്തിൽ വർഷങ്ങൾ കൂടുമ്പോൾ കുറയുന്നത് യൗവനത്തിന്റെ ചുറുചുറുക്കായിരിക്കാം,എന്നാൽ അനുഭവത്തിന്റെ ആഴവും ഓർമ്മകളുടെ സമ്പത്തും ജീവിതത്തെക്കുറിച്ചുള്ള തിരിച്ചറിവും കൂടിക്കൊണ്ടേയിരിക്കും. ഒരു കുടുംബത്തിന്റെ ഇന്നലകളെ താങ്ങിനിർത്തിയവരാണ് ഇന്നത്തെ വയോജനങ്ങൾ. മക്കളുടെ വിദ്യാഭ്യാസത്തിനും കുടുംബത്തിന്റെ വളർച്ചയ്ക്കുമായി സ്വന്തം ആഗ്രഹങ്ങൾ പലതും മാറ്റിവെച്ചവർ. അവരുടെ അധ്വാനവും ത്യാഗവും ചേർന്നാണ് പല വീടുകളുടെയും അടിത്തറ പാകപ്പെട്ടത്. അതുകൊണ്ടുതന്നെ വയോജനങ്ങളെ പരിചരിക്കുന്നത് ഒരു ഔപചാരിക കടമ മാത്രമല്ല, നമ്മെ ഇന്നത്തെ നിലയിലെത്തിച്ച ഒരു തലമുറയോടുള്ള നന്ദിയുടെ പ്രകടനമാണ്.

ഇന്നത്തെ ജീവിതത്തിൽ സാങ്കേതികവിദ്യ മനുഷ്യരെ കൂടുതൽ അടുപ്പിച്ചുവെന്നു തോന്നുമ്പോഴും പല വയോജനങ്ങളും ഏകാന്തതയുടെ വേദന അനുഭവിക്കുന്നുണ്ട്. ഒരേ വീട്ടിൽ താമസിച്ചിട്ടും പരസ്പരം സംസാരിക്കാൻ സമയം കണ്ടെത്താനാകാത്ത അവസ്ഥകൾ വർധിക്കുന്നു. തിരക്കേറിയ ജീവിതത്തിനിടയിൽ വയോജനങ്ങൾക്ക് ഏറ്റവും ആവശ്യമുള്ളത് വിലകൂടിയ സമ്മാനങ്ങളല്ല, കുറച്ച് സമയം, സ്നേഹത്തോടെ കേൾക്കുന്ന ഒരു ചെവി, ചേർത്തുപിടിക്കുന്ന ഒരു കൈ, തങ്ങൾ ഇപ്പോഴും കുടുംബത്തിന്റെ പ്രധാനപ്പെട്ട ഭാഗമാണെന്ന ബോധം അതാണ്. വയോജന സംരക്ഷണം കുടുംബത്തിന്റെ മാത്രം ഉത്തരവാദിത്വമല്ല. സമൂഹവും ഭരണകൂടവും ഒരുപോലെ ശ്രദ്ധിക്കേണ്ട വിഷയമാണിത്. ആരോഗ്യപരിരക്ഷ, സാമ്പത്തിക സുരക്ഷ, സുരക്ഷിതമായ താമസസൗകര്യം, സാമൂഹിക പങ്കാളിത്തം, മാനസിക പിന്തുണ എന്നിവ വയോജനങ്ങളുടെ അവകാശങ്ങളായി തന്നെ പരിഗണിക്കപ്പെടണം. അവരുടെ അറിവും കഴിവുകളും സമൂഹത്തിന്റെ വളർച്ചയ്ക്കായി ഉപയോഗപ്പെടുത്താനുള്ള അവസരങ്ങളും ഒരുക്കേണ്ടതുണ്ട്. പ്രായം കൂടിയെന്ന കാരണത്താൽ ഒരാളുടെ അഭിപ്രായത്തിനും കഴിവിനും പ്രസക്തി നഷ്ടപ്പെടുന്നില്ല.  

വയോജന ദിനം ആഘോഷിക്കുന്നതിന്റെ യഥാർത്ഥ അർത്ഥം ഒരു ദിവസം മാത്രം മുതിർന്നവരെ ഓർക്കുന്നതിലല്ല. അവരുടെ ജീവിതത്തെ ബഹുമാനിക്കുന്ന ഒരു സംസ്കാരം വളർത്തിയെടുക്കുന്നതിലാണ്. കുട്ടികൾക്ക് മുത്തശ്ശന്റെയും മുത്തശ്ശിയുടെയും കഥകൾ കേൾക്കാൻ സമയം നൽകുന്നതും, കുടുംബ തീരുമാനങ്ങളിൽ മുതിർന്നവരുടെ അഭിപ്രായങ്ങൾക്ക് വില നൽകുന്നതും, അവരുടെ ഏകാന്തത തിരിച്ചറിയുന്നതും വലിയ മാനുഷിക മൂല്യങ്ങളാണ്. ഇന്ന് നാം ചെറുപ്പക്കാരായിരിക്കാം,നാളെയുടെ വയോജനങ്ങൾ നമ്മളായിരിക്കും. അതിനാൽ വയോജനങ്ങളോട് നാം കാണിക്കുന്ന സമീപനം നമ്മുടെ സമൂഹത്തിന്റെ ഭാവിയോടുള്ള സമീപനം കൂടിയാണ്. പ്രായത്തെ ബഹുമാനിക്കുന്ന സമൂഹം അനുഭവത്തെ ബഹുമാനിക്കുന്ന സമൂഹമാണ്. അനുഭവത്തെ ബഹുമാനിക്കുന്ന സമൂഹത്തിന് മാത്രമേ തലമുറകളെ തമ്മിൽ ബന്ധിപ്പിച്ച് മുന്നോട്ട് പോകാൻ കഴിയൂ.

വയോജന ദിനം നമ്മെ ഓർമ്മിപ്പിക്കുന്നത്, പ്രായം ഒരാളുടെ വില കുറയ്ക്കുന്നില്ല, മറിച്ച് ജീവിതം നൽകിയ അറിവിന്റെ മുദ്ര കൂടുതൽ ആഴത്തിലാക്കുകയാണ് ചെയ്യുന്നത്. അവരുടെ കൈകളിലെ ചുളിവുകളിൽ ഒരു കാലത്തിന്റെ കഥയുണ്ട്; അവരുടെ ഓർമ്മകളിൽ ഒരു തലമുറയുടെ ചരിത്രമുണ്ട്. ആ ചരിത്രത്തെ ആദരിക്കുകയും ആ മനുഷ്യരെ ചേർത്തുപിടിക്കുകയും ചെയ്യുക എന്നതാണ് നമ്മുടെ യഥാർത്ഥ സംസ്കാരത്തിന്റെ അടയാളം. വയോജനദിനം കരുതലിന്റെ കരസ്പർശം ആണ്. വയോജനങ്ങളെ സ്നേഹത്തോടെ ചേർത്ത് പിടിക്കുന്ന ഒരു തലമുറ ഉണ്ടാകട്ടെ എന്ന്‌ ആശംസിക്കുന്നു.