രണ്ടര ശതാബ്ദത്തിന്‍ സ്വാതന്ത്ര്യ ശംഖധ്വനി
വിണ്‍തലമാകെയിന്നു മുഴങ്ങുമീവേളയില്‍
വര്‍ഷങ്ങള്‍ പിന്നിലേക്കോര്‍മ്മകള്‍ പായിക്കവേ
ഹര്‍ഷപൂരിതമായി പൂളകം കൊള്‍വൂ മേനി
സ്വാതന്ത്ര്യമമൃതായ, സ്വാതന്ത്ര്യം ജീവനായ
ഭൂതല മഹാശക്തി തന്നെയാണമേരിക്ക !
ശാസ്ത്ര വിജ്ഞാന വീചി ആയിരക്കണക്കിന്
വിസ്ത്രതം വിക്ഷേപിച്ച ബുദ്ധിയാണമേരിക്ക!
ആഗോള മഹായുദ്ധം രണ്‍ടിലും പരിഹാരം
ഭൂഗോള ജനതയ്ക്കു നല്‍കിയതമേരിക്ക !
സങ്കടകരമായ വര്‍ണ്ണത്തിന്‍ വിവേചനം
'ലിങ്കണി'ല്‍ക്കൂടി തീര്‍ത്ത രാജ്യമാണമേരിക്ക !
ശോകത്തിലെവിടെയുമറിഞ്ഞു കൈനീട്ടുന്ന
ലോകത്തിന്‍ കലവറയെന്നുമേ യമേരിക്ക !
ലോകസംസ്‌ക്കാരങ്ങളൊരുമിച്ചു കൈകോര്‍ക്കുന്ന
ലോഹസങ്കരമായ 'മെല്‍റ്റിങ് പോട്ടാ'ണിവിടം !

എങ്കിലോ പറയാനുണ്ടിവിടെ ചിലതൊക്കെ
സങ്കടകരമതു നാളത്തേയ്ക്കുള്ളതെന്നാല്‍
ബുദ്ധിയും വിവേകവുമുള്ളവരിങ്ങനെയോ
ശുദ്ധമണ്ടരെപ്പോലെ ജീവിതം കഴിക്കന്നു?
ക്രൈസ്തവ സംസ്‌ക്കാരമേ നിന്നെയിന്നമേരിക്ക
നിസ്ത്രപം വില്‍ക്കുന്നതു നീയൊട്ടും കാണുന്നില്ലേ ?
മാതാവും പിതാവുമിന്നദ്യാപി പിരിയാതെ
ശ്രീതാവും വിധത്തിലോ കുടുംബം പുലര്‍ത്തുന്നു?
മക്കളെക്കണ്ടാലവര്‍ മക്കളെന്നറിയുവാന്‍
പില്‍ക്കാലത്തു ചിലര്‍ക്ക് എങ്ങനെ സാധിക്കുന്നു?
മക്കള്‍ക്കു സ്‌നേഹമൊന്നും കൊടുക്കാത്തവര്‍ക്കെന്ത്
മക്കളില്‍ കരുണയും സ്‌നേഹവും പ്രതീക്ഷിപ്പാന്‍!
ദ്വാദശം വരുന്നേര മിണയെത്തേടീടുവാന്‍
ആദര്‍ശം പകരുവാന്‍ വീട്ടിലാരിരിക്കുന്നു?
സ്ത്രീത്വത്തിന്‍ നഗ്നതയെ വിറ്റിട്ടു കാശാക്കുന്ന
'ഫ്രീ'ജന പരിപാടി സവ്രത്ര, യിനിയെന്ത്?
ദെവത്തെ ചിറികൊണ്ടുവിളിച്ചു കളിക്കുന്ന
ദൈവമില്ലാത്ത രാജ്യമാകണോ അമേരിക്ക?
നാല്‍പ്പത്താറു ഭരണത്തലവന്മാര്‍ ഭരിച്ച
നാടാണീ ലോകത്തിന്റെ ശാദ്വല ഭൂവിഭാഗം
ജീവിതമഴിച്ചൊന്നു പണിയാന്‍ തരപ്പെട്ടാല്‍
ഭാവി ശോഭനമാകും രാജ്യവും നശിച്ചിടാ !
-------
ദ്വാദശം = ഇരുപത്