ഭൂമിയിലെ സ്വർഗ്ഗത്തിൽ ജീവിക്കാമെന്ന് കരുതിയാണ്  അമേരിക്കക്ക് വണ്ടികയറിയത്. അമേരിക്ക  തന്നെയാണ് സ്വർഗ്ഗം  എന്നുകരുതിയാണ്  പതിറ്റാണ്ടുകൾ ഇവിടെ ജീവിച്ചതും    .

പക്ഷെ ഇപ്പോൾ അറിയുന്നു- ഭൂമിയിലെ സ്വർഗ്ഗം - ഏറ്റവും കൂടുതൽ ജനങ്ങൾ സന്തോഷമായി ജീവിക്കുന്നത്, ഫിൻലൻഡ്‌ എന്ന രാജ്യത്താണെന്ന്. ഹാപ്പിനെസ് ഇൻഡക്സ് എന്നൊരു അളവുകോൽ വച്ച് ലോകരാഷ്ട്രങ്ങളെ അളന്നപ്പോൾ, കഴിഞ്ഞ ഒമ്പതുവർഷമായിട്ട് ഏറ്റവും കൂടുതൽ സംത്രിപ്തിയും, ശാന്തിയും സമാധാനപരവുമായി പൗരന്മാർ ജീവിക്കുന്ന രാജ്യം ഫിൻലൻഡ്‌ ആണെന്ന്..

ഒരുപ്രാവശ്യം മാത്രം ഒന്നാം സ്ഥാനം കിട്ടിയിരുന്നെങ്കിൽ, കണക്കിലെ കള്ള കളി എന്നൊക്കെ വിചാരിച്ച് തള്ളിക്കളയാമായിരുന്നു. ഇതിപ്പോൾ, തുടർച്ചയായി ഒമ്പതു വർഷം!

അടുത്ത വണ്ടിപിടിച്ച് ഫിൻലൻഡിലേക്ക് പോയാലോ?

ഒരുവർഷത്തിൽ മൂന്നുമാസം മാത്രം, അല്പമെങ്കിലും സുഖകരമായ കാലാവസ്ഥ അനുഭവപ്പെടുന്ന പ്രദേശത്ത് എങ്ങനെയാണ് ജനങ്ങൾ ആസ്വദിച്ച് ജീവിക്കുന്നത്?.

ഏതാണ്ട് 5 മാസത്തോളം നീണ്ടു നിൽക്കുന്ന തണുപ്പുകാലത്ത് -30 ഡിഗ്രി സെൽഷ്യസ് വരെ താപനില താഴേക്ക് പോകും.

എന്നിരുന്നാലും, അവിടുത്തെ ജനങ്ങളുടെ ജീവിത നിലവാരം വളരെ  ഉയർന്നതാണ്.

ആരോഗ്യം, വിദ്യാഭ്യാസം, പെൻഷൻ എന്നിവയെല്ലാം കുറ്റമറ്റ രീതിയിൽ സർക്കാർ ജനങ്ങൾക്ക് എത്തിച്ചുകൊടുക്കുന്നു. പൊതുജനങ്ങൾക്ക്, സർക്കാർ സ്ഥാപനങ്ങളോടും, ഇടപാടുകളോടും വലിയ വിശ്വാസമാണുള്ളത്.

ഫിൻലൻഡിലെ , ജോലിക്കിടയിലുള്ള  ഒഴിവുവേളകൾ ആഘോഷിക്കാനുള്ളതാണ് എന്ന സംസ്കാരം ആയാസ രഹിതമായി ജീവിതം മുന്നോട്ടു കൊണ്ടുപോകുവാൻ സഹായിക്കുന്നു.

പ്രകൃതിയുമായി ഇണങ്ങി ജീവിക്കാനായി, വളരെ അധികം പാർക്കുകളും അവിടെ നിർമ്മിച്ചിട്ടുണ്ട്.

എല്ലാറ്റിനും ഉപരിയായി, അഴിമതി രഹിത ഭരണ പ്രക്രിയ, പൊതുജന സുരക്ഷ ഉറപ്പുവരുത്തുന്നു.

ഇതെല്ലാം അറിഞ്ഞുകഴിഞ്ഞപ്പോൾ, അവിടെ സ്ഥിരതാമസം സാധ്യമായില്ല എങ്കിലും ഒരുപ്രാവശ്യമെങ്കിലും സന്ദർശിക്കണമെന്ന് ഉറപ്പിച്ചു.

അപ്പോഴാണ് മറ്റൊരുകാര്യം ആലോചിച്ചത്.

അല്ല, ഇത് ഭൂമിയിലെ സ്വർഗ്ഗം അല്ലെ, പക്ഷെ മരിച്ചുകഴിഞ്ഞാൽ ചെല്ലേണ്ട

സ്വർഗ്ഗത്തിൽ എത്തിപിടിക്കണമെങ്കിൽ, കുറെ വിശ്വാസവും ആചാരങ്ങളുമൊക്കെ ചെയ്യേണ്ടേ?

അതിനവിടെ സൗകര്യം ഉണ്ടാവുമോ?

വിരൽത്തുമ്പിൽ എല്ലാഅറിവുകളും ഇപ്പോൾ സാദ്ധ്യമാക്കി തന്നുകൊണ്ടിരിക്കുന്ന  “ഇന്റർനെറ്റിൽ " ഫിൻലൻഡിലെ മതങ്ങൾ" എന്ന് സെർച്ച് ചെയ്തു.

ഇവാൻജെലിക്കൽ ലൂഥറിൻ ചർച്ച് വിഭാഗത്തിൽ പെട്ടവരാണ് ഭൂരിഭാഗം ഫിൻലൻഡുകാരും. ക്രിസ്തുമസ്‌, ഈസ്റ്റർ, വിവാഹം, ഫ്യൂണറൽ എന്നീ സമയങ്ങളിൽ മാത്രമേ പലരും പള്ളികൾ സന്ദർശിക്കാറുള്ളു. ശരാശരി പള്ളി  സന്ദർശനം ഒരുവർഷ ത്തിൽ രണ്ടുതവണ മാത്രം.

ചുരുക്കത്തിൽ മതത്തിന് വ്യക്തികളുടെ മേലുള്ള നിയന്ത്രണം വളരെ ദുർബലം.

1900 മുതലുള്ള ചരിത്രം നോക്കിയാൽ മതമില്ലാത്തവരുടെ എണ്ണം കൂടിവരുന്നതായും കാണുവാൻ സാധിക്കും.

അയ്യോ! അപ്പോൾ അവരുടെ ആപ്ത വാക്യം

"മതമില്ലെങ്കിലും മനുഷ്യൻ നന്നായാൽ മതി" എന്നാണല്ലോ ?

ഫിൻലൻഡിലെ വിദ്യാലയങ്ങൾ തുല്യത, സഹവർത്തിത്വം, ബഹുമാനം എന്നിവക്കാണ് മുൻ‌തൂക്കം കൊടുത്തിരിക്കുന്നത്. സാമൂഹ്യ ബോധം, സാമൂഹ്യ നീതി, സാമൂഹ്യ പ്രതിബദ്ധത എല്ലാം തന്നെ വിദ്യാലയങ്ങൾ പഠിപ്പിക്കുന്നു.   സാക്ഷരത 100 ശതമാനം ആയിരിക്കുന്നതും രാജ്യത്തെ പുരോഗതിയിലേക്ക് നയിച്ചിരിക്കുന്നു.

വേൾഡ് ഹാപ്പിനെസ്സ് സ്കോർ റിപ്പോർട്ടിൽ, അമേരിക്കയുടെ സ്ഥാനം 23rd ആണെങ്കിൽ,  ഇന്ത്യയാകട്ടെ പരിതാപകരമായ 116 th സ്ഥാനത്തേക്ക് പിന്തള്ളപ്പെട്ടിരിക്കുന്നു. ഹാപ്പിനെസ്സ് സ്‌കോറിൽ ഏറ്റവും പിന്നിലുള്ളത് അഫ്ഘാനിസ്താനാണ്.

മരണശേഷമുള്ള സ്വർഗ്ഗം എന്നത് ഒരു വിശ്വാസം മാത്രമാകുന്നു. അത് ഉണ്ടെങ്കിൽ തന്നെ, കിട്ടാൻ സാദ്ധ്യത 50/50 ആകുന്നു. ഇതുവരെ മനുഷ്യർ വിക്ഷേപിച്ച സ്പേസ് വാഹനങ്ങൾക്കോ, ടെലിസ്കോപ്പുകൾക്കോ, ഉണ്ടെന്ന് പറയപ്പെടുന്ന സ്വർഗ്ഗത്തെ ഇതുവരെ  കണ്ടുപിടിക്കാൻ  സാധിച്ചിട്ടുമില്ല.

നമ്മൾക്ക് ചുറ്റും സ്വർഗ്ഗം നിർമിക്കുവാൻ എല്ലാവരും ശ്രമിച്ചിരുന്നു എങ്കിൽ,

എല്ലാ രാജ്യങ്ങളും ഫിൻലൻഡ്‌ പോലെ ആകുമായിരുന്നു. ഫിൻലൻഡുകാർ അവരുടെ രാജ്യം സ്വർഗ്ഗമാക്കി മാറ്റി, ഇപ്പോൾ അവർ അനുഭവിച്ചുകൊണ്ടിരിക്കുന്ന ജീവിതം തന്നെ ആഘോഷമാക്കി മാറ്റുന്നു. അവരുടെ മാതൃക പിന്തുടർന്നാൽ, എല്ലാ രാജ്യങ്ങളും സ്വർഗ്ഗമാവും.  അതിന് ഒരു മത വിശ്വാസത്തിന്റെയും ആവശ്യമില്ല എന്നും, പകരം ശാസ്ത്രീയമായ വിദ്യാഭാസത്തിലൂടെ,  പൗര ബോധവും, നീതിബോധവും, അഴിമതി രഹിതവുമായ തലമുറയെ രൂപപെടുത്തിയാൽ മാത്രം മതിയാവും എന്നുമാണ് ഫിൻലൻഡ്‌ നമ്മളെ പഠിപ്പിക്കുന്നത്.

https://www.smithsonianmag.com/smart-news/finland-is-named-the-happiest-country-in-the-world-for-the-ninth-year-in-a-row-180988388/

https://en.wikipedia.org/wiki/Religion_in_Finland