ഡാളസ്: കേരളത്തിലെ ജനങ്ങളെ ആകാംഷയുടെ മുൻമുനയിൽ നിർത്തി അവസാനം വി. ഡി. സതീശനെ ഹൈക്കമാൻഡ് കേരളം മുഖ്യമന്ത്രിയായി തിരഞ്ഞെടുത്തിരിക്കുന്നു. സാധാരണയായി കേരളത്തിലെ സാധാരണ മനുഷ്യർ പ്രത്യേക മായി പറഞ്ഞാൽ യൂ. ഡി. എഫ് പിന്തുണക്കാർ പ്രതീക്ഷിച്ചിരുന്നതും അതായിരുന്നു എന്ന് പറയാം. നമ്മുടെ സകല ചാനലുകളും ഓരോ നിമിഷവവും വാർത്തകൾ നൽകി വിദേശത്തുള്ളവരെപ്പോലും പ്രബുദ്ധരാക്കി എന്നുള്ളത് അഭിനന്ദാർഹമാണ്. വളരെ ക്ഷമയോടെ കാത്തിരുന്ന കേരളത്തിലും വിദേശത്തുമുള്ള മയലാളികളെയും അഭിനന്ദിക്കുന്നു.

കഠിനാദ്ധ്യാനം ചെയ്യുകയും സേവനം ഒരു ജീവിത ചര്യയായി ജന്മനാ മാറിയിട്ടുള്ളവരും രാഷ്ട്രീയത്തിലൂടെയും സംഘടനകളിലൂടെയും പ്രവർത്തിയ്ക്കുക എന്നത് സ്വാഭാവികമാണ്. സംഘടനകളിൽ പോലും അധികാരത്തിനും സ്ഥാന മാനങ്ങൾക്കുവേണ്ടി ചില കടി പിടി കൂട്ടി കഠിനാധ്വാനം ചെയ്യുന്നവരെ കണ്ടില്ലെന്നു നടിച്ചു പിന്നിൽനിന്ന് കുത്തുന്ന ഒരു കാലമാണിത്. അതിലൊക്കെ വിപരീതമായി ഹൈക്കമാൻഡ് എടുത്ത തീരുമാനത്തെ അഭിനന്ദിക്കാതിരിക്കുവാൻ കഴിയില്ല.

മതേതര കേരളത്തിന് വീണുകിട്ടിയ നല്ല ഒരു മുഖ്യമന്ത്രിയായി വി. ഡി. മാറട്ടെ, നയിക്കട്ടെ എന്നാശംസിക്കുന്നു. ജനങ്ങൾക്കു കൊടുത്ത വാഗ്ദാനങ്ങൾ കൃത്യമായി പാലിക്കുവാൻ കഴിയണം. അതിനായി ഓരോ പ്രവർത്തകരും ആത്മാർത്ഥതയോടെ അഴിമതിയും കൈക്കൂലിയും ഇല്ലാതെ പ്രവർത്തിക്കേണ്ടിയിരിക്കുന്നു. നിയമം പാലിയ്ക്കുന്നതോടൊപ്പം നിയമ പാലകർക്കു നിയമം നടപ്പാക്കുവാനുള്ള അധികാരം കൊടുക്കുകയും അവരെ മോണിറ്റർ ചെയ്യുകയും  ചെയ്യുവാനുള്ള സംവിധാനം ഉണ്ടാകണം.

അതെ സമയം പത്തു വര്ഷം ഭരിച്ച മുന്നണികൾ തെറ്റുകളിൽ നിന്നും പാഠങ്ങൾ പഠിച്ചുകൊണ്ടു നല്ല പ്രതിപക്ഷമായി മാറണം. നല്ല കാര്യങ്ങൾ ചെയ്യുമ്പോൾ അതിനെ അനുമോദിക്കുകയും തെറ്റുകൾ കാണുമ്പോൾ ചൂണ്ടി കാട്ടുകയും ചെയ്യണം. ഭരണവും ജനജീവിതവും സ്തംഭിപ്പിക്കുന്ന പരിപാടികൾ ചെയ്യാതിരിക്കുക.

നമ്മുടെ  റോഡുകൾ വളരെ നന്നായി മാറി എന്നതും അതൊക്കെ ഇടതു മുന്നണിയുടെ നേട്ടമാണ് എന്ന് മിക്കവരും വിശ്വസിക്കുന്നു അതിനെ അനുമോദിക്കുന്നു. ഇനിയും  പട്ടണങ്ങളിൽ ഉള്ള റോഡുകൾക്ക് ഫുട് പാത പണിയുകയാണെങ്കിൽ നടന്നു പോകുന്നവരുടെ സുരക്ഷക്ക് പ്രയോജനമാകും.  പ്രവാസികളുടെ ആവശ്യങ്ങൾ അറിഞ്ഞു വേണ്ടത് ചെയ്യുന്നതും നല്ല കാര്യമായിരിക്കും. പ്രത്യേകിച്ച് പ്രവാസികളുടെ സ്വത്തിനും ജീവനും സുരക്ഷ ഉറപ്പാക്കണം. വസ്‌തുവകകളുടെ വിലക്കുറവും അത്യാവശ്യ സാധനങ്ങളുടെ വിലക്കയറ്റവും നിയന്ത്രിക്കുന്നതും നല്ല കാര്യമാണ്. പുതിയ സംരഭകർക്കു എല്ലാ പിന്തുണയും നൽകുക. വിദേശ രാജ്യങ്ങളായ അമേരിക്കയിലും യൂറോപ്പിലും മറ്റും ഐ എ എസ്, ഐ പി. എസ് ഉദ്യോഗസ്ഥരും മന്ത്രിമാരും മറ്റും പഠനം നടത്തി നല്ല കാര്യങ്ങൾ കേരളത്തിലും നടത്തിയെടുക്കുവാൻ ശ്രമിക്കേണം. മന്ത്രിമാരെ നിച്ഛയിക്കുമ്പോൾ ഏതു വകുപ്പാണോ നൽകുന്നത് അതെ വകുപ്പിൽ ജ്ഞാനമുള്ളവരും വിദ്യാഭ്യാസമുള്ളവരെയും നിയോഗിച്ചാൽ നന്നായിരിക്കും.

പുതിയ മന്ത്രി സഭക്കും പുതിയ പ്രതിപക്ഷത്തിനും എല്ലാ ഭാവുകങ്ങളും നേരുന്നു.